بلوچستان آن پاکستانی فورسز کارندہ آک پین چار بندغ ءِ زوراکی ئٹ بیگواہ کریر اندن فورسز کارندہ آتون دزگیر مروک بندغ نا جشوک جوْن دوئی کننگانے ۔
بلوچستان ٹی بندغی حق آتیا کاریم کروک ادارہ پانک نا ردئٹ پاکستانی فورسز کارندہ آتا بے دادی آن اسہ بندغ اس مرگ نا گواچی مسونے۔
شابیت حوال تا ردئٹ داد بخش مسکان ءِ گیشکور نا لشکری کیمپ ٹی پاکستانی فورسز کارندہ آک برجاء چار دے اسکان بے دادی نا گواچی کریر۔
پانک نا ردئٹ او لشکری کیمپ ٹی ہِننگ آن گُڈ بیگواہ مسس، و اینو پیشیم آ کہوک حالیت ئٹ دوئی کننگا ۔ ہندی بندغ آتا ردئٹ او اُرا آ پدا بننگ ئٹ ٹپی مننگ نا سوب آن مرگ نا گواچی مس ۔
اندا وخت پاکستانی فورسز کارندہ آک ضلع پنجگور نا علاقہ گچک آن باوہ ءِ اِرا مار و سالُم تون اوار بیگواہ کریر۔ بیگواہ کروک آتیٹ جنگیان و اونا مار وحید، نصیب و سالُم منظور داد کریم اوار ءُ ۔
علاقائی ذرائع تا ردئٹ تُدوکا دے فورسز کارندہ آک علاقئی تے تینا کیمپ آ خوائیفسہ زیات بے دادی نا گواچی کریر اوکان گُڈ یلہ کریر اندن پِن کروک بندغ آتے دزگیر کریسہ بیگواہ تخار ۔
ذرائع نا پاننگ ئس کہ پِن کروک بندغ کاریم آن ہَمپ و لڑ ءُ و او اوکان مالو مَشی علاقہ گیڑو ٹی بزغری کریکہ، ہراڑان فورسز کارندہ آک گیشتر درزن آ ہمپ و لڑ تون اوار اودے ہم 2022 ٹی زوراکی ئٹ ہمپنگ آ بے وس کریسہ گچک کلری ٹی رہینگنگ نا پاریسُر ہراڑان گُڈ او بے وس مس داڑے بس فورسز کارندہ آتا کیمپ نا خُڑک آبات مسس۔