اولیکو وار ءِ نوشین قمبرانی و عبدالخالق فرہاد اواری ئٹ شیئر پارینو۔
براہوئی ادب ئٹ شاعری ءِ بھلو ہند اس دوئی ءِ۔ چاہندار آتا پاننگ نا رد ئٹ بلوچ تاریخ نا رکھوک ہم شاعری مسونے ہرا شاعری نا دروشم ئٹ سینہ بہ سینہ مُستی بریسہ کرینے، اندا لڑ اینو ہم برجاء ءِ ہراڑے زُلف و خن تیان بیدس مزاحمتی و خلقی شاعریک مریسہ ءُ۔
بلوچستان آن تعلقدار نوشین قمبرانی شاعر ئسے و شیئر پائک ہم، دا وخت آ اونا توار ئٹ اردو، بلوچی، فارسی و براہوئی شیئرک مونا بسونو۔ ولے دا اولیکو وار ءِ براہوئی اٹ او کس اسیتون اوار شیئر پارینے۔
عبدالخالق فرہاد ہم داکان مالو جتا دروشم تیٹ شیئر پاریسہ کرینے ولے زالبول شیئر پاروک اسیتون اونا ہم اولیکو وار ءِ۔ عبدالخالق فرہاد کیسٹ آتا وخت آن شیئر پاننگ نا بناء ءِ کرے، اونا توار بلوچستان و پیشن دوست تخنگک۔ گدرینگوک سال آتیان اونا شیئر پاننگ ئٹ خلقی رنگ مونا بس ہرادے مالو آن زیات خوش کننگا۔
عبدالخالق فرہاد نا توار ئٹ عابد عابدی نا شیئر “دا بلوچستان” بھاز پنی مس۔ شیئر ءِ پوسکنو دروشم اس تریسہ اسیکہ بلوچی حوال بناء کننگا و مُستی عابدی تینٹ ہم عبدالخالق فرہاد تون اواری کرے۔
“چلتنی آ گہوش” نا سرحال تون خالق فرہاد و نوشین قمبرانی نا شیئر تے “مہر ٹی وی” نا پارہ غان شینک کننگانے۔ براہوئی ادبی پڑ آ چاہنداری تخوک جمیل فاکر، غمخوار حیات، حسرت بلوچ، شمع نذیر تون شاہ محمد شان نا شاعری تے پاننگانے، اندن خلقی شیئر “سوزو کنا ساہ ءِ” ءِ ہم جتاو دروشم اسیٹی مونا ہتنگانے۔
یاتی مرے نوشین قمبرانی نا توار ئٹ منہ دے مالو بلوچی شیئر تا البم “شعور” نا سرحال تون شینک کننگار، ہراٹی منیر مومن، اماں بانل دشتیاری، عطاء شاد، وہاب شوہاز و مبارک قاضی نا شیئرک پاننگانو۔
براہوئی شیئر تے بننگ ءِ مخلوق دائسکان دوست تخک، دا خواست ءِ اُریسہ شیئر پاروک آک ہم ہردے پوسکنو دروشم اس ہتنگ نا کوشست کننگو۔ گدروک آ دے تیٹ “وسیم عالم” نا شیئرک و “استاد میر احمد بلوچ” نا شیئرک شینک مسونو۔ استاد میر احمد بلوچ مزاحمتی شاعری پاننگ نا سوب بلوچستان و پیشن ملک آتیٹ بھلو کچ اسیٹی بننگک۔