ہندوستان کابل ئٹی سکھ آتا عبادت گاہ غا مروک جلہو ءِ ”لغوری“ گوندیسہ اوغان حکومت آن اقلیتی سکھ مخلوق نا رکھنگ ءِ یخینی کننگ کن خواست کرینے۔
اوغانستان نا دارالحکومت کابل نا شور بازار نا علاقہ ٹی سکھ آتا عبادت گاہ آ چار شمبے نا دے مروک جلہو ٹی بیست و پنچ بندک کزیت کریر و یانزدہ پین ٹپی مننگ نا حوال ارے۔ اندن اسہ جلہو کروک اس ہم خلنگانے۔
ہندوستان جلہو نا مذمت کرینے۔ ہندوستانی وزیر خارجہ اسہ بیان اس شینک کریسہ پارے کہ اقلیتی فرقہ نا عبادت نا ہند آتیا دن انگا لغور آ جلہو، او ہم کووڈ نوزدہ نا وباء نا وختا، جلہو کروک آتا و اوفتا مخ تفی کروک آتا بد آسوچ ءِ پاش کیک۔
حوال آتا ردئٹ کابل نا متکنا شار نا نیامٹ دا گردوارہ غا اینو سہب تون ہمو وختا دہشتگرد آک جلہو کریر ہراتم اوڑے سکھ مخلوق عبادت اٹ مشغول ئس۔ جلہو نا وختا گردوارہ ٹی یک و نیم سد نا کچ بندغ ساڑی ئسر۔ افغانستان ئٹ سکھ آتا اسہ پارلیمنٹ نا باسک اس نریندر سنگھ خالصہ نا پاننگ ءِ کہ ہراتم جلہو مس او گردوارہ آن خڑک ئس و اوننگ کہ تہٹی ددینگا کہ اوڑے انت مسونے۔ سلہ بند بندغاک اوڑے سم کاری کننگ ئسر۔
‘سائٹ‘ انٹلیجنس گروپ نا پاننگ نا رِد ئٹ دا جلہو نا ذمہ واری ءِ اسلامک اسٹیٹ (داعش) منانے۔ داکان وختی طالبان تا ترجمان ذبیح اللہ مجاہد ٹوئٹ کریسہ پارے کہ طالبان نا دا جلہو اٹ ہچو دو اس اَف۔
یاتی مرے اوغانستان اٹ اینو پگہ سیاسی عمل پد تمنگ نا گواچی ءِ۔ اشرف غنی و عبداللہ عبداللہ ہڑتوماک صدارتی گچین کاری تیٹی تینا سرسہبی نا دعویٰ کرینو، تدوکا دے تیٹ صدارت نا جتا جتا سوغند ہم ارفنگا۔ امریکہ دا پد تمنگ ءِ ایسر کننگ نا کوشست کننگے کہ طالبان تیتون زو تیٹ مروک معاہدہ نا خواستاک ٹہیفنگ مریر۔ امریکی وزیر خارجہ مائیک پومپیو ہم درو کابل نا دورہ کریسس۔
دا ہیت یاتی مرے کہ تدوکا وخت آتیٹ سکھ آتیا جلہوک مریسہ کرینو۔ جولائی سن 2018 ئٹ جلال آباد ئٹ سکھ و بخال تیا ہمو وخت اسہ خودکش جلہو اس کننگا ہراتم او اوغان صدر اشرف غنی تون اوڑدئی کننگ ئسر۔ دا جلہو ٹی نوزدہ بندغ کسکر۔ داعش جلہو نا ذمہ واری ارفیسوس۔ سن 1990 نا وختا طالبان تا حکومت نا وختا ہم سکھ آتے مذہبی بد دننگ نا گواچی کننگا۔ اوفتے درستی مننگ کن تینا دوتیا پوشکن ءُ پٹی اس تفنگ نا پاننگاسس واہم اینو اسکان ترندی تون دا حکم ءِ ایسری تننگ متؤ۔
