حماس نا راہشون یحییٰ سنوار اینو اسہ اسرائیلی جلہو اسیٹی مرگ ئنا گواچی مسنے۔ اسرائیل نا وزیر خارجہ اسرائیل کاٹز پک کرے کہ اینو غزہ ئٹ اسرائیل نا کاروائی اسیٹی حماس نا سروک یحییٰ سنوار کسفنگانے۔
وزیر خارجہ اسرائیل کاٹز سنوار نا کسفنگ ءِ ”اسرائیلی لشکر کن فوجی و اخلاقی سرسہبی“ اس گوندا۔
اسہ بیان اسیٹ او پارے کہ ”سنوار نا کسفنگ“ بندی تا دمدستی آجوئی و اندنو بدلی ئسے نا گمان ودی کرو ہرا غزہ ءِ اسہ پوسکنو گواچن ئسے نا پارہ غا درو ہرا حماس و ایران نا کنٹرول آن بیدس مرو۔
اسرائیلی لشکر اینو اسہ بیان اسیٹ پاریسس کہ غزہ نا پٹی ٹی اسہ آپریشن اسیٹی مُسہ سلہہ بند کسفنگار۔ فوج دا آپریشن نا جاگہ و گیشتر حوال فراوان کتنے۔
فلسطینی سلہہ بند تنظیم حماس نا پارہ غان دا معاملہ غا باقاعدہ ہچو ردعمل اس مونا بتنے۔
اسرائیل نا وزیر دفاع یوآو گیلنٹ ایکس آ اسہ پوسٹ اسیٹی پارے کہ ”ننا دژمنک تینے ڈھکنگ کپسہ۔ نن اوفتا پد رند ءِ کرون و خلون تا۔“
یحییٰ سنوار ہفت اکتوبر 2023 نا حماس نا اسرائیل آ کروک جلہو تا ماسٹر مائنڈ آتیان اسٹ تکنگک۔ اسرائیل نا غزہ ٹی آپریشن آتا بناء آن پد او بکار مروک بندغ آتیان اسٹ اس ئس ہرادے اسرائیل خلنگ نا پک ارادہ کریسس۔
حماس ہفت اکتوبر 2023 آ غزہ غان اسرائیل آ جلہو کریسہ اوڑے 1200 بندغ ءِ مرگ ئنا گواچی و کم و ود 250 ءِ بندی کریسس۔ اسرائیل جلہو نا ورندی ٹی غزہ ئٹ آسمانی و زمینی کارروائی بناء کرے ہراٹی غزہ نا جانجوڑی وزیر نا ردئٹ 42 ہزار آن زیات بندغ مرگ ئنا گواچی مسنو۔
یحییٰ سنوار سال آتیان غزہ نا پٹی ٹی حماس نا کاریم کروک راہشون مسنے و او حماس نا سلہہ بند کڑدہ غان خڑک تکنگاکہ۔
سنوار برجاء سال جولائی ٹی حماس نا مسکوہی سیاسی سروک اسماعیل ہنیہ نا ایران ئٹ مرگ ئنا گواچی مننگ آن پد حماس نا سروک گچین مسوسس۔
ایڑے امریکہ نا صدر جو بائیڈن ءِ دا معاملہ غا اسرائیل نا پٹ و پول تا بابت پاننگانے۔ بائیڈن نا انتظامیہ نا اسہ سینئر اوغدہ دار ئسے نا ردئٹ امریکی و اسرائیلی کوالخواک خڑک حال احوال ئٹی ءُ۔
یحییٰ سنوار نا مرگ ئنا گواچی مننگ نا بابت رپورٹ آک اندنو وخت ئسے آ مونا بسنو ہراتم اسرائیلی فورسز آک قطبی غزہ ئٹ جبالیہ باہوٹی کیمپ آ زمینی و فضائی جلہو برجاء تخانو۔