ملک ئٹ نُت ئنا نرخ ٹی پین ودکی مسونے، اندن زیات یوٹیلیٹی اسٹور آتا بورہ ہم رسینگپک، کوئٹہ ٹی کراچی آن بروکا چکی نا نُت آتا نرخ ٹی پین ودکی ریکارڈ کننگانے و نُت ئنا اسہ سیر ئنا قیمت ٹی 4 رپئی و 10 سیر باچیک نا نرخ ٹی 40 رپئی نا ودکی مسونے۔
نُت کبین مننگ آ کوئٹہ نا تندوروالاک اِرغ نا نرخ ٹی ودکی نا خواست کریسہ تیوہ آ شار ئٹی تندور آتے بند کرینو، تندور والا تا پاننگ ءِ کہ 320 گرام نا اِرغ 20 رپئی ٹی بہا کننگ مننگ کپک، نرخ 30 رپئی کننگ نا موکل تیر۔
پشاور ٹی نُت ئنا 85 سیر گوڑی نا نرخ 6 ہزار 200 رپئی اسکان سرمسونے، و مارکیٹ میل فائن ٹی نُت ئنا 20 سیر نا باچیک 1420 رپئی ٹی رسینگک اندن اسہ سیر بورہ 115 رپئی نا مسونے۔
اندن کراچی و لاہور نا زیات یوٹیلیٹی اسٹور آتا بورہ رسینگپک، بورہ ودی کننگ کن شاریک اسہ یوٹیلیٹی اسٹور آن ایلو آ ہننگ کن بیوس مسونو، لاہور ٹی بورہ نا ہر سیر 100 رپئی آن 105 رپئی سیر اسکان بہا مننگ ءِ، وزیر اعظم نا نوٹس ہلینگ آن گُڈ ہم حالیت ٹی جوانی مننگ کتو۔