زنگی آ زمزیرک
گچین نوشت و مٹ: سدرہ بلوچ
“سپارٹیکس” ہاورد فاسٹ نا شاہکار ناول ہرا 80 آن ود بولی تیٹی مٹ مسونے۔
سپارٹیکس ساڑی و تدوک وخت ٹی لکھوک ءُ ناول ئسے۔ ناول نا بنجاہی خیال جہان ٹی زندہ بندغ آتا دا اقدار آتے مونی ہتیک ہرافتا او ازل آن تغ خننگ ءِ و دا اقدار آجوئی، مہر، امیت و جُوان است ءِ خوش بروک ءُ و زند ئسے۔ سپارٹیکس گواچن ئٹ ہر ہمو بندغ نا استعارہ ءِ ہرا ظلم ئنا برخلاف بغاوت کیک و ظالم آن ظلم ئنا بدلہ ءِ ہلیک و تینا حق اکن جنگ کیک۔ جہان ٹی کم و ود ہر بولی ٹی دا مٹ مسونے۔ ہاورد فاسٹ تینا دا شاہکار ناول ءِ زندان ٹی ایسر کرے۔
کسہ نا رد ئٹ سپارٹیکس اسہ مصری ءُ غلام اس ئس ہرا کرو خاندان آن تعلقداری تخاکا، ہرانا مطلب مصری زبان ٹی جانور ءِ۔ دا یونان نا شار ایتھنز آن ہلنگاسس، آہنی زنجیر تیٹی تفوک دا غلام دے مون آ ہشنگسہ سوزا رنگ اس مسوسس۔ اونا تیوہ بدن کوڑا کنیسہ خل اس مسوسس، زمزیر آتا باریم داخس اس کہ جک سلینگ و چرینگ سخت اس، اونا لخ اولن ئس ولے لخ آ زمزیر آتا خوشکنگ نا سوب آن ٹپ و پوتڑو جوڑ مسوسر، او ایلو غلام آتون اوار مش تا شک آتیا پِڈ ءِ خوشکیسہ چرنگاکا۔ او مچ دے کاریم کریرہ ولدا اوفتے بیرک تیٹی دکہ تننگاکا و زمزیر آک ملنگارہ۔
تیوہ دے نا خواری تا داد اوفتے بیرہ اسہ پیالہ کنوئی و نیمہ خوا اس دیر ئنا تننگاکا، دیر داخس کم مسوکہ کہ مدان مدان اوفتا بِک آک کاریم یلہ کریسہ کریرہ و ہراتم اوفک کسکرہ گڑا اوفتے صحرا ٹی بِٹیرہ۔ بیرک ٹی گند و گڑس بھاز زیات مسوکا ولے غلام آک است خراب مننگ آ الٹی کتورہ۔ اوفتے خلیس مسوکہ کہ الٹی کننگ آن اوفتا معدہ ٹی اسہ اونس کنوئی اس کم مف۔
سپارٹیکس ایلو غلام آتا وڑ الو۔ او خل اس ئس ولے اسہ نہ اسہ جاگہ اس اوٹی رحم نا جوزہ ساڑی ئس، ہرانا سوب آن او ایلو غلام آتا دڑد ٹی اوار مسوکہ، ایلو تیوہ غلام آک اودے باوہ نا پن ئٹ توار کریرہ۔ اندن اسہ غلام ئس اودے پاریکہ باوہ دا امرو دوزخ اسے گڑا سپارٹیکس ورندی ٹی پاریکا کل جوان مرور۔
سپارٹیکس داسہ پیشن نا جہان ٹی بریک و باتیاتس اودے ہلیسہ تینا گلیڈیئٹرز تیٹی اوار کیک۔ اودے زند ئنا تیوہ آسراتیک رسینگرہ و داسہ اونا کاریم کسفنگ ءِ۔ اودے جنگ تس نا تلہ غا مون تننگک، اودے تینا مون مقابل ءِ کسفوئی ءِ و بندغ آتے خوَش کروئی ءِ۔ داڑے سپارٹیکس تینا و تینا غلام سنگت آتا آجوئی نا خاطر جنگ کننگ نا چم اس ٹہیفے و او فیصلہ کرے کہ داسہ او کس اسے کسفپک۔ او دا ہیت ء تینا غلام آتے اوار کریسہ پارے۔ اونا اسہ سنگت اس سوج کرے باوہ گڑا نن امر کین، نم داسہ جتا جتا مبو، انت ئس کروئی ءِ ای نمے ولدا پاوہ۔ او ورندی تس دا غلام آتیٹی جرمنی نا زالبول ورینیا ہم اوار ئس ہرادے سپارٹیکس نا آقا باتیاتس زائیفہ نا وڑ ئٹ بشخاسس و ہرا سپارٹیکس کن بھاز مہر کریکہ۔ سپارٹیکس چم ئسے نا رد ئٹ تیوہ غلام و گلیڈیئٹرز آتے کلہو اس رسیفے و ولدا اسہ تخوکو وخت اسے آ تیوہ غاک بغاوت نا پڑو ءِ کریر۔ اوفک سپارٹیکس ءِ تینا کماندار جوڑ کریر و تینا تربیتی ادارہ تیان پیشن بسر۔ رومن سپاہی تیان زیات چاہندار ئسر، گلی گلی تیٹی جنگ مس و تیوہ روم ئٹی جون آک سڑیسہ کریر۔ غلام آک سرکاری سلاء خانہ تا قلف آتے پرغار و سلاء تے کوزہ ٹی کریر ولدا شار ءِ ہلار مش آ لگار، ورینیا سپارٹیکس تون اوار ئس، او تیوہ غاک دے ئنا روشنائی ٹی اسہ خلک اسے نا میدان سیٹی تولوک ئسر، سپارٹیکس نا سنگت ئس پارے داسہ نن ہرانگ کانہ ہر جاغہ اندا غلامی نظام ءِ۔ سپارٹیکس پارے نن ہر جاغہ غا کانہ غلام آتے آجو کینہ، تینا فوج اتون اوار کینہ، رومن فوج ئنا مقابلہ ءِ کینہ۔ دا خدا ءِ سما ءِ کہ سرسہبی ننا مرو یا رومن فوج نا۔ سپارٹیکس ولدا پارے نن اسہ اندنو جہان اس جوڑ کرون ہراڑے نئے اسہ غلام ئس مرو نئے آقا ئس، ہرا گِڑا غا نن کوزہ کینہ او کل ئنا اسٹ مرو، زائیفہ آن بیدس اسہ زالبول ئس خڑک آ تخپرون، زالبول ءِ نرینہ نا کچ حیثیت دوئی مرو۔
روم آن سینٹ فوجی تا دستہ تے کاپورا غا مون تس ہراڑے سپارٹیکس غلام آتا فوج ءِ ہلیسہ ساڑی اس ولے سپارٹیکس دافتے نیست کرے ولدا بھلو فوج اس مون تننگا ولے ہزار غلام دئے دئے نا گروپ جوڑیسہ اوفتے نیست کریر۔ فوجی تا سلاء غاک پُلنگار، بیرہ اسہ سپاہی ئس زندہ تخار و اودے پارے “ان سینٹ نا ماسا کنا کلہو ءِ ایت کہ نی ننا برخلاف فوج مون تسوس نن اودے بُھس کرین، نن غلام افن ہرافتے نی پاروک ءُ ازباب پاسہ، جہان نے آن بیزار مسونے، جہان کوڑا تا توار آن بیزار مسونے ہرادے نی نن غلام آتیا شلیسہ، مالو تیوہ بندغ آک برابر ئسر ولے نی اوفتے آقا و غلام ٹی ونڈ کریس، نن نے آن جوانو بندغ اُن، ننے ٹی او ہر گڑا ارے ہرادے اسہ جوانو بندغ اسے ٹی مروئی ءِ۔
سپارٹیکس و اونا سنگت آک چار سال اسکان رومن حکومت نا مقابلہ ءِ کریر و ولدا ہفتاد ہزار رومن نا فوج سپارٹیکس نا ایسر مروک آ سپاہی تے گھیرہ ٹی ہلیسہ و اونا فوج ءِ نیست کرے۔ سپارٹیکس ہراتم مرک ءِ خڑک آن خنا او گڈیکو حکم تینا زالبول مُزور ءِ دا وڑ تس۔ میز آ تیلی تا قطار آک ءُ، ہر تیلی ٹی کنا ہر غلام سنگت کے آجو مننگ نا سند آک ءُ، ہر تیلی ٹی بیست ہزار سیٹرز (رومن سکہ) ءُ، ای دا خواوہ دا تیلی تے اوفتے ایت، اوفتے پا دمدستی تون ہنبو و ولدا الماری آن تینا ہسپانوی تلوار ءِ کشا و تینے کسفنگ نا خیال ئٹ اسہ بشخندہ اس اونا جوڑ تیا تالان مس۔
سپارٹیکس کستنے داسکان زندہ ءِ، ہراتم اسکان بندغ خواری کریسہ کیک و ایلو بندغ اونا خواری تا برم و کٹھیا تے پلیسہ کیک سپارٹیکس زندہ مریسہ کیک، وخت ئس خف اٹ پُس پُس کریسہ وخت ئس ترند برانز کریسہ۔