سوراب ٹی گدان ادبی دیوان سوراب نا پارہ غان اسے مشاعرہ اس مس۔ دا مجلس نا کماشی ءِ گدان ادبی دیوان نا چیئرمین سلام الفت کرے۔ ایلو مہمان آتیٹی گدان ادبی دیوان نا بانی شکیل زہری، بی ایس او نا چیئرمین نذیر بلوچ، منیر آزاد ، عنایت ساغر و ایلوفک اسر ۔
دا مجلس ٹی مہمان آک تران کرسٹ پاریر کہ بولی و ادب نا شون تننگ کن گدان ادبی دیوان مدام گچینو کڑد ادا کرینے ۔
مونی پاریر کہ گدان ادبی دیوان سیمینار، مشاعرہ، ہیلکاری نشست آتیان ابید چندی شاعر و ادیب آتا کتاباتے ام شینک کرینے ۔
لاک ڈاؤن نا ایسر مننگ آن پد گدان ادبی دیوان نا پارہ غان اسے وار ولدا علمی و ادبی کاریم آتا بناء کننگ تون اوار شہید ناصر حیات پبلک لائبریری ءِ ام فعال کننگانے ۔
مشاعرہ ٹی سوراب نا پنی آ شاعر استاد اسماعیل خنجری، حاجی فرید، فراق مہر، ہدایت نادری، عبدالمالک زیب، نجیب آیان، شعیب عالم، اقبال سائر ، کامران منیر، صلاح مینگل، عنایت ساغر ، سلام الفت، شکیل بلوچ اسک تینا شاعری تے بنفیر ۔