بلوچستان نا علاقہ کوئٹہ، حب و کھڈکوچہ ٹی مسہ بندغ مرگ نا گواچی، اسٹ بیگواء۔
رسینگوک حوال تا رد ئٹ بلوچستان نا ضلع مستونگ ٹی کھڈکوچہ نا علاقہ ئٹ خون و ورنا ئسے بیگواہ کننگ نا خلاف خاہوت بھلا روڈ آ جون ءِ تخیسہ برانز کرے۔
حوال تا رد ئٹ تدوکا شام کھڈکوچہ نا علاقہ الحسن ہوٹل نا خڑک نا درست بندغ آک اسہ اُرا اسیٹی پترینگانو، یارمحمد پنی ءُ اسہ بندغ ئسے بیم و خلیس نا گواچی کریسہ ٹپی کریسر و اونا مار نعمت اللہ ءِ بیگواہ کریر تینتون دریر، ٹپی آ بندغ یار محمد اینو ٹپی آ حالیت ئٹ کزیت کرے، خاہوت و علاقہ نا بندغ آک جون ءِ بھلا روڈ الحسن ہوٹل نا خڑک آ تخیسہ برانز کریر۔
برانز کروک آک خون و بیگواء کننگ ٹی اوار مروکاتا دزگیری نا خواست ءِ کننگ ءُ، روڈ بند مننگ نا سوب آن کُل گاڑی تا ہن و بر بند مس۔
گیشتر حوال تا رد ئٹ ڈپٹی کمشنر مستونگ محبوب احمد نا پاننگ ئٹ اسسٹنٹ کمشنر مستونگ انجینئرعائشہ زہری کھڈکوچہ ٹی بیگواہ وخون نا ویل ئنا خلاف روڈ آ برانز کروکا خاہوت آ سر مس، برانز کروکا بندغ آتو سرسہب مزاکرات آن گُڈ روڈ ءِ ملیفے۔
اندن کوئٹہ ٹی سُم کاری آن اسہ بندغ ئس بیران مسونے، ریسکیو آن رسینگوک حوال تا رد ئٹ سریاب روڈ چکی شاہوانی نا خڑک سُم کاری آن 28 سال ئنا نعیم اقبال میر حسن نا مار بیران مسونے ہرانا جون المی کارروائی آن گُڈ خاہوت نا دو ٹی تننگانے، ویل ئتو تفوک پین سر و سوج برجاء ءِ۔
اندن پین حوال ئسے نا ردئٹ حب ئٹی ترند بروکا گاڑی نا ڈک لگینگ آن اسہ بندغ ئس بیران مسونے۔
گیشتری حوال تا ردئٹ حب ئٹی اوتھل نا خڑک بھلا روڈ آ زیرو پوائنٹ نا ہند آ ترند بروکا گاڑی نا ڈک لگینگ آن سڑک آن ایمون مروک بندغ نا چاہنگداری محمد رمضان محمد حسین نا مار نا پن ئٹ مس۔
حوال تا رد ئٹ جون سول اسپتال اوتھل آ رادہ کننگا۔