وزارت سائنس و ٹیکنالوجی ٹی جرنلسٹ فاؤنڈیشن نا بست و بند نا کنڈ آن پلز آف پاکستان ایوارڈ 2023 نا مجلس اڈ تننگا۔
مجلس ئٹ سیاسی، چاگڑدی، صحافتی و ادب نا شعبہ آتون تعلقداری تخوک پنی آ شخصیت آک اوار مسر۔
دا وختا بنجائی صدر جرنلسٹ فاونڈیس ذوالفقار ملک، جنرل سیکرٹری رفاقت حسین، جنرل (ر) عبدالقیوم ملک و بنجائی وزیر سائنس وٹیکنالوجی آغا حسن بلوچ مجلس تون تینا خیال آتا درشانی کریر۔
آغا حسن بلوچ نا پاننگ ئس کہ پی ڈی ایم نا اوڑدہ حکومت پارلیمنٹ نا بھلُنی، قانود نا حکمرانی آ یخین تخک و ادارہ آتون اوار سلوکءِ۔ سیوتی حکومت کن کُل آن مُست پاکستان نا مفاد آکو، ہمو بندغ آک معاشرہ نا کُل آن خطرناک انگا بندغ کو ہرا ذاتی مفاد آتے ریاستنا مفاد آتیان بُڑز سرپند مریرہ و ذاتی مفاد آتیکن ریاست ءِ منتشر کننگ نا کوشست کیرہ۔
او پارے کہ چاگڑد ٹی اصلاح سازی و مظلوم نا توار ءِ تاغت تننگ ئٹی صحافتی برادری ملک ئٹی کلیدی کڑد ایسری ایتک۔ جمہوریت ناسوگوی کن صحافتی طبقہ تا خذمت آک قابل قدر ءُ۔ او پارے کہ مسکوہی حکومت میڈیا ءِ کنٹرول کننگ کن قانود سازی کرے ولے پی ڈیایم حکومت آزات صحافتی اقدار آ یخین تخک۔
آغا حسین پارے کہ معاشی رکھ و آزات صحافت دیمروی کیک، او وہ پرنٹ و الیکٹرانک میڈیا نا خواجہ آتیان خواست ءِ کہ صحافیتیکن اندنو معاشی پالیسی جوڑ کیر ہرافتیان صحافی تا مستقبل و اوفتا چُنا تا مستقبل رکھوک مرے۔
مجلس نا ایسر ئٹ بنجائی وزیر آغا حسن بلوچ الخدمت فاونڈیشن پاکستان، قائداعظم یونیورسٹی نا پروفیسر ڈاکٹر تصور حیات ومسکوہی ڈائریکٹر سپورٹس و کینٹ محمد توفیق ءِ اوفتا خذمت آتیکن پلرز آف پاکستان ایوارڈ 2023 نا شرف بشخا۔