کراچی پریس کلب نا مونا بلوچ یکجہتی کمیٹی نا باسک آتیا پولیس نا بیدادی، برانز کروک آتے دزگیر کننگا۔
بلوچ یکجہتی کمیٹی نا پارہ غان کراچی پریس کلب نا مونا اڈ تروک برانزی ریلی آ سندھ پولیس جلہو کریسہ کیہی برانزی تے بیدادی نا گواچی کننگ تون اوار دزگیر کرینے۔
پولیس نا پارہ غان پریس کلب نا دامون ایمون ئٹ بھلو کچ ئسے آ کارندہ غاک مُچ مریسہ پریس کلب آ ہنوک کسر تے بند کریر اندن بلوچ یکجہتی کمیٹی نا ڈپٹی آرگنائزر وہاب بلوچ و ایلوفتا دزگیری نا حوال ہم رسینگانے۔
یاتی مرے درو بلوچ یکجہتی کمیٹی کراچی تون اوار بلوچستان آن زوراکی نا بیگواہی تا ودوکا تدینی و برجاء توہ ئٹ 60 نا کچ آ بندغ آتا زوراکی ئٹ بیگواہی نا برخلاف برانزی تحریک ئسے نا پڑو کریسس ہرانا بناء اینو کراچی آن ئس۔
بلوچ وائس فار بلوچ مسنگ پرسنز نا سمی دین نا ردئٹ کراچی پریس کلب نا مونا ننا برانز ءِ توننگ کن پولیس بھلو نفری اس ننا بننگ آن مالو سلفیسس اندن داکان مالو ایلوفتے برانز کننگ کن اِلنگا ہراتم نن سر مسون گڑا پولیس غٹ کسر تے بند کرے۔
سمی دین بلوچ کراچی ٹی بلوچ برانزی تیا طاغت کاریم ئٹ ہتنگ نا بابت ٹوئٹ کریسہ پارینے کہ بی وائی سی نا سینئر راہشون لالا وہاب بلوچ ءِ درزن آ سنگت آتیتون اوار پولیس بیدادی کریسہ دزگیر کننگ آن پد نادرست ہند آ درینے۔
اونا پاننگ ءِ کہ بلوچ زالبول تیا ہرا وڑ پولیس تینا دود ءِ برجاء تخیسہ اسہ وار پدا بے دڑدی ئٹ بیدادی کرے اوفتیا لٹ و کٹ کرے ننے نرینہ پولیس کارندہ غاک کھرینگ تسر، بلوچ دشمنی ٹی غٹ سیاسی وفاقی جماعت آک تینا ریاستی ستون آتیتون اوار مونا بریسہ ءُ۔
او پارے کہ ننا ڈوہ دادے کہ نن ریاستی تادی آ چپ مفنہ تینا زوراکی ئٹ بیگواہ بندغ تا آجوئی نا خواست ءِ یلہ کپنہ۔
سمی دین بلوچ بلاول بھٹو زرداری ءِ پامدار کریسہ پارے کہ بلاول بھٹو سیاسی راہشون آن زیات بلوچ آتیکن آمر آن ہم گندہ ءُ کڑد اس سر تننگ ءِ۔