سندھ ئنا دارالحکومت کراچی ٹی بلوچ اسٹوڈنٹس آرگنائزیشن آزاد نا مسکوئی چیئرپرسن کریمہ بلوچ نا ٹورنٹو ٹی گمانی آ خون نا بر خلاف بلوچ یکجہتی کمیٹی نا خواست آ مخلوق بھلو کچ اسیٹی کراچی پریس کلب نا مونا مُچ مسر برانز کریر۔
بلوچ یکجہتی کمیٹی نا خواست آ اینو نا برانز ٹی نیاڑیک بھلو کچ اسیٹی اوار ئسر، اندن کراچی نا جتا علاقہ آتیان بلوچ، پشتون و سندھی سیاسی باسک آتیان بیدس بندغی حق آتا کمیشن نا راہشون و خوانندہ آک ہم بھلو کچ اسیٹی اوار ئسر۔
برانز ٹی اوار نیاڑیک و چناک پلے کارڈز و بینرز افیسر ہرافتیا بلوچی، انگلش و اردو بولی ئٹ کریمہ بلوچ کن انصاف نا نعرہ غاک نوشتوک ئسر۔
برانز آن وائس فار بلوچ مسنگ پرسنز نا ماما قدیر بلوچ، بیگواہ ڈاکٹر دین محمد نا مسڑ مہلب، یوسف مستی خان و ایلوفک تران کریسہ پاریر کہ کریمہ بلوچ نا خوْن ءِ وت کشی یا اندن ءُ مرگ اس پاننگ سہی اف، بلوچ دا ہیت ءِ منیپک و خوڑتی ئٹ سر و سوج کننگ نا خواست ءِ کیک۔
او پاریر کہ کریمہ مزاحمت نا چیدہ ءِ، نظریہ کسپک بلکن او ننا راہشونی ءِ کریسہ کرو۔
او پارے کہ کریمہ اینو ہزار آ سیاسی باسک آتا سیاسی لمُہ ءِ، کریمہ نا تربیت آن احسان، شہداد و پیرک آن بارانگا ورناک ودی مریرا۔
برانز کروک آتا پاننگ ئس کہ بلوچ راج و اونا دوست خوا کریمہ بلوچ نا کذیت ءِ ریاستی کاریم اس سرپد مریرہ، کینڈا ٹی خوڑتی و سوگوی ئٹ سر و سوج نا خواست ءِ کینا، ساجد حسین و کریمہ بلوچ ءِ اسہ ور اٹ خلنگا و دادے ڈھکنگ کن وتکشی نا ڈرامہ اس جوڑ کننگانے۔
برانز کروک آتا پاننگ ءِ عارف، بارکزئی، راشد حسین، ساجد حسین، کریمہ ءِ پیشن ملک آتیٹ ریاست ٹک کرے، کینیڈا ءِ تینا ردی ءِ منیسہ بشخنداری کروئِ ءِ کہ او بلوچستان نا مسڑ ءِ رکھنگ کتو۔
پین حوال ئسے نا ردئٹ پنچاب نا دارالحکومت لاہور ٹی ہم خوانندہ آتون اوار ہر تپہ آن تعلقدار بندغ آک بھلو کچ اسیٹی کریمہ بلوچ نا گمانی آ خون نا بر خلاف برانز کریسہ کینڈین حکومت آن خواست کریر کہ او خون ئنا پٹ و پول ءِ خوڑتی وا جوانی ئٹ ایسری تریسہ کریمہ نا خاہوت و راج ءِ انصاف تے۔
یاتی مرے کہ داسکان کریمہ بلوچ نا گمانی خون نا سوب آک پاش افس، اونا خاہوت و بلوچ سیاسی حلقہ غاتا دعویٰ ءِ کہ او کسفنگانے اندن ٹورنٹو پولیس نا رد ئٹ داکان خون نا ہچ ءُ شاہدی رہسنگتن