سعودی عرب نا وزیر جانجوڑی پنچ شمبے نا دے کرونا وائرس آن 112 پوسکنا کیس و اسہ فوتگی ئسے پُک کرے۔ سعودی عرب ئٹ دا ہفت دے ئنا نیامٹ مالو کرونا وائرس نا گواچی مروک اِرا ناجوڑ کسکنو۔
سعودی عرب نا وزیر جانجوڑی اسہ بیان اسیٹی پارے کرونا وائرس آن زیمی بندغ آتا کچ 1012 مسونے۔ اینو پاروک پوسکنا کیس آتیٹ سی و شش نا تعلقداری الریاض، بیست و شش نا مکہ مکرمہ، سینزدہ نا جدہ و ہژدہ نا طائف آن ءِ۔ وزارت نا پاننگ نا رِد ئٹ صوبہ الدمام، القطیف، مدینہ منورہ، الخوبر و شار آتیٹ ہم کرونا نا پوسکنا کیس آک مونا بسونو۔
اوفتا پاننگے دافتیان دوانزدہ زیمی بندغ زوتیٹ پیشن نا ملک آن بسونو، اوفتا کرونا وائرس نا ٹیسٹ مثبت بننگان گڈ اوفتے جتا کننگانے۔ اسہ سد بندغ مالو آن کرونا وائرس نا گواچی بندغ آتون اوار تمنگ آن زیمی مسونو و اوفتے داسہ جانجوڑی خیالداری تون تخنگانے۔
وزارت جانجوڑی نا پاننگے کہ دا وخت اسکان کرونا وائرس آن زیمی 33 بندغ جانجوڑ مسونو۔ سعودی عرب دا ہفت دے ئنا نیامٹ کرونا وائرس نا وباء تون مون تننگ کن بھازا سخت انگا گام آتے ارفینے۔
خادم الحرمین الشریفین شاہ سلمان بن عبدالعزیز چار شمبے نا دے ملک ئٹ کرونا وائرس نا تالانی ءِ توننگ کن پوسکنو گام ارفنگ نا امنائی تس۔ ہرافتا رِد ئٹ سعودی عرب نا سینزدہ علاقہ نا مخلوق ءِ سفری پابندی خلنگا۔
مکہ مکرمہ، مدینہ منورہ وحکومتی شار الریاض نا مخلوق ءِ شار تیان پیشن مننگ یا تہٹی پیہنگ آ پابندی خلنگانے۔ دا شار آتیٹ دو شمبے آن پڑو کروک کرفیو نا وخت ءِ ہم زیات کننگانے۔ داسہ دا کرفیو نا بناء دیگر ہفت بجہ نا جاگہ غا پیشیم سہ بجہ مرو ءِ و دا سہب شش بجہ اسکان برجا مرو۔
سعودی حکومت نا حکم ئنا رِد ئٹ کرونا وائرس نا توننگ کن تیوی آ مال و سیل و سوات نا ہند آتے اندا تو ئنا بناء ئٹ بند کننگاسس۔ ریستوران، کیفے و چائے خانہ تیٹ اِرغ تننگا پابندی خلنگانے۔ واہم اوفک اُرا یا دفتر تیٹ اِرغ سرکننگ کیرہ۔