بلوچ راج تدوکا صدی تیٹ بھلو ہمپ و لڈ کرینے ہرانا سوب آن او تیوہ جہان نا جتاء ملک و ڈیہہ تیٹ آبات ءُ۔ اوفتا یکہ مننگ آن بیدس، بلوچ آتا اشتماعی آباتی کم و ود پنچ کروڑ شست و شش لکھ آن زیات ءِ ہرا اگہ اسہ ملک اسیٹ آبات مسرہ گڑا دا دروشم ئٹ اوفتا ملک جہان نا بیست و ہفتمیکو کل آن زیات آبادی تخوک آ ملک مسکہ۔ دا نوشت نا مسخت جہانی تلہ غا جتاء خطہ تیٹ بلوچ الس ئنا ساڑی آباتی تا اسہ جاچ اس ہلنگ ءِ۔
پنجاب:
پنجاب ہمو بلوچ قبیلہ تا اُرا ءِ، ہرا سندھ و بلوچستان نا سیم آن خڑک رہینگرہ، ہرافتا آباتی اِرا کروڑ آن زیات ءِ ولے اِرا درسد آن کم بندغ آک بلوچی ئٹ ہیت کیرہ یا بلوچی دود آتے منیرہ۔ داڑان بیدس داڑے زیات بلوچ قبیلہ غاک سرائیکی بولی ئٹ ہیت کیرہ و سرائیکی دود و ربیدگ نا منوک ءُ۔
سندھ:
بیرہ کراچی ٹی بلوچ آتا آباتی 25 لکھ آن زیات ءِ و صوبہ سندھ ئنا ایلو علاقہ تیٹ ہم بھاز بلوچ قبیلہ غاک آبات ءُ۔ بلوچ آک سندھ ئنا آباتی نا 42 درسد ءُ ہرا صوبہ نا کل آن بھلا نسلی ٹولی ءِ، داڑان گڈ سندھی و باہوٹیک بریرہ۔
کے پی کے:
خیبر پختونخواہ (کے پی کے) ئٹ، ڈیرہ اسماعیل خان، پنجاب تون گنڈوک کیہی ضلع تیٹ بلوچ آتا اسہ بھلو کچ اس آباد ءِ، ہرافتا آبادی اسہ لکھ چِل ہزار آن دیخہ زیات ءِ۔
بلوچستان:
بلوچستان نا تیوہ آباتی 12.34 ملین ءِ، ہرا ٹی بلوچ آباتی کم و ود 55.7 درسد ءِ، ہرا کم و ود 6.6 ملین بندغ آ تالان ءِ۔ پشتون آتا آباتی 36 درسد ءِ اندن ایلو 8 درسد ہزارہ، سندھی، پنجابی، ازبک، ترکمان، تاجک و سرائیکی کوْن آ چنکا برادری تیا تالان ءِ۔
افغانستان:
بلوچ آک افغانستان نا 24 صوبہ ٹی آبات ءُ ہرافتیٹ نیمروز، فراہ، ہلمند، قندھار و ہرات اوار ءُ۔ واہم کل آن زیات بلوچ آباتی آ صوبہ نیمروز ءِ ہرا نا بنجائی شار زرنج ءِ۔ نیمروز کابل آن 900 کلومیٹر جاندم دے کہی ٹی دریائے ہلمند آن خڑک و افغانستان و ایران نا سیم آٹے۔ ہندی بلوچ آک ملک ئٹ صدی تیان دریابی کوڑ تیان اسٹ نا کرّک آ آبات ءُ۔
ایران:
ایران نا صوبہ سیستان و بلوچستان ملک ئنا سی و یک صوبہ تیٹ ارٹمیکو نمبر آٹے۔ دانا آباتی کم و ود 27 ملین ءِ ہرافتیٹ بھازی بلوچ آتا ءِ۔ واہم بلوچ آک نہ بیرہ سیستان و بلوچستان ئٹ رہینگرہ بلکن چار پین صوبہ کرمان، ہرمزگان و جاندمی خراسان ئٹ ہم تالان ءُ۔ دا پنچ صوبہ تیٹ بلوچ الس ئنا تیوہ آباتی 4.8 ملین آن زیات ءِ ہراکہ ایران نا تیوہ 87 ملین آباتی نا 5.51 درسد جوڑ مریک۔
یو اے ای :
متحدہ عرب امارات ٹی بلوچ آتا حساب کچ 215،000 آن 468،000 نا نیام ئٹ ءِ و 2006 آن آباتی ٹی تُرندی ئٹ ودکی مسونے۔ منہ بلوچ متحدہ عرب امارات نا سلاء بند لشکر ٹی خذمت کننگ ءُ۔ بلوچ بندغ آک بلوچی ہیت کیرہ، اندن ہندی بندغ آک ہرا دا ڈیہہ ٹی زنک آتیان آبات ءُ خلیجی عربی ہیت کیرہ ۔
عمان :
تاریخی ریکارڈ پاننگ ءِ کہ اسلام نا بنائی دے تیٹ کم و ود 1400 سال مالو بلوچستان آن مخلوق عمان آ لڈ و ہنپ کریر۔ 16 ویں و 17 ویں صدی نا یورپی سیاح آک ہم عمان ٹی بلوچ بندغ آتا ساڑی مننگ نا باروٹ نوشت کرینو۔ دا وخت عمان ٹی کم و ود 10 لکھ بلوچ ءُ ہرا کہ ڈیہہ نا تیوہ آباتی نا 23 درسد ءِ۔
انڈیا :
اتر پردیش، ہندوستان ٹی کہی بلوچ کالونیک ءُ ہمر کہ امیر نگر، فرید نگر، غازی آباد، گڑھی عبداللہ، پکی گڑھی، جسوئی و ضلع مظفر نگر ٹی بگھرا۔ دا خلق مغل بادشاہ اورنگزیب چار بلوچ ایلم تے، بیرام خان، امیر خان، شیر خان و ہاشم خان ءِ اونا سالم عبداللہ خان تون اوار تننگاسس۔ دا بلوچ خاہوت ہمو ڈیہہ ٹی آبات مس و مغلیہ سلطنت نا زوال تون اوار ہی ارزشت دوئی کرے ۔
ترکمانستان :
مروی بلوچ برادری نا افغانستان و ایران ٹی بلوچ کمیونٹیز آن تعلق تخِک ہرا ترکمانستان نا پوسکنا سیم آتیا خُڑک آبات ءِ ۔ فی الحال او مرو نخلستان نا ہند آ رہینگیرہ انتئے کہ علاقہ ٹی پوسکنا فارسی آباتی ءِ منگھیت امیر شاہ مراد 1780 نا دہائی نا اخیر ٹی اونا شیعہ عقیدہ نا سوب آن بے اُرا کریسس۔ اندن او بخارا و سمرقند ئٹ ہِننگ آ بے وس مس۔
قطر :
اسہ گمان ئسے نا ردئٹ قطر ٹی بلوچ آتا آباتی کم و ود 52،000 ءِ، ہرا تیوہ آباتی نا کم و ود 1.7 درسد جوڑ مریک ۔ ہراڑے بلوچی و براہوئی اوتا لمئی بولی ءِ عربی کننگ ٹی ہم پِنی ءُ۔
بحرین :
بحرین ٹی بلوچ آتا آباتی کم و ود 44،000 پاننگانے ہرا تیوہ آباتی نا کم و ود 2.6 درسد ءِ ۔ بلوچی بھلو کچ ئسے آ ہیت کننگیک و بحرین ٹی ارٹمیکو غُٹ آن زیات کاریم ئٹ ہتنگوک لمئی بولی ءِ۔ بلوچ کمیونٹی عربی و بلوچی ہڑتوما بولی تیا لائخی تخک اندن داتیٹ بھکو کچ اس براہوئی ءِ تینا لمئی بولی نا وڑ ہم پارہ ۔
نیامکو دے ٹِکی و افریقہ :
نیامکو دے ٹِکی و افریقی ممالک نا وڑ سعودی عرب، کویت، کینیا، یوگنڈا و تنزانیہ ٹی بلوچ آتا اسہ قابل ذکر ولے کم کچ آبات ءِ۔ اگہ اسہ جا آ اُروئی مرے گُڑا اوتا آباتی 60،000 نا کچ مرو۔ بلوچ آباتی نا منہ بندغ 17 ویں صدی نا بنا آن ہی دا ڈیہہ آ ہندی ءُ۔
