استو ایران نا پارہ غان اسرائیل آ سد آ میزائل آتیٹ جلہو کننگ آن پد ہڑتوم آ بدی دار تا نیام ئٹ تڑی تا لڑ برجاء ءِ۔
ایران اسرائیل آ سد آتا کچ میزائل خلک ہراڑان بھاز آ میزائل آتا ڈغار آ تمنگ آن ماڑی تے نسخان رسینگانے۔ میزائل جلہو تیان پد اسرائیلی کمکار آک زیمی مروک جاگہ تا جاچ ءِ ہلکر۔ ایرانی میزائل آتیان نیامی اسرائیل ئٹ اسہ اسکول ئسے نا ماڑی ءِ ہم نسخان رسینگانے۔ اسرائیل نا دعویٰ ءِ کہ ایران نا بھاز آ میزائل آتے آسمان ئٹ ہی بھس کننگانے ولے گڑاس ڈغار آ ہم تمانو۔
اسرائیلی لشکر نا ترجمان رئیر ایڈمرل ہیگاری پارینے کہ ایران نا پارہ غان اسرائیل آ استو نا مروک میزائل جلہو تا بھیم بش کروک نتیجہ مرور۔ واہم ترجمان دا بابت شابیتی ہیت کتو کہ ایران ءِ ہرا ڈول ئنا نتیجہ تیتون مون تروئی تمو و اسرائیل ہراتم دا جلہو تا ورندی ءِ ایتو۔
ترجمان پارے کہ اوڑتون دمدستی دنو حوال اف کہ ایرانی جلہو تیٹ اخس نسخان مسنے۔ اونا پاننگ ئس کہ گڑاس میزائل ملک ئنا نیامی و جاندمی علاقہ تیٹ تمانو۔
اندن اسرائیل نا سر وزیر بینجمن نیتن یاہو ایرانی جلہو تا ردعمل ئٹی تینا بیان ئٹ پارینے کہ ایران اسہ بھلو ردی اس کرینے و اودے دانا بدلہ ءِ تروئی تمو۔
اسرائیلی سر وزیر گیشتر پارے کہ ”ایرانی حکومت ننا رکھ ئنا ارادہ ءِ پہہ مننگ ئٹ بے سہب مسنے و او تینا دژمن آن بیر ہلنگ نا ننا ارادہ ءِ ہم پہہ مفک۔“
حوال تروک ادارہ ’رائٹرز‘ نا ردئٹ اقوام متحدہ کن اسرائیلی سفیر اسہ یکہ ءُ بیان اسیٹ پارینے کہ ایران تینا گام تا ورندی ءِ زوت سگو و او ورندی اوڑکن بھاز تکلیف تروک مرو۔
ایلو پارہ غان ایرانی صدر مسعود پزشکیان چاگڑدی حوالکاری تلہ ایکس آ شینک کروک بیان اسیٹ پارینے کہ ایران نا پارہ غان میزائل جلہوک، اسرائیل نا ظلم ئنا برخلاف ردعمل ئسر۔
او پارے کہ ”ایران و خطہ کن ایمنی و سلامتی“ نا مسخت تون اوار ایران نا ”جائز حق“ آتا بنداو آ، اسرائیل ءِ ”ایرانی مفاد و شاری تا رکھ اکن“ فیصلہ کن ورندی تننگا۔
نیتن یاہو ءِ پامدار کریسہ پزشکیان پارے کہ اسرائیلی سر وزیر سرپند مرے کہ ”ایران جنگ ئنا خواست گار اف ولے ہر بھیم ئنا برخلاف سوگوی ئٹ سلوک مرو۔“
اندن ایرانی لشکر نا سروک پارینے کہ اسرائیل ایران نا برخلاف کارروائی کرے گڑا ورندی ردعمل سئے شمبے نا جلہو تیان ہم ترند مرو۔
عرب حوال تروک ادارہ ’الجزیرہ‘ نا ردئٹ اینو اسہ بیان اسیٹی ایرانی لشکر نا سروک محمد باقری دعویٰ کرے کہ درو ایران نا میزائل جلہو تیٹ موساد نا ہیڈکوارٹر آتیتون اوار اسرائیل نا اِرا ایئر بیسز آتے سر سہبی ئٹ ٹک کننگا۔
اونا پاننگ ئس کہ ایران نا میزائل جلہو تیٹ اسرائیل نا صنعتی، زرگزرانی بنجاہ یا السی ہند آتے ٹک کننگتو حالانکہ دن کننگ ہم مننگ کریکہ۔
ایلو پارہ غا اسرائیل اقوام متحدہ نا سیکریٹری جنرل انتونیو گوتریس ءِ ”دوست بفروک“ گوندیسہ اونا اسرائیل ئٹی پیہنگ آ رکھ خلکنے۔
اسرائیل نا وزیر خارجہ اسرائیل کاٹز اینو اسہ بیان اسیٹی پارے کہ انتونیو گوتریس استو نا ایران نا اسرائیل آ مروک جلہو تا پاش مذمت کتو۔
اسرائیلی وزیر خارجہ نا پاننگ ئس کہ جہان نا کم و ود غٹ ڈیہک ایران نا سفاک آ جلہو تا مذمت کریر واہم انتونیو گوتریس دن کننگ ئٹ بے سہب مس، اندا خاطر او اسرائیلی ڈغار آ گام تخنگ نا لائخ اف۔
یاتی مرے کہ اقوام متحدہ نا سیکریٹری جنرل استو اسہ بیان اسیٹی پاریسس کہ ”نیامی قطب ئٹ پوسکنا جلہو تیان حالیت آتا خرابی مننگ نا مذمت کیوہ۔“