بلوچستان نا ضلع خضدار آن ارا بندغ نا بچوک بشخ آک دوئی کننگار ۔
جونک ہشت سال مالو بیگواہ کننگوک عابد حسین ولد غلام حسین عمرانی و مستی خان ولد گہور خان لوٹانی ہند نورگامہ نا ءُ۔ ہرا زہری گزان کوچو ئٹ روڈ ئنا رہی آ خننگان ءُ ہرافتیا کسفنگوک آتا چاہنداری نا پرچیک لکھوک ئسر ، میت آتے خاہوت نا دوٹی تننگا ۔
پانزدہ اگست ارا ہزار بیست و یک آ کوئٹہ ٹی وائس فار بلوچ مسنگ پرسنز نا کیمپ ئٹی عابد حسین نا لمہ بریسہ اونا بیگواہی نا معلومداری تے جمع کریسس ۔
خاہوت نا ردئٹ عابد حسین ءِ 28 اکتوبر 2017 آ خضدار انجیرہ کراس آن پنی آ نائب ملا مرید بیگواہ کریسہ ریاستی ادارہ نا حوالہ کرینے ۔
خاہوت نا ردئٹ عابد حسین نا زوراکی ئٹ بیگواہی نا برخلاف کیہی درگہ آتیا ٹک ٹک کرین ولے ہچو امیت ئس خننگتئو بتو اینو اوفتا بچوک بشخ آک دوئی کننگار ۔
یات مرے کہ ارا دے نا نیام ئٹ بلوچستان نا جتاء علاقہ آتیان چار بیگواہ بندغ تا جون آک خننگار ۔ تدوکا دے آواران آن ارا بندغ نا جونک دوئی خننگار ۔
آواران آن دوئی کروک جون آک فقیر جان و عیسی نا ئسر ۔ فقیر جان ءِ 26 ستمبر 2024 آ اونا اراغان چھاپہ نا وخت دزگیر کننگاسس ، اندن عیسی 17 فروری 2023 آن بیگواہ ئس ۔