حکومتی سیوت آن جتائی آ بی این پی نا کٹیا؟

الّمی خوانبو

حکومتی سیوت آن جتائی آ بی این پی نا کٹیا؟

ٹی بی پی سرگپ

بلوچستان و پاکستان نا ہفتاد سال آتیا تالان “زوراکی نا سیالی” ریفنگ و سوغند آتے گوجالنگ نا مرغنو تاریخ ئسے۔ دانا بناء خان قلات نا ایلم شہزادہ عبدالکریم آن مریسہ نواب نوروز خان زہری نا دزگیری اسکان سرمریک، و اندن نواب اکبر خان بگٹی نا شہادت ہم اندا ریفنگ آتا بشخ مریک۔ سوغند آتیا چپ ہننگ نا لڑ ءِ برجاء تخیسہ، پاش اندن گمان مریک کہ بنجائی حکومت و بی این پی مینگل نا نیامٹ 2018 ئٹ ٹہینگوک شش ٹِک آ تالان معاہدہ ءِ بنجاہ پامداری نا لائخ سرپد مننگان نمن مس۔

بنائی وڑ ئٹ دا معاہدہ ءِ بی این پی کن ہڑتوما پارہ غان اسہ سرسوبی ئسے نا دروشم ئٹ اوننگسہ ئس، اسہ پارہ بنجاہ ئٹ تینا چار ووٹ آتیان تحریک انصاف نا حکومت ءِ سیبو تننگ نا سوب آن او اسٹبلشمنٹ کن قبول کننگ نا لائخ مسوسس و ایلو پارہ غان بے گواہ بلوچ آتا ویل ءِ معاہدہ و پارلیمنٹ ئٹ ارفنگ ئٹ اوفک بلوچ قوم پرست مخلوق ئٹ ہم سفتی ءُ ہند دوئی کننگ ئسر۔ ہڈ تروکا معاہدہ نا تیوہ غاتیان گچین آ ٹِک بلوچ بیگواہ مخلوق نا یلہ کریفنگ ئس، داڑا وفاق نا پارہ غان سوغند آن چپ ہننگ نا سوب آن بلوچستان نیشنل پارٹی حکومتی سیوت آن جتائی نا فیصلہ کرے۔

بھاز آ تجزیہ نگار آتا پاننگ نا ردئٹ ہڈتروک معاہدہ ءِ ہر وڑ ئٹ بے سوب مروئی ئس، واہم دا نیامٹ ہرا 417 بیگواہ بلوچ یلہ کننگار، اوفتا یلہ کرفنگ نا طرہ بی این پی و اختر مینگل نا کاٹم آ بیرفنگا۔ ولے اختر مینگل تینٹ 17 جون آ اسمبلی ئٹ تینا تران نا وختا دا ہیت ءِ منا کہ 2018 ئٹ ٹہیفنگوک اوفتا معاہدہ آن گڈ تحریک انصاف نا دور حکومت ئٹ پین 1500 بلوچ بیگواہ کننگانو۔ دا وخت اسکان کس اس بلوچستان ئٹ زوراکی نا بیگواہی تا لڑ نا توننگ ئٹ بے سوبی نا ذمہ واری ءِ ارفنگ کن خننگتنے۔

واہم، بلوچ اُس نا ہمدردی و حزب اختلاف نا کمک ءِ مونا تخنگہ گڑا بی این پی نا حکومت سیوب آن جتائی نا فیصلہ اسل وخت ئنا زی ئٹی ءِ۔ تیوہ غا بلوچستان ئٹ پاکستانی اسٹبلشمنٹ نا لتاڑوک آ پالیسی تا خلاف سوختئی و دڑد ئنا اسہ پوسکنو چول اس خننگسہ ءِ۔ مننگ کروک وڑ ئٹ فوج نا ٹہیفوک “ڈیتھ اسکواڈز” آتا برخلاف برانز آتا لڑ داسہ چارمیکو ہفتہ ئٹ پیہانے۔ تدوکا ہفتہ بلوچستان نا ضلع کیچ ئٹ اسہ پین بلوچ زالبول کلثوم بلوچ نا ہندی ڈیتھ اسکواڈ آتا دو آن بیرانی خاخر آ تیل چٹ تننگ نا کاریم ءِ کرے۔ بلوچستان ئٹ سیاسی شعور نا اسہ پوسکنو بش مننگ اس خننگ مریک۔

اسمبلی ئٹ تینا تران نا وختا اختر مینگل بلوچستان ئٹ اسیکہ وا ڈیتھ اسکواڈ آتے بیدار کننگ آ تینا خلیس نا درشانی ءِ کرے۔ ڈیتھ اسکواڈ ہمو سلہہ بند ٹولیک ءُ ہرافتے مننگ کروک وڑ ئٹ پاکستانی فوج بلوچ قوم پرست آتا برخلاف کاریم ئٹ ہتیک۔

دا ڈیتھ اسکواڈ آک نہ بیرہ لس بلوچ آتا زند ءِ زیزاریفنگ نا سوب ءُ بلکن دافتیان اختر مینگل ذاتی وڑ ئٹ ہم زیمی مننگ ءِ۔ بد پِن ڈیتھ اسکواڈ سرغنہ و اختر مینگل نا علاقئی و قبائلی بدی دار شفیق مینگل ءِ اسیکہ وا بیدار کننگانے۔ داسہ شفیق مینگل پش وڑ ئٹ اختر مینگل نا اونا بنماسی ضلع خضدار ئٹ بدی داری کننگے، اونا برخلاف دپ درشانی و مچی ہڈ تننگ ءِ، ولے دا وار شفیق مینگل ءِ سلہہ بند دروشم ئٹ آخہ بلکن سیاسی دروشم ئٹ درستی راستی کرفنگانے و او جھالاوان عوامی پینل (جاپ) نا پن ئٹ باقاعدہ سیاسی کاریم تیٹ مشغول ءِ۔ یاتی مرے داڑان مالو، شفیق مینگل آ توتک نا اجتماعی قبر آتا و قوم پرست سیاسی باسک آتا کسفنگ و اغواء نا دوبہ لگانے۔

پُوسکنا حوالک

خضدار: زوراکی ئٹ بیگواہ کننگوک عبدالوہاب قلندرانی نا لمّہ کذیت کرے

اسہ سال ئس مُست پاکستانی لشکر نا دو آن زوراکی ئٹ بیگواہ کننگوک ورنا عبدالوہاب قلندرانی نا لمّہ کذیت...