راسکوہ ادبی دیوان دالبندین نا پارہ غان پنی آ شاعر و ادیب ریاض زرمبش نا شرف ئٹ مجلس و مشاعرہ اس اڈ تننگا۔
راسکوہ ادبی دیوان دالبندین نا پارہ غان پنی آ شاعر و ادیب و سنگت اکیڈمی خاران نا صدر ریاض زرمبش نا شرف ئٹ دالبندین پریس کلب آ اسہ مجلس و مشاعرہ اس اڈ تننگا ہرانا صدارت ءِ راسکوہ ادبی دیوان نا صدر علی رضا رند کرے۔
مجلس ئٹی گچین آ مہمان ریاض زرمبش تون اوار سنگت اکیڈمی نا جنرل سیکرٹری ضیاء شفیق، ایڈوکیٹ اشفاق احمد سیاپاد، سفر خان راسکوئی، حافظ محمد طارق سیاپاد، منظور احمد سیاپاد ہم ساڑی ئسر۔
مجلس ئٹی ساڑی مخلوق تینا خیال آتا درشانی کریسہ ریاض زرمبش نا بلوچی ادب و ربیدگ نا تالان کننگ و علم و ادب نا شونداری کن کننگوک خذمت آتے گچین پاریر۔
مجلس آن ریاض زرمبش ہم تینا خیالات آتا درشانی ءِ کریسہ ادیب و شعراء تے چاگرد نا دردمند پارے۔
اونا پاننگ ئس کہ علم و ادب نا تالان کننگ آن چاگرد ئٹ بڑز بندغی اقدار آتا وارث مریرہ۔ ہراڑے شعوری مجلس آک ناپید مریر اوڑے بندغ نا سوچ ءِ زنگ لگک۔
اونا پاننگ ئس کہ بلوچ زبان و ادب نا شابیتی ہندی ادیب و شاعر آتا راہبند مرے اندا لڑ ءِ برجا تخنگے۔
مجلس نا ارٹمیکو بخش ئٹی مشاعرہ اس اڈ تننگا۔ ہراٹی ریاض زرمبش، ضیاء شفیق، میر ابراہیم مینگل، علی رضا رند، علی بلوچ، علی اکبر صابر، غیاث عادل، ارشاد شمیم و ایلو شاعراک تینا کلام آتے بنفیر۔