وائس فار بلوچ مسنگ پرسنز نا پارہ غان عئید نا دے کوئٹہ پریس کلب نا مون آ اسے برانزی مچی اس اڈ تننگا۔
دا مچی ٹی بیگواہ غا سعید احمد نا لمہ ہیت و گپ کریسہ پارے اینو تیوی جہان ٹی عئید نا خوشیک ءُ ولے نن اینو نا دے ام تینا جغر ٹکر تیکن داڑے روڈ آتا زی آ اوفتا یلہ کننگ کن کوکار کننگ اُن۔ دا امرو اسلامی ملک ئسے کہ داڑے عئید آ ام ننے خوشی اف، عئید آک ام ننکن زار ءُ۔
زاکر مجید نا لمہ تینا خیال آتا درشانی کریسہ پارے کہ کنا مار ءِ دوانزدہ سال آن زیات ءِ کہ او پاکستانی ادارہ غاتا کیز ئٹی ءِ۔ اونا بیگواہی نا دے آن ہلیس اینو اسکان نن ہر وڑ نا جہد و کوشست کریسہ اُن، انصاف نا درغ آ نن تینا فریاد سر کرین ولے اوکان ابید ام زاکر مجید ءِ یلہ کننگ افس۔
او مونی پارے کہ کنا مار نا قصور اندادے کہ او بی ایس او نا وائس چیئرمین مسونے، بلوچ ورنا تے شعور تسونے یا اونا قصور اندادے کہ بلوچستان نا مڈی و ساحل آتا لُٹ و پل نا برخلاف جہد کرینے۔
ای اینو جہان نا غٹ تنظیم، انسانی حق آتا تنظیم آتیان خواست کیوہ کہ اوکنا مار نا یلہ کرفنگ کن ہر وڑ نا کوشست کیر۔او پارے اینو داڑے اخس کہ مار سلوکو کنکن دا کل زاکر مجید ءُ، او اخس زاکر ءِ خلوئے بیگواہ کرو ءِ انداخس پین زاکر ودی مروئے۔ اندن او تینا بلوچ آتیکن جہد کرور۔
بیگواہ غا جہانزیب نا لمہ، بی ایس او نا مسکوئی چیئرمین مہیم خان بلوچ، ریڈ ورکر فرنٹ نا کریم پرہار، نیشنل ڈیموکریٹک پارٹی نا آرگنائزر ایڈوکیٹ شاہ زیب بلوچ، بی ایس پجار نا چیئرمین زبیر بلوچ و ایلوفک ام دا برانزی مچی ٹی تینا خیال آتا درشانی کریر۔ و مُچی نا راہشونی ءِ وائس فار بلوچ مسنگ پرسنز نا ماما قدیر بلوچ کرے۔
اینو نا دے ئنا ردئٹ سندھ نا دارالحکومت کراچی ٹی ہم بلوچ و سندھی بیگواہ تا خاہوت آتا پارہ غان برانز کننگا۔ برانز کروک آک خواست کریر کہ اگہ اوفتا بندغ آک ڈودار ءُ گڑا اوفتے ملکی عدالت آتیٹ ہتنگہ دُن زوراکی تون بیگواہی نا ہچو ملک اس موْکل تفک۔
ایلو پارہ غان راجی حوالکاری میڈیا غا ہم پاکستان ئٹ زوراکی نا بیگواہی تا برخلاف کمپئین مننگے ہراٹی زند ئنا جتا بشخ آتیان تعلقدار مخلوق تینا خیال آتا درشانی کننگ ءُ۔
