بلوچستان نا ایلو علاقہ پنجگور، حب، ڈیرہ بگٹی و ڈیرہ مراد جمالی ٹی جتا روڈ شکست آتیٹ 6 بندغ مرگ نا گواچی و 5 ٹپی مسونو۔

حوال تا رد ئٹ پنجگور نا علاقہ پروم گپ ٹی اِرا گاڑی نا ڈک لگینگ نا سوب آن  اِرا بندغ مرگ نا گواچی مسونو۔ ڈک لگینگ آن ہڑتوما گاڑی تیٹ خاخر لگا ہرانا سوب آن پنچی کہن کلگ آن تعلقدار عبد الکریم نا مار عبدالوحید و حضور بخش نا مار زوعيب پُتک ہلیسہ مرگ نا گواچی مسر۔

گیشتر حوال تا رد ئٹ جوْن تے ڈسٹرکٹ ہیڈکوارٹر ہسپتال پنجگور آ سر کننگ آن گڈ خاہوت نا دو ٹی تننگا۔

اندن حب شاہ نورانی موڑ نا خڑک اسہ روڈ شکست اسیٹ اسہ بندغ اس ٹپی و اسٹ مرگ نا گواچی مسونے۔ شکست سوب آن 25 سال ئنا سلیمان مرگ نا گواچی اندن 35 سال ئنا  حبیب اللہ ٹپی مسونے۔ ایدھی ایمبولنس نا  کمک ئٹ جون تے ہسپتال آ سر کننگار۔

اندن پین حوال ئسے نا رد ئٹ  ڈیرہ بگٹی ٹی روڈ شکست ئٹی اسہ بندغ اس مرگ نا گواچی و مسٹ ٹپی مسر۔ گیشتر حوال تا رد ئٹ  ترند بننگ نا سوب آن  ٹریکٹر نا اِرا ٹائر پیش تمار ہرانا سوب ٹریکٹر ویل نا گواچی مس۔ ٹپی آک دم دستی وڑ ئٹ خڑک ئنا ہسپتال آ سر کننگار ہراڑے دوا درمان کننگ آن گڈ ویلفیر ہسپتال سوئی آ ریفر کننگار۔

اندن ڈیرہ مراد جمالی ٹی میر مراد چوک نا خڑک ٹوڈی کار ارا کسری ءِ  ڈک تننگ آن گڈ  ترند ہننگ نا سوب آن کلٹی مس۔ گیشتر حوال تا رد ئٹ ٹوڈی کار ئنا کیرنگ آن بننگ نا سوب آن ارا بندغ مرگ نا گواچی و گاڑی ٹی سوار بندغ ٹپی مس۔

ویل ئنا حوال رسینگ تون ریسکیو ٹیم و پولیس ہند آ سر مس و جوْن تون اوار ٹپی ءِ ڈیرہ مراد جمالی ہسپتال آ سر کریر مرگ نا گواچی مروکا ہڑتوما ورنا ءُ مار ءُ۔

براہوئی کتاب آتا شینکاری برجاء ءِ۔ اوتان کلچر اکیڈمی نا پارہ غان عبدالرحیم زام نا افسانہ غاتا کتاب “تنیائی” شینک مس و آماچ ادبی دیوان نا پارہ غان حسن ناصر نا مٹ کروک کتاب “زندان نا سنگت” نا شینکاری نا پڑو کننگانے۔

حوال تا رد ئٹ نوشکے آن تعلقدار رحیم زام نا افسانہ غاتا ارٹمیکو کتاب “تنیائی” اوتان کلچر اکیڈمی نا پارہ غان شینک کننگانے۔ دا جمعی وڑئٹ رحیم زام نا مسٹمیکو کتاب ءِ۔ داکان مالو رحیم زام نا افسانہ غاتا کتاب “کنا بہشت” و ناول “سوزِ ہانل” شینک مسونو۔

کتاب نا سرلوز ءِ اوتان کلچر اکیڈمی نا سروک غمخوار حیات “کسہ ایسر متنے” نا سرحال تون نوشتہ کیک کہ ہر بندغ نا زندگی اسہ سرجمو کسہ ئسے و دا اسہ کسہ غان پین چندی کسہ غاک سر ہلسہ کیرہ۔ بازا بندغ آتیٹ دا گشاد ارے کہ او تینا زندگی نا کسہ ءِ لوزاتا دروشم ٹی ہتسہ بیان کننگ کیرہ بازاک کننگ کپسہ۔ رحیم زام ٹی دا گشاد ارے کہ او تینا زندے کسہ نا شکل اٹ بیان کننگ کیک ولے دا کسہ تیٹ اوڑتون ہمرہ پین چندی زندہ انگا کڑداک ہم اوار تمسہ تینا کسہ تے بیان کیرہ۔ گڑا رحیم نا پاروکا ہر اسہ کسہ ایسری آن پد ہم برجاء مریک دُنکہ اونا افسانہ تا اولیکو کتاب “کنا بہشت” اٹ ہراکہ کسہ غاک ئسر ہمو کسہ تا ارٹمیکو لڑ داڑے “تنیائی” ٹی ہم بیان مننگ ءِ۔ لہٰذا ہرتم اسکان “کسہ ساز” نا دَم ارے تو کسہ غاک برجاء مرور۔

اندن آماچ ادبی دیوان نا پارہ غان پڑو اٹ پاننگانے کہ حسن ناصر نا مٹ کروک کتاب “زندان نا سنگت – جارج جیکسن نا چھٹیک” زوت آماد ادبی دیوان نا پارہ غان شینک مرو۔

دا کتاب نا سر لوز ءِ پنی آ نوشتکار ڈاکٹر شاہ محمد مری نوشتہ کرینے۔ اندن ہڑتوم آ کتاب آتا ٹائٹل تے رحیم زام شون تسونے۔

“زندان نا سنگت” حسن ناصر نا مٹ کروک اولیکو کتاب ءِ داڑان بیدس اونا جمعی کتاب آک مسُٹ ءُ ہرافتیٹ افسانہ غاتا اِرا کتاب “مزل نا رند اٹ” و “چیہانٹ” اوار ءُ۔

حوال تا رد ئٹ بلوچستان ئٹ 24 گھنٹہ ئنا نیام ئٹی کورونا وائرس نا پین مسہ ناجوڑ مرگ نا گواچی مسر، کورونا وائرس نا 82 پوسکنو ناجوڑ پک مسونو، اندن 30 ناجوڑ دراخ مسونو۔

محکمہ جانجوڑی بلوچستان نا شینگ کروکا رپورٹ نا رد ئٹ ہفتہ نا دے بلوچستان ئٹ 1 ہزار 420 بندغ نا کورونا ٹیسٹ کننگانے، ہمو ٹیسٹ آتا سوب آن کوئٹہ ٹی تیوہ آتیان زیات 56 مثبت کیسز پک مسونو۔

گیشر حوال تا رد ئٹ بلوچستان ئٹ کورونا وائرس آن زیمی مروکا تا جمعی کچ 25 ہزار 83 مسونے اندن ایکٹیو کیس آتا کچ 1 ہزار212 مسونے۔ رپورٹ نا رد ئٹ بلوچستان ئٹ 24 گھنٹہ ئنا نیام ئٹی کرونا آن 30 ناجوڑ تا درواخ مننگ آن گڈ  بلوچستان ئٹ دراخ مروکا تا کچ 23 ہزار 595 مسونے، محکمہ جانجوڑی نا  رد ئٹ  بائی فلو  آکسیجن زیمی 31 ناجوڑ  ہسپتال آتیٹ تروک ءُ۔

بلوچستان ئٹ کورونا آن زیمی پین 3 بندغ مرگ نا گواچی مسر ہراڑان گڈ کہوک آ بندغ آتا کچ 276 مسونے، تدوکا 24 گھنٹہ ئنا نیام ئٹی
بلوچستان نا بیرہ 13 ضلع ٹی کورونا نا  ٹیسٹ مننگ کرینے۔ اندن 20 ضلاع ئٹ کورونا وائرس نا ہچ ءُ ٹیسٹ متنے، 4 ضلاع ئٹ کورونا وائرس نا اسہ اسہ ، 2 ضلاع ئٹ ارا ٹیسٹ کننگانے۔

خضدار، زہری قبائل تا نیام ئٹ جیڑہ، اسہ بندغ اس بیران مس۔

بلوچستان نا ضلع خضدار نا علاقہ زہری ٹی قبائل تا نیام ئٹ جیڑہ، اسہ بندغ اس بیران مس۔ لیویز نا رد ئٹ زیدی ئٹ زمین نا زی آ زہری قبیلہ نا ارا ٹولی نا نیام ئٹ جیڑہ نا سوب آن ملوک، شاہ نواز نا مار، قوم زہری ہند خیرواہ دا ویل ئٹ بیران مس. لیویز مقدمہ درج کریسہ مستی پٹ و پول بناء کرے۔

اندن اسہ پین ویل اسیٹی ژوب نا علاقہ ئٹ ارا گرپ آتا ویل نا سوب آن اسہ بندغ اس بیران مس۔

ژوب، کلی بئین مندوخیل ئٹ ارا گروپ آتا ویل ئٹ سم کاری آن اسہ بندغ اس بیران و اندن اسٹ اس ٹپی مس۔

گیشتر حوال تا رد ئٹ ژوب نا علاقہ کلی بئین مندوخیل ئٹ ارا گروپ ئٹ شکست اس مس ہرانا سوب آن زمان بیران اندن سلیمان ٹپی مس ہرانا جون و ٹپی اسپتال آ دننگار، پین کاروائی تعلقدار کوالخواک کننگ ءُ۔

کوئٹہ نا علاقہ آک جناح کالونی، رئیسانی روڈ، سبزل روڈ، قمبرانی روڈ و کرانی فیڈر تون اوار ایلو زیات آبات علاای آتیٹ ہژدہ گھنٹہ نا بیدس پڑو لوڈشیڈنگ کیسکو خواستگار آتے بھاز فریشانی تا گواچی کننگ ءِ، کیسکو کرانی فیڈر و بنجائی  شکائست سیل ہم غیر فعال تخنگانے۔

گیشتر حوال تا رد ئٹ کوئٹہ ٹی مد باسن مننگ تون بجلی نا بحران ترند مس، باسنی نا ترندی ٹی ودکی تون اوار کیسکو بجلی نا مرغن و بیدس پڑو لوڈشیڈنگ ءِ پین ودیفینے ہرانا سوب آن شاریک بھاز سختی تا گواچی ءُ۔

کیسکو شکائست مراکز تا ٹیلی فون نمبر تے سہب شام  گٹ تخیرہ تاکن مخلوق نا شکائست آتیان مر مننگ کیر جناح کالونی رئیسانی روڈ، سبزل روڈ، کلی قمبرانی، پشتون آباد سریاب، کرانی روڈ، نواں کلی تون اوار  بھازی زیات آبات علاقہ آتیٹ ہچو سوج کروک اس اف۔

اندن کرانی فیڈر نا علاقہ جناح کالونی و رئیسانی روڈ تدوکا پنج دے ئنا سے تیوہ آ شام سہب ئنا پنچ بجہ اسکان پنج گھنٹہ بجلی تننگ ءِ، اندن سہب و شام ئنا بجلی ءِ بند کننگ نا سوب آن خواستگار آک فریشانی تا گواچی کرینو۔

بجلی تفرنگ نا سوب آن شاری تا زند ئنا معاملہ آک زیمی مننگ ءُ، لس مخلوق وفاقی وزارت دیر و بجلی آن خواست کرینو کہ کوئٹہ ٹی بجلی نا دروغ نا بحران نا ایسری کن گام ارفر تاکن کیسکو نا ڈوہدار بے پروائی تا سوب آن خواستگار آک  پین سختی تا گواچی مفس خاص وڑ ئٹ کرانی فیڈر نا کارندہ آتیان سرسوج کیر۔

رسینگوک حوال تا رد ئٹ محکمہ مڈ آینو ہم پاکستان نا بھاز آ علاقہ آتیٹ  مد بھاز باسن مننگ نا  گمان ء، سندھ نا جتا علاقہ آتیٹ پارہ 49 اسکان ہننگ نا گمان ارے۔

اندن پنجاب، سندھ و بلوچستان ئٹ بھاز باسنی ء، بھاز آ علاقہ آتیٹ  تروند باسنی نا راج ء، آینو ہم سندھ ئٹی دادو و نوابشاہ ٹی باسنی نا کچ49 ڈگری اسکان امیت ء۔

بلوچستان نا جتا علاقہ آتیٹ ہم مد بھاز باسن ء، سبی ٹی پارہ 48 اسکان ہننگ کیک، پنجاب ٹی ہم مد بھاز باسن مننگ نا گمان ء۔