بلوچستان ٹی خوانندہ جاہ آتیٹی دا وخت اسکان 525 بندغ کرونا وائرس آن زیمی مسونو۔ اندا حساب نا ردئٹ غٹ صوبہ ٹی کرونا وائرس آن زیمی مروکا بندغ آتا کچ 15177 آن گیش مس۔
جان جوڑی محکمہ نا کرونا وائرس آپریشن سیل آن شینک مروکا رپورٹ نا ردئٹ گدرینگوک آ 24 گھنٹہ ٹی 1217 بندغ نا ٹیسٹ کننگانے ہراڑان 85 بندغ ٹی کرونا وائرس پک مسونے۔
رپورٹ نا دا ام پاننگے کہ بلوچستان نا خوانندہ جاہ آتیٹی دا وختسکان 5659 بندغ نا ٹیسٹ مسونے۔ 525 بندغ ٹی دا وائرس پک مسونے۔
بلوچستان ٹی کروناوائرس آن جان جوڑ مروکا بندغ آک 13600 ءُ۔ اندن 1432 ناجوڑ آتا علاج برجاء۔
یاتی مرے حکومت پاکستان کرونا وائرس آن بند مروکا خوانندہ جاہ آتے 8 توہ آن پد ملننگ نا موکل تس۔ ولے خوانندہ جاہ آتیٹی کرونا وائرس نا کیس مونا بننگ آن پد اسے وار ولدا خوانندہ جاہ بند کننگ نا پڑو کننگا۔ ولے ہفتہ سے آن پد ولدا خوانندہ جاہ آتے ملننگ نا موکل تننگا۔
اندن اینو بنجائی وزیر تعلیم نا کماشی ٹی مروکا مجلس ٹی پگہ آن غٹ پرائمری اسکول تا ملننگ نا ام موکل تننگا۔