بلوچستان نا آجوئی خواہوک سلاء بند لشکر بلوچ لبریشن آرمی نا سرکماش بشیر زیب بلوچ، بلوچستان آ بیست و ہفت مارچ نوزدہ سد و چل و ہشت نا بابت راجی حوالکاری نا ویب سائیٹ ٹوئٹر آ تینا کلہو ئسے ٹی پارینے کہ اینو نا دے بلوچ ڈیہہ آ پاکستانی کوزہ ءِ و دا کوزہ نا مونا بلوچ نا مون تس ءِ 72 سال ایسر مس۔ بلوچ و پاکستان نا سیالداری نا بنماس 27 مارچ 1948 ءِ، ہرا ریفنگ، فوجی بے دادی، قول آن پد تمنگ، کوزہ گیری، مزاحمت تون نوشتہ ءِ۔
بشیر زیب بلوچ نا مُستی پاننگے کہ کوزہ گیری و زوراکی نا سیالی ءِ اخس کہ سال گدرینگے او ہموخس بے قانود مرو اخس کہ او بناء آن ئس. قانود آن چَپ آ دا عمل و تینا تیوئی آجوئی کن بلوچ اندن مزاحمت کریسہ کے دنکہ اوفک اولیکو دے آن پرنس عبدالکریم خان نا دروشم اٹ بناء کریسر۔
یاتی مرے بلوچ آزاتی دوست آ گَل آتا پارہ غان جہانی وباء کرونا وائرس نا سوب آن بلوچستان و پیشن ملک آتیٹ پڑو کروک مجلس و مُچی سے ہڈتننگو۔ بلوچ سیاسی گل بلوچ نیشنل موؤمنٹ راجی حوالکاری نا ویب سائیٹ آ کمپئین نا پڑو کرے و بلوچ خوانندہ گل بی ایس او آزات کمپئین ئٹ اوڑتون ہمکوپئی نا درشانی کرے اندن بلوچ سوشل میڈیا ایکٹوسٹ آتا پارہ غان ہم دا کمپئین نا پڑو کننگاسس۔
پنی آ بلوچ سلاء بند گل بلوچستان لبریشن فرنٹ نا راہشون ڈاکٹر اللہ نذر بلوچ دا بابت تینا خیال آتا درشانی کریسہ پارے کہ بیست و ہفت مارچ 1948 آ پاکستان طاغت نا زور آ خودمختار بلوچ ریاست آ جلہو کریسہ داڑا کوزہ کرے۔ ہمو وختان بلوچ تینا آزاتی ءِ اسیکہ وا ہلنگ کن جہد کننگے۔ نن دا دے ءِ مون ءُ دے ئسے نا وڑٹ گدریفنہ و تینا لمہ وطن نا آزاتی اسکان دا جہد ءِ برجاء تخون۔
بلوچ سیاسی و چاگڑدی تپہ آتیتون اوار ایلو تپہ غاتیان بھلو کچ اسیٹی مخلوق راجی حوالکاری نا سائیٹ آ بیست ہفت مارچ نا بابت تینا ہیت آتا درشانی کریر۔ اندن ہندوستان و ایلو پیشن ملک آتیان ہم مخلوق دا کمپئین اٹ بشخ ہلکر۔
داڑان بیدس سندھ نا آجوئی کن جنگ کروک سلاء بند گل سندھودیش روولیوشنری آرمی ہم بلوچ آتون ہمکوپئی نا درشانی کریسہ پارے کہ بلوچستان آ جلہو کننگا و بیست ہفت مارچ 1948 آ پاکستانی لشکر اوڑا کوزہ کرے۔ دا دے ءِ سندھی راج، بلوچ کن تہارمہ ءُ دے اس سرپد مریک و بلوچ راج تون اُست ہسونی تون اوار قومی سیوت نا درشانی کیک۔
