بلوچستان نا ضلع آواران آن حوال رسینگانے کہ پاکستانی ڈکوک ایجنسی تیکن کاریم کننگ و بلیک میلنگ آن بیزار مریسہ اسہ زالبول اسکول ٹیچر اس وت کشی کرے۔
وت کشی کروک زالبول نا چاہنداری نجمہ نا پن ئٹ مسونے ہرا آواران گیشکور نا ہندی ئسے۔
حوال تا رد ئٹ نوربخش پنی ءُ بندغ اس ہرا پولیس کارندہ ئسے و مننگ کروک وڑ ئٹ پاکستان ڈکوک ایجنسیی تیکن کاریم ہم کیک،او پن کروک زالبول ءِ بلیک میل کریسہ کرے کہ او پاکستانی ڈکوک ایجنسیی تیکن کاریم کہ، منہ کننگ آ پن کروک زالبول ءِ بلیک میل کریسہ کرے ہراڑا بیزار مریسہ زالبول وت کشی کرے۔
یاتی مرے کہ بلوچستان ٹی دا وڑ ئنا ویل رپورٹ مریسہ کرینے ،داڑان مست ہم دا وڑ ئنا رپورٹ رسینگانے ہراڑے پاکستانی فوج نا زوراکی نا سوب آن بندغ آک وت کشی کننگ آ بیوس مسونو۔
23 اکتوبر آ سی ٹی ڈی نا دو آن عجاب یلانزہی نا زوراکی ئٹ بیگواہی و اونا ماما شفقت یلانزہی ریٹائرجسٹس مسکان زہی نا خون ئنا تومت آ دزگیری آن بیدس ہم پاکستانی لشکر برجاہ عجاب یلانزہی نا اُرا آ چھاپہ خلیسہ اس۔
چادر و چاردیواری نا عزت ءِ لتاڑینگ تون اوار اُرا والا تے جسمانی و ذہنی بے دادی کننگیک، ہراڑان بیزار مریسہ ورنا لطیف اللہ یلانزہی نا زاہیفہ وت کشی کرے ہراڑا اونا ڈکی آ ارغ ہم تینا زند ءِ اسیر کرے۔
داڑان مست کیچ نا علاقہ سرنکن ٹی چاکر مجید پاکستانی فوج نا زور شاغینگ نا سوب آن وت کشی نا کسر ءِ ارفیسس،مسہ سال مست مارچ دوہزار نوزدہ ٹی پاکستانی لشکر سرنکن ٹی چھاپہ خلیسہ چاکر ءِ دزگیر کریسہ دئے تو اسکان زوراکی ئٹ بیگواہ تخیسہ سخت ذہنی وجسمانی بے دادی آن گڈ یلہ کرے۔
یلہ کننگ آن گڈ ہم فوج اودے برجاہ کیمپ آ خوافیسہ کریر و اودا بلوچ جہدکار تا برخلاف کاریم کننگ کن زور شاغیسہ کریر ولے چاکر فوج کہ کاریم کننگ آن وت کشی ءِ سہی سرپد مس۔