بلوچ اسٹوڈنٹس ایکشن کمیٹی نا بنجاہی ترجمان تینا شینک کروکا بیان ٹی بلوچستان یونیورسٹی نا داخلہ پالیسی آ نغد کاری کریسہ پارے کہ بلوچستان یونیورسٹی نا پوسکنا داخلہ پالیسی ناانصافی ءِ، جہانی دین کرونا وائرس آن مالو یونیورسٹی نا دا پالیسی مسونے کہ خوانندہ آتا داخلہ آک ٹیسٹ و انٹرویو ئٹ مسرہ، ولے دا وار یونیورسٹی نا بند و بست داسا پالیسی ٹی خاص بدلی کرینے ہرا زیات نمبر ہلوک آ خوانندہ آتے انٹرویو کن خوائفور و پرونشنل اوپن میرٹ ٹی داخلہ تننگو تا، ہرا ہچو دروشم اسیٹی امنا مننگ کپک۔
بنجاہی ترجمان تینا بیان ٹی پین پارینے کہ بند و بست نا ناانصافی آ پالیسی نا سوب آن خوانندہ غاک خلیس نا گواچی ءُ انتے کن داسا پوسکنا پالیسی تا سوب آن اوفتے تینا تعلیم ءِ برجاہ تیخنگ ٹی سختی مرو، دا رد ئٹ بلوچ اسٹوڈنٹس ایکشن کمیٹی نا اسہ وفد اس بنجاہی جنرل سیکریٹری سلمان بلوچ نا راہشونی ٹی وائس چانسلر تون اوڑدئی کرینے ہراڑے وی سی نا پارہ غان وفد ءِ دا یخین تننگانے کہ بند و بست دا ردئٹ اسہ میٹینگ اس ہڈ تِرو ہراٹی مالو نا داخلہ پالیسی آ عمل درآمد کننگے ولے داسکان پوسکنا داخلہ پالیسی آ عمل مننگ ءِ، ہرا اُست کٹہ کروک عمل ئسے۔
بنجاہی ترجمان تینا بیان نا ایسری ٹی پارے کہ دا پوسکنا داخلہ پالیسی نا سوب آن داخلہ بیرہ منہ ضلع اسکان مرو و دا ضلع نا خوانندہ غاک صوبہ نا تیوہ آتیان بھلا جامعہ ئٹ داخلہ ہلنگ آن سلور ولے نن جامعہ نا داخلہ بند و بست و وائس چانسلر آن دا خواست ءِ کینا کہ دا پوسکنا داخلہ پالیسی ءِ ایسر کیر و اولیکو ایڈمیشن پالیسی آن بھار خوانندہ آتے داخلہ تیر ،آگہ یونیورسٹی بند و بست دا پالیسی ءِ برجاہ تیخا گڑا خوانندہ آک تینا حق آتا رکھ اکن برانزی و مچی نا پاراہ آ ہننگ کیرہ۔