بھارت ئٹ اِرا ٹرین نا پٹری آن دڑنگ نا سوب کم آن کم 200 بندغ مرگ ئنا گواچی و سد آ بندغ آک ٹپی مسونو۔ خُلیس ارے کہ دائسکان ہم ٹرین نا ڈبہ تیٹ کیہی ٹپی مسافرک گٹ ءُ۔
بھارتی ریاست اڑیسہ نا چیف سیکرٹری پردیپ جینا پارینے کہ کولکتہ آن کم و ود 230 کلو میٹر مُر جاندم دے کہی ٹی اِرا مسافر ٹرین تا ڈک لگنگ آن کم آن کم 200 بندغ مرگ ئنا گواچی و 900 ٹپی مسونو۔ مرگ ئنا گواچی و ٹپی مروک بندغ تا کچ ئنا بارو ئٹ احوال آک دائسکان بننگ ءُ۔ سی این این نا پوسکنا رپورٹ نا ردئٹ دا تدینی ٹی 207 بندغ مرگ ئنا گواچی و 900 آن زیات بندغ ٹپی مسونو۔
بھارت نا ریلوے کوالخواک اسہ بیان اسیٹ پاریر کہ تدینی ہموتم مونا بس ہراتم ہاوڑہ سوپر فاسٹ ایکسپریس پٹری دڑنگا و کورومنڈل ایکسپریس تون ڈک لگا۔
پریس ٹرسٹ آف انڈیا نیوز ایجنسی پارینے کہ پٹری آن دڑنگوک کورومنڈل ایکسپریس ریاست دے کہی بنگال نا علاقہ ہاوڑہ آن جاندمی ریاست تامل ناڈو نا بنجاہی شار چنئی آ ہننگ ئس۔
ریلوے منسٹری نا ترجمان امیتابھ شرما پاریسس کہ اسہ ٹرین نا 10 آن 12 ڈبہ پٹری آن دڑنگار و منہ پنوک بوگیک خڑک ئنا ٹریک آ تمار۔ و ایلو پارہ غان بروک اسہ پین مسافر ٹرین اس اوڑتون ڈک لگا و اونا ہم مُسہ ڈبہ پٹری آن دڑنگار۔
تدینی نا جاگہ غان رسینگوک عکس آتیٹ کمکار تے زندہ بچوک بندغ تے پٹنگ کن اسہ بھس مروک ٹرین ئسے آ لگنگ آ خننگ مریک۔ کوالخواک پاریر کہ تدینی آن گڈ کم و ود 400 بندغ ءِ اسپتال آتیا دننگا۔ اڑیسہ نا اسہ سرکاری اسپتال ئسے نا مونا سد آ ورناک دتر تننگ کن چر آتیٹ سلوک خننگار۔
اسہ خن خنوک شاہد اس رائٹرز ءِ پارے کہ ای او ہند آ ئسوٹ و اوڑے دتر، پِنوک بندغی ازبہ و بندغ تے کہنگ آ خناٹہ۔
چیف سیکرٹری جینا داڑان مالو پاریسس کہ سد آ بندغ تے تدینی آن خڑک ساڑی جتاء ہندی اسپتال آتیٹ دننگا و دا کہ 200 آن زیات ایمبولینس آک زہمی تے خڑک ئنا اسپتال آتیٹ سر کریسہ کریر۔
جہان ئٹ اسہ بست و بند نا ردئٹ کل آن بھلا ٹرین نیٹورک بھارت ئٹی ءِ۔ تیوہ بھارت ئٹ ہڑدے اسہ کروڑ بیست لکھ آن زیات بندغ 64 ہزار کلو میٹر ٹریک آ ہنوک 14,000 ٹرین آتیا سفر کیرہ۔
ٹرین نا رکھنگ ءِ جُوان جوڑ کننگ نا کوشست آتیان بیدس بھارت ئٹ ہر سال ریلوے تدینیک مونا بریرہ۔ اگست 1995 ئٹ پوسکنا دہلی آن خڑک اِرا ٹرین اسٹ ایلو ٹی ڈک لگاسر۔ بھارت نا تاریخ نا دا بھیم بش کروک ٹرین تدینی ٹی 358 بندغ مرگ ئنا گواچی مسوسر۔
بھاز انگا ٹرین تدینی تا دوبہ بندغی ردی یا سگنل نا مُتکنا ازباب آتیا خلنگک۔