بلوچستان نا علاقہ قلات، گوادر و پنجاب نا شار سرگودھا آن پاکستانی لشکر چار ورنا ءِ زوراکی ئٹ بیگواہ کرے۔
بلوچستان نا ضلع قلات نا علاقہ کلی پندرانی آن پاکستانی لشکر حسین شاہ نا مار اختر شاہ ءِ اوفتا اُرا غان زوراکی ئٹ بیگواہ کرینے۔
علاقائی حوالکار تا ردئٹ درے ننکان پاکستانی لشکر بھلو کچ اسیٹی کلی پندرانی تیوہ پلویڑ کریسہ اُرا تیا جلہو کرے دا وخت آ فورسز آک پن کروک ورنا ءِ دزگیر کریر و اونا خن تے تفیسہ گاڑی ئٹ خسار۔
پن کروک ورنا تا بابت ہچ وڑ نا حوال رسینگتنے۔ ضلعی کوالخواک دائسکان دا بابت ہچو ہیت اس کتنو۔
ایلو پارہ غان حوال رسینگانے کہ بلوچستان نا دریابی شار گوادر آن اِرا بلوچ خوانندہ موسیٰ خالق داد و سمیر مجید ءِ پاکستانی لشکر 22 ستمبر آ دشت ڈورو، فوجی چوکی آن ہمو وخت دزگیر کرے ہراتم ہڑتوم آک گوادر آن کپکپار آ ہننگ ئسر۔
فورسز آتا دو آن دزگیری آن پد ہڑتوم آ خوانندہ تے دائسکان مونا ہتنگتنے۔
اندن پاکستان نا صوبہ پنجاب نا شار سرگودھا بہادر شاہ روڈ آن بلوچستان نا خوانندہ اس فورسز آتا دو آن دزگیری آن پد بیگواہ کننگا۔ ہرانا چاہنداری خان محمد نا مار حامد بلوچ ہند ضلع کیچ تحصیل بلیدہ نا پن ئٹ مسنے۔
بیگواہ خوانندہ ہفتمیکو سیمسٹر شعبہ سوشیالوجی، یونیورسٹی آف سرگودھا ٹی خواننگ ءِ۔ اونا خوانندہ سنگت آک و خاہوت خوانندہ نا دمدستی یلہ کننگ نا خواست کرینو۔
تدوکا بیست و چار گھنٹہ ئٹ چار بلوچ ورنا نا زوراکی ئٹ بیگواہی نا تدینیک رپورٹ مسنو۔
بلوچستان تون اوار پنجاب و ایلو علاقہ تیان بلوچ آتا زوراکی ئٹ بیگواہی نا تدینیک ہر وخت رپورٹ مریرہ اندن او بیگواہ بندغ آتیٹ بھازی کچ بلوچ خوانندہ تا ءِ۔
پاکستان نا صوبہ پنجاب ئٹ بلوچ خوانندہ غاک پاکستانی ڈھکوک ادارہ تا پارہ غان پروفائلنگ و بھیم ئتون مون تننگ ءُ دا بابت خوانندہ غاک عدالت آ ہنانو واہم دا تدینیک سلنگ کتنو۔
داکان بیدس پنجاب ئٹ خوانوک بلوچ خوانندہ تے مذہبی و ایلو ٹولی تا پارہ غان بیدادی تون مون ایتوئی تمک۔
اِرا دے مالو پنجاب یونیورسٹی لاہور ئٹ بلوچ خوانندہ تے جمیعت طلباء اسلام نا باسک آک بیدادی نا گواچی کریر دا وخت آ جمیعت نا خوانندہ غاک خاخری سلہہ تے آزاتی ئٹ کاریم ئٹ ایسر واہم پولیس ہاسٹل آ چھاپہ خلیسہ بلوچ خوانندہ تے دزگیر کرے۔
تدینی ٹی ٹپی آ اِرا خوانندہ نا حالیت نازرک پاننگک اندن جمیعت نا خوانندہ و پولیس نا برخلاف بلوچ خوانندہ غاک برانز کننگ ءُ ہرافتا پاننگ ءِ کہ جمیعت نا غنڈہ غاک پنجاب پولیس تون اوار مریسہ بلوچ خوانندہ تے تعلیمی کاریم تیان توننگ و اوفتے یونیورسٹی آن کشنگ نا کوشست کننگ ءُ۔
تیوہ بلوچستان ئٹ ہڑدے ئی بنداؤ آ زوراکی نا بیگواہی تا تدینیک رپورٹ مریرہ۔ ٹی بی پی ڈیٹا ویژول اسٹوڈیو نا کچ و حساب نا ردئٹ اگست نا توہ ئٹ تیوہ بلوچستان آن 37 بندغ زوراکی ئٹ بیگواہ کننگار اندن 9 بیگواہ بندغ آجو مسر و 6 بندغ نا جونک خننگار۔