پاکستانی لشکر نا حوالکاری تلہ (آئی ایس پی آر) بلوچ سلہہ بند گل ئنا جاگہ تیا آپریشن نا دعویٰ کرینے۔
پاکستانی لشکر نا حوالکاری تلہ (آئی ایس پی آر) نا شینک کروک بیان نا ردئٹ 18 و 19 اگست نا نیامیکو نن پاکستانی لشکر بلوچستان نا ضلع مستونگ انٹیلی جنس آپریشن کرے۔
آئی ایس پی آر نا دعویٰ نا ردئٹ آپریشن نا وخت آ ترند سم کاری آن پد بی ایل اے نا مُسہ باسک خلنگار اندن مُسٹ ٹپی مسنو۔
پاکستانی فوجی ترجمان دوبہ خلکنے کہ آپریشن ئٹ خلنگوک سلہہ بند گل ئنا باسک آک علاقہ ئٹ کیہی کارروائی تیٹ اوار ئسر و 12 اگست 2024 آ پنجگور نا ڈپٹی کمشنر ذاکر علی نا کسفنگ نا ہم ذمہ وار ئسر۔
یاتی مرے آئی ایس پی آر نا پارہ غان داڑان مالو ہم بلوچستان ئٹ انٹیلی جنس بیسڈ آپریشن نا کیہی تدینی تیٹ بلوچ سلہہ بند گل آتا باسک آتے خلنگ نا دعویٰ کننگانے البتہ پدان پاکستانی لشکر نا دو آن کسفنگوک او بندغ آتا چاہنداری مالو آن زوراکی ئٹ بیگواہ بندغ تا دروشم ئٹ مسنے۔
واہم ایلو پارہ غان آزاد حوالکار تیان مستونگ و ایب کیب ئٹ ہچ وڑ ئنا جھڑپ آتا حوال دائسکان رسینگتنے۔
یاتی مرے بلوچ لبریشن آرمی ڈپٹی کمشنر ذاکر بلوچ نا خون آن بے تعلقی نا درشانی کریسس۔ ترجمان جیئند بلوچ اسہ بیان اسیٹی پارے کہ ذاکر بلوچ اسُل بی ایل اے نا اسہ ہِٹ لسٹ ئسے آ متنے۔