چاگڑد، ادب، سیاست، صحافت: ڈاکٹر تاج رئیسانی تون گپ تران

الّمی خوانبو

رخصت اف – مرید بلوچ

مزاحمت زند ءِ ’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد...

بلوچ سلہہ بند تنظیم تا کروکا گڑاس فیصلہ تا جاچ __میرین بلوچ

جنگ اٹ ہچبر رحم مفک بلکہ جنگ ءِ نفسیاتی پڑا کٹوئی مریک جسمانی طاغت آن زیات نفسیاتی طاغت جنگ...

تاریخ نا پنہ غاک (چارمیکو بشخ) | خان خدائیداد خان – محبوب شاہ

تاریخ نا پنہ غاک (چارمیکو بشخ) خان خدائیداد خان نوشت: محبوب شاہ دی بلوچستان پوسٹ - براہوئی کالم 1896ء اٹی(No.7) و 1870ء...

چاگڑد، ادب، سیاست، صحافت: ڈاکٹر تاج رئیسانی تون گپ تران

دی بلوچستان پوسٹ

ڈاکٹر تاج رئیسانی براہوئی نا گچین ءُ نوشتوک ئسے، او بنماسی وڑٹ فکشن نوشتوک ئسے اونا تعلقداری کسہ تون ءِ۔ دا خاطرآن فکشن تون اوار خلقی کسہ غاک، براہوئی و بلوچی بولی تا تہذیبی تعلقداری تون ام اونا واخب داری ء۔ ڈاکٹر تاج رئیسانی ریٹائرمنٹ آن گڈ اینو پگہ نوشت و خوان پارہ غا عملداری تخک۔ براہوئی بولی ٹی افسانہ غاتا اولیکو کتاب “انجیر نا پھل” نا خالق ہم ڈاکٹر تاج رئیسانی ءِ، ہشتاد نا زمانہ ٹی او زیات ڈرامہ نویسی نا پارہ غا کاریم کرے و ٹیلی وژن کن او اردو آن بیدس براہوئی بولی ٹی ام ڈرامہ نوشتہ کرینے۔

ڈاکٹر تاج رئیسانی و ڈاکٹر منظور بلوچ نا نیامٹ بلوچ ادب، سیاست، چاگڑد و زند ئنا بشخ آتیا مروک مجلس ءِ دی بلوچستان پوسٹ “گپ و تران” نا دروشم اٹ شنگ کننگ ءِ:

منظور بلوچ: ہرا وڑ کہ ڈاکٹر تاج رئیسانی نا ظہور ناخواست ءِ، ہموہشتاد (80) نا ظہور آن گڈ انتئے اونا ظہور مفک؟ ہیت ایسر مس یا کسہ چُٹا؟
ڈاکٹر تاج رئیسانی: نالائقی ءِ، سستی ءِ، پین ہچو سوب اف۔ اسے ہیت اس یات تخس کہ ہرا چاگڑد نا کسہ ایسر مس توچاگڑد چُٹا یعنی ایسر مس۔

منظور بلوچ: تو ننا چاگڑد ایسر اف؟
ڈاکٹر تاج رئیسانی: نہ نہ بلکل نہ۔ ای داڑا اسل امنا کپرہ۔ ننا چاگڑد Exist کننگ ءِ۔ اسے وخت یات ءِ نے کہ نن توسنا تو مسہ بندغ آن زیات الون، داسہ ہراتم کہ سنگت آک بریرہ تو او جتا ءُ۔ ہمو منہ بندغ ئسر سال آتیان، پوسکن آ گرمجوشی اٹ بخیر کننگاکہ۔ بھلو خوشی اس مسکہ کہ اسے پوسکنو ورنا اس بسونے۔ داسہ ای اریوہ کہ داسہ دا سنگت آک بسونو، ہفتہ دئے دے آن پد گروپ اس بریک تو او اسُل جتا ءُ یعنی پین بندغ ءُ۔ دانا مطلب دادے کہ ہر کس تینا جاگہ غا کاریم کننگ ئٹی ءِ بیرہ احوالکاری نا ویل المّی ارے۔

منظور بلوچ: ہمے زمانہ اٹ ہم نن اندا ہیت ءِ کرینہ، ہمے وخت آ ہم احوالکاری communication نا گپ مسکہ، پاش ءِ اے وخت آ دا گڑاک الورہ ہراکہ داسہ بسونو تو اینو نا communication gap انتئے؟ درو نا انت ئس؟

ڈاکٹر تاج رئیسانی: ہمے وخت آ دا ذرائعیک الوسہ، غریبی زیات ئس، تو اسے ہمو خننگ نا خواستے اس ئس، ٹیکنالوجی بلکن اونا جاگہ ءِ ہلک ولے اونا خواست ءِ پورو کننگ کتو۔ اگہ ای نے داڑے خنیوہ تو داٹی اسے احساس اس ہم ارے ولے اندا ای نی اگہ ٹیلی فون آ ہیت کین تو ہمو احساس نا کمی مریک۔

منظور بلوچ: نن دا ہم خنینا کہ اے گم مروکا بندغ ءِ اندا ٹیکنالوجی پٹا ایس مطلب زمانہ اسیٹی بندغ پیشن نا ملک آ ہنا اودیم مس، ہمے بندغ ءِ پٹا ایس۔ ولے داسہ اسے  ویل اس دا مس کہ ننا نما ہرا ہل و تس اس ئس او انتئے داسہ اف؟
ڈاکٹر تاج رئیسانی: دا اسے چس کروک و بھاز بھلو سرحال ئسے، داڑا بائیدے کہ ہیت مرے کہ دا نیام اٹی انت انت نا کمبوتی بسونے۔ اونا بلکن اسے اقتصادی سوب اس مننگ کیک۔ سیاسی حالیت آک ہم مننگ کیرہ۔ چاگڑدی ردئٹ اٹ ہم ترجیحات آک مننگ کیرہ۔

منظور بلوچ: انت نن دا پاننگ کینہ کہ جاگہ اس ڈاکٹر تاج رئیسانی ہم قصوروار ءِ؟ انتئے تانکہ غلام نبی راہی اس نیوکلیس ئس۔ کنے یات بریک دنو بندغ اس الو کوئیٹہ ریڈیو آ بتوکہ۔ دنکہ نن مثال ایتنہ پنجابی فلم نا مولا جٹ یا سلطان راہی فوت کیک تو 98 فیصد پنجابی فلم انڈسٹری ایسر مریک۔
ڈاکٹر تاج رئیسانی: جہان، داڑاسکان اگہ کوہ ہمالیہ مرے بناء ٹی اسے ذرہ ئسے و پین اخس گڑا مچ مسر ہمو ذرہ نا دامون ایمون آن مچ مرسہ نیوکلیس مس۔ مَش اس مرے، دِیر اس مرے، اسے مرکز اس الّمی مریک۔ ہراتیکے ہمو مرکز ساڑی ءِ او ایسر مفسہ، جوڑ مرسہ کائیک۔ ہرا وخت کہ ہمو نیوکلیس ءِ پرغس کیس تو او اسٹ آن ارٹ مریک، اودے اسے نیوکلیئس اس مننگ اٹ بھاز بھلو وخت اس لگیک تو کنا خیال دادے کہ ہمے وخت آ اسے نیوکلیئس اس ئس تو مچ مننگ اٹ ئسر۔ اگہ ونڈ مس یا پنا تو نیوکلیئس ایسر مفک او ٹکر تیٹی یا ذرہ تیٹی چٹ ہلک۔ دا ہراڑے ہراڑے کہ داسہ اریر ہمے تیناوخت ءِ ہلنگو و اسے نیوکلیئس اس جوڑ مننگ ءِ ہراڑا اسے وجود اس مَش اس یا سمندر اس ہمو نا زی آ جوڑ مرے او وخت ہلیک۔ دا تو Evolution نا تینا اسے Process اسے۔ راہی صاحب نا ایمان سلامت اسے تینٹ مجلسی ءُ بندغ اس ئس۔ شار نا مرکز ٹی ئس، مرکز ہمو ہراکے میڈیا نا بھاز بھلو ذریعہ اس ئس۔ پاش ءِ ہمے وخت آ اخبار تیان زیات ریڈیو ئسک تو ہمو مرکز اٹ موجود ئسک۔

منظور بلوچ: داسہ ہم ہمو بندغ آک، ہمو مرکز، ہمو الفت، ہمو ریڈیو  کُل گڑاک اریر ولے راہی آن پد انتئے ویران مس؟
ڈاکٹر تاج رئیسانی: دادے نالائقی پاس، کم علمی پاس، کم عملی پاس بنماسی سوب اندادے ولے اوڑتون اوار اوار ایلو Factor آک ہم اریر، اوتیا خوڑ تی اٹ اُروئی مریک۔ داڑے اسے پین سوج اس ودی مریک یعنی ای ہم کوئٹہ ٹی تُوسُونٹ نی ہم انڈارے تُوسُونس راہی صاحب ہم انداڑے توسونے، نن تو اسے ایلو ءِ خنینہ ولے ننا خیال دادے کہ اندادے مرکز، داکان پیشن اخس مرکز ساڑی ءُ، اوڑا دیر دیر اُوننگ ءُ، اوفتیان ای ہم سہی افٹ نی ہم تو لہٰذا ہیت ءِ ہمو بندغ کے ہراکے دا مچا گڑا تیا پٹ و پول کرینے معلوم کرینے۔ او دا پاننگ کیک کہ ای دا شار دا علاقہ غا ہناٹ ہچ خنتوٹ یا خناٹ، اگہ خنا ہم تو بھاز بھلو معلومدارئسے۔ اگہ خنتو ہم تو بھاز بھلو سوج اس ودی مریک۔ ننے ٹی کس ہم اف ہرانا معلومداری دا حساب آ پورو مرے، دعویٰ اس کننگ کے۔ ای اندا سوب آن کوششست کننگ اُٹ کہ دعویٰ غان تینے مُر تخیو۔ کنا جندے دا معلومداری اٹ اف کہ نوشکے ٹی انت مننگ ءِ، قلات اٹ انت مننگ ءِ، خضدار اٹ انت مننگ ءِ، مطلب تیوی علاقہ ٹی اگہ اندنو سنگت اس مرے کہ دا کُل جاگہ تے Visit کرینے داتے اُرانے، داتا تخلیق آن واقف ءِ، او گڑا اسے نقطہ نظر اس جوڑ کننگ کیک۔

منظور بلوچ: ننا ہراڑے حوال مسونے، چنکو بھلو پروگرام اس مسونے نن ہنانُن، ولے ننا ہرا بھلا بندغ مریک نیوکلیئس مریک او تو بھاز کم مریک، کُل تو مفسہ، ہراکے کُل ئٹی اسے Motivation اس ودی کیک۔ دنو شخصیت انتئے ودی مننگ اف؟ ہشتاد نا کرن اٹ نن خنان ہرا افسانہ ءِ، ڈرامہ ءِ تو اوکان پد ہمو معیار ہم افک، مونی ہننگ نا جاگہ غا شیف بننگ ئٹی ءِ۔
ڈاکٹر تاج رئیسانی: کسہ مرے یا شاعری مرے، ساز زیمل مرے یا پینٹنگ مرے او مجلس نا گڑاکو، تنیائی نا افس۔ تو ہمو تولنگ ہمو مجلس آک افس مطلب شاعری اگہ مننگ ءِ تو حوالکاری مننگ اف۔ افسانہ نا تو کنا تینا ذاتی خیال دادے کہ افسانہ بیدس دوننگا مجلس آن ایسر مریک۔ افسانہ ٹی تانکہ ہمو مجلس سوسائٹی متنے او مننگ کپک۔ تو داسہ داڑے نن اُرن ہمو مجلس آک افس۔ پیشن نا شار تیٹی انت مننگ ءِ اونا ننے سما اف، تو دا کُل آ کاریم کروئی مریک، دارے ای نی پین دا توسونن بیرہ کوئٹہ نا حالیت ءِ چانہ فیصلہ تننگ کپنہ، فیصلہ ہمو وخت تننگ کینہ کہ ہر علاقہ نا حالیت معلوم مرے، فیصلہ ہم دا تننگ مفک کہ دا جوان ءِ دا خراب ءِ بلکن فیصلہ دا اتک کہ مونا انت کروئی ءِ۔  او تنقیدی ءُ جائزہ اس ہلینگ کیک کہ گڑا تخلیق مننگ ءِ۔ معیار نا ارے یا اف۔ دا راجی خواست آتے پورو کننگ کیک زبان نا ضرورت آتے پورو کننگ ءِ یا اف۔

منظور بلوچ: نوشتوک کہ راجی خواست یعنی ضرورت الّمی ءِ؟
ڈاکٹر تاج رئیسانی: او اگہ دادے الّمی سرپد مفک کہ راجی خواست ئسے تو اودے انت حق ءِ کہ کنا وخت ءِ ضائع کے۔

منظور بلوچ: اوتو تینا Expression یعنی ہیت آتا درشانی ءِ کننگ ئٹی ءِ؟
ڈاکٹر تاج رئیسانی: تینا درشانی ءِ کننگ ءِ کنے متاثر کننگ اف تو کنا ہم Response اوڑکن ہننگ اف، جوان یا گندہ  response  ئس تو مریک۔ داڑان بیدس اونا تینا تخلیق ایسر مرسہ کائک۔ جہان نا تخلیق کار آتا اندا رائے ءِ کہ فنکار تینا راجی خواست آن جتا مننگ کپک۔

منظور بلوچ: داڑے نن ہرا راجی خواست ءِ خنینہ اودے نن نعرہ نا دروشم اٹ خنینہ، جذباتی وڑ اٹ خنینہ۔
ڈاکٹر تاج رئیسانی: دا تہذیب نا کمی ءِ، دنکہ اسے چنا اس دیہات ئٹی ودی مریک ولے اودے اسے اندونو ماحول اس ملیک کہ اونا تعلیم و تربیت اونا تہذیب اونا اسےرُدوم اس مریک۔ او مہذب ءُ بندغ اس پاننگک۔ اسے چنا اس ہمو دیہات ئٹی ءِ اودے دا ماحول ملپک یا او Adopt کپک تو اودے نی مہذب سرکل اٹ پاننگ کپیسہ حالانکہ ہڑتوماک اسے جاگہ ٹی ودی مسونو۔ تخلیق یا ادب ہم اندن ءِ اگہ اونا ہمو احساسات آتا تربیت یا تہذیب نا تربیت اصول آتا مطابق مننگ ئٹی ءِ تو جُوان ءِ، نعرہ ہم اسے درشانی ئسے ولے نعرہ ءِ ہم شاہستہ مروئی ءِ۔ تنظیم ہم اسے Expression ئسے اودے ہم شاہستہ مروئی ءِ۔ ہراڑے نعرہ سے اونا ہم مسخت سما مروئی ءِ کہ ای دا نعرہ ءِ انتئے خلنگ اُٹ، اونا مسخت اگہ پاش اف تو بس او اسے شروشور ئسے داٹی ای ہم بے سُہب مسوٹ کہ راجی خواست نا اسے دروشم اس جوڑ کننگ کتوٹ کہ ہرادے بروکا شناخت کریکہ کہ کنا شناخت دادے۔

منظور بلوچ: داڑے ویل دادے کہ فرٖض کہ ڈاکٹر تاج رئیسانی آ ہیت کروئی ءِ تو ہیت کننگ سخت ءِ۔ داڑے نی مہذب نا ہیت ءِ کننگ اُس نوشتوک نا جند تہذیب آن خالی ءِ، Phd کروکا Argument یعنی دلیل آن زیات قبیلہ پرستی کیک۔
ڈاکٹر تاج رئیسانی: فن نا کاریم اندادے کہ انسانی جوزہ غاتے، احساسات یا درشانی نا تربیت ءِ کے۔ آرٹ یا فن شاہستگی ہتیک ولدا ہیل ایتک ولدا انسان نا شناخت جوڑ مریک۔ نئے تو جنگل ئٹی مریک اسے ایل ءِ خلیک، ہرکس کے طاقتور ءِ او بچک ہراکہ نزورءِ او ہنا، جنگل نا قانود ءِ۔

منظور بلوچ: بحیثیت ءِ نن ٹیچر اُرن ایم اے ٹی نن خوانفینہ، سد نمبر نا سوج ئسے نغد کاری نا، ولے نغد کاری تینا جاگہ غا اسے جائزہ اس مریک کہ افسانہ دادے پارہ، ناول دادے پارہ، داڑے ننا سنیئریٹی نا کچ عمر نا رد ئٹی ءِ، داڑے ننا کچ کننگ کاریم نا جند انتئے اف؟
ڈاکٹر تاج رئیسانی: داٹی سیدھا سیدھا اِرا گڑا ءُ، ای اگہ افسانہ لکھیوہ تو بس دا اف کہ ای افسانہ چاوہ، بیرہ دا گڑاتے کہ ای گڑاس چاوہ صرف communicate کیوہ تا، او گڑا ءِ پن اس تننگ نقاد نا کاریم ءِ۔ داڑے ویل دادے کہ اگہ ای شاعر ئسے اُٹ تو ای سرپد مریوہ نغد کاری ہم کنا حق ءِ، اگہ ای افسانہ نگار ئسے اُٹ تو ای سرپد مریوہ کہ کنے آن بھلو نقاد اف، حالانکہ دا رد ءِ۔ نوشتوک، تخلیق کروک آ تینا کوشست ءِ کیک کائیک، ایلو اودے انت ہند، اخس مرتبہ تروئی ءِ او نقاد نا کاریم ءِ۔ اگہ کنے اختلاف ارے ہم تو او اِرا گڑا ءُ، اسٹ تو دادے کہ مثال ای تینا افسانہ ٹی دا بیان کننگ نا کوشست کننگ اُٹ کہ دِیر اس تخوکے، نقاد پائک دِیر نا ذکر اف۔ تو داٹی بنماسی خامی نوشتوک نا ءِ داخاطر آن اگہ اونا Description انداخہ بِسُن ءِ تو نقاد نا ملی ہڑسینگتن ءِ کہ اسے گڑاس پک مننگ ءِ او پائک آخہ۔ ارٹمیکو دادے اگہ بدنیتی نا سوب آن پائک تو اسے بندغ اس اف بیست بندغ ءُ، اسے نقاد پائک دِیر اس اف تو او تینٹ ٹارگٹ مریک کائک کسے پاننگ نا خواست اف۔ داڑے داسہ کنا تینا ذاتی خیال دادے کہ نقاد نا قصور اف تخلیق کار نا ءِ کہ اونا تخلیق اٹ ہمو پیمانہ، ہمو جامعیت پورو مننگ نا قوت اف، نقاد ءِ ہم رد رماغک، رد شاغک ۔

منظور بلوچ: اختلاف Discussion تو مریسہ کائک ہرا گڑا غا لیکن داڑے تو نن دا گنجائش ءِ الیتانُن، مطلب بھاز جاگہ اندن تشریح گڑاتے کننگانو شاید تخلیق کار نا ذہن اٹ اف۔
ڈاکٹر تاج رئیسانی: آؤ تو اسے گڑاس میدان آ بس تو او گڑا نا سلتو، ہرا وخت ای سمجھیوہ کہ دا کنا بندغ آکو تو ای داتا پارہ غان ہیت کننگ نا حق تخیوہ اور ای ہیت کیوہ، تو اوتا ہم دا حق ئے کہ او Claim کیر کہ نی ننا ہیت ءِ مکمل سر کریس صحیح سر کریس، تینے آن تو خرابی کتاوس، اگہ نی محسوس کریس کہ نا حق اٹ ای تینے آن گڑاس شاغاٹ تو نے حق ارے نی پاش کیس تے کہ ای دا ہیت ئے کتوسوٹ دادے کریٹ۔

منظور بلوچ: شروع  ٹی نم نوشتہ کریریے نما احساسات آک انت اسُر، ولدا چھاپ مننگ آن پد نم انت محسوس کریرے؟ سوسائٹی نا کنڈان Reaction نا خوف ئس؟
ڈاکٹر تاج رئیسانی: زیادہ تر گڑاک و سوچ آک ننا تینا جوڑ کروکو کہ ای دا گڑائے کریٹ دا مروئے اے مروئے، ہچ متو۔اگہ Reaction ہم مس تو ہم متعلقہ بندغ آک اسور۔ قوم نا عام بندغ طریقہ ٹی React کتو، اوتو Apreciate کریتے۔

منظور بلوچ: وختس اندونو افسانہ ئس ہم نوشتہ کریس ہرانا سوچاس کہ دادے چھاپ کپرہ؟
ڈاکٹر تاج رئیسانی: نہ نہ بلکن نن تو کوشش کرین کہ کس پارے کہ یار اوریس دا مچے خاخری او گڑا سے تو نن اوران کہ دا ضرور برے۔

منظور بلوچ: اولیکو افسانہ نما یات بریک کہ انت محسوسات آک ئسر یا اولیکو وار چھاپ مس تو نم انت محسوس کریرے؟
ڈاکٹر تاج رئیسانی: بناء ٹی اردو ٹی نوشتہ کرینہ، اوڑان مست گڑاس نن تھیٹر نا ڈرامہ کریسُن۔ پدا ریڈیو آ۔ ریڈیو نا وخت آ ای نویں ٹی اسوٹ کہ ریڈیو آ ڈرامہ مقابلہ مس، تو اوٹی نوشتہ کریٹ، کنا ڈرامہ نا پروڈیوسر حفیظ چودھری ئس۔ حفیظ چودھری ہنا ظفر مرزا غا پاریتے کہ نم پارے براہوئی ٹی لکھوک ءُ اف دا اردو ٹی نوشتہ کننگ ءِ ولدا گڑا ظفر مرزا کنے توار کرے۔ ظفر مرزا تو راہی صاحب ہم تولوک ئس، او کنا دوٹی ہلک تینا کمرہ ٹی درے کنے، تو او کنے convince کرے کہ براہوئی ٹی نوشتہ کہ، تو ای نہ کننگ کتوٹ تے پاریٹ کوشست کیوہ۔ ولدا گڑا براہوئی ٹی نوشت ءِ بناء کریٹ۔

منظور بلوچ: کوئٹہ نا تھیٹر ہرا وخت اسکان زندہ ئس؟
ڈاکٹر تاج رئیسانی: دا کنے یات ءِ کہ ہرا وخت آ ریلوے انسٹیٹوٹ یا کونسل اکیڈمی ٹی ڈرامہ نا پڑو مسکہ تو جواننگا بندغ آک کن کوناتے منت کریرہ کہ اِرا کارڈ ہتیس چناتے رائی کروئی ءِ۔ مخلوق اندا ڈرامہ سرکل والاتے پٹاکہ کہ ہرا اسٹ گروپ ڈرامہ کننگ ءِ۔

منظور بلوچ: او دیر ئسر اندا تھیٹر ءِ زندہ تخاسر، اوتیان گڑاس بچار یا گمنام مسر تاریخ ئٹی؟
ڈاکٹر تاج رئیسانی: نواز صاحب ئسکہ او کذیت کرے، آفتاب خواجہ ئسک ہرادے اینو نا ورنا درست کپک، راشد علی چھاز گچین ءُ آرٹسٹ اس ئسکہ، قاضی ئسکہ، اسے پین اس ئس رئیس پن تے او ہندوستانی اس ئس، دا ہمو گروپ ئس Partition آن پد بسوسُر۔ لوکل تیٹی کُل آن مست ای و قادر ئسن، قادر چنکی سیان اسے جوانو آرٹسٹ اس ئس۔

منظور بلوچ: آرٹ کونسل نا نما زمانہ ٹی انت رول ئس؟
ڈاکٹر تاج رئیسانی: کنے یات ءِ اولیکو ڈرامہ فیسٹول ءِ آرٹ کونسل کریفے، ہراٹی کنے داد ملا۔ ایلو ہر ادارہ نا تینا اِرا سال اٹ اسپورٹس ویک اس ئس۔

منظور بلوچ: نما استاد دیر ئس ہراکے نمے ادب اٹ ہیل تس و لائخ کرے؟
ڈاکٹر تاج رئیسانی: کنا تو استاد کس الو، اندا سنگت آک ئسر، بزم ادب اسکول اٹ مسکہ اسپیشل اسکول اٹ تو اوٹی اسے اِرا چنا ئسر، اسے آغا ناصر ئس او کنا کلاس فیلو ئس۔ او اکثر ہناکہ، او کنے پارے کان ریڈیو آ، تو نن ہنانہ ریڈیو آ۔

منظور بلوچ: نم کسہ نا کنڈ آ امر بسورے؟ دیر آن متاثر مسورے؟
ڈاکٹر تاج رئیسانی: او تو پاش ءِ کنا شونق ئس، ہمے وخت آ بس کتاب ئس یا گوازی کرینہ، فٹبال یا غلیل دوٹی ئس۔ نن اکثر لائبریری آ ہنانہ ہموڑے کتاب خوانانہ۔ داتو اسکول نا باقاعدہ اسے ہفتہ ٹی اسے دے لازمی لائبریری آ ہنوئی ئس۔ ای و ڈاکٹر غلام حیدر ہنانہ۔

منظور بلوچ: ننا زمانہ ٹی چنا تا ادب اخبار، جاسوسی والا کسہ غاک بھاز ئسر، اینو دا گڑا خننگپک؟ اسٹ تو داڑے دا المیہ مس کہ چناتا نوشتوک یا جاسوسی ءِ نن ادب نا درجہ تیتون، ابن صفی آن پد اشتیاق احمد اوتے ہم ہمو ہند رسینگتو۔
ڈاکٹر تاج رئیسانی: ہمے زمانہ ٹی ہراکے مٹ و بدل مسورہ تو اوتا یونیورسٹیک اسے ہند ئسے آ ئسر، ننا یونیورسٹی ءِ تینٹ سما اف کہ زَنک ءِ ہرا Direction ءِ تروئی ءِ، کُل آن بھلا ویل دادے۔ اوتا یونیورسٹیک باقاعدہ اسے Direction اسینا تعین ءِ کریرہ کہ راج ءِ ہرا کنڈ آ دروئی ءِ۔

منظور بلوچ: بولی اٹ، بولی نا کاریم اٹ ہتنگ ئٹ انشائیہ پردازی نا بھلو کمال ئسے۔ ادب اٹ ہم کُل آن بھلا عنصر جمالیات نا ءِ۔ براہوئی ٹی دا گڑا داسکان انتئے اف؟
ڈاکٹر تاج رئیسانی: ہراکے براہوئی بولی ءِ چارہ او انشائیہ پرداز افس و ہراکے انشائیہ پرداز ءُ او براہوئی بولی ءِ تپسہ۔ دا خاطر آن کہ ای مست نوشتہ کریٹہ تو بھاز کم براہوئی نا لوز آتے پٹاٹہ یا غور کریٹہ کہ داڑے ہرا لوز تخنگ بہتر ءِ۔ پیر محمد زبیرانی نا ایمان سلامت انجیر نا پھل ءِ خوانہ تو اونا تبصرہ کنے کُل آن زیات چس کروک لگا، او پارے نوشتہ کرینس گچین ولے براہوئی ءِ خف نا جاگہ غا بامس ءِ تخانس، بامس نا جاگہ غا خف ءِ تخانس۔ نی لوز آتے صحیح انتئے تخپیسہ۔ واقعی کنا اندا ئس کہ تینا لوز مرے۔ اوکان پد براہوئی نا لوز آتیا مچے پٹ و پول کریٹ۔ ای دا خاصیت ءِ عربی ٹی خناٹ یعنی نی لوز آتے تخیسہ ان او ردم اٹ بریرہ۔ اگہ براہوئی نا تینا لوز آک کہ مس اٹی تمانو اوتے تخس ہیت اس کیس اونا پورو جملہ ردم اٹ بریک۔ نن اوڑان واقف افن، نن تو ہرا لوز آکو 80% تو براہوئی نا افس۔

منظور بلوچ: اسے اسے پین ویل اس مونا بسونے، so-called لوز جوڑ کننگک۔
ڈاکٹر تاج رئیسانی: کنا خیال پائک۔ دا قاعد و ضوابط نا تحت مریک۔ اصطلاحات سازی اسے چنکو کتاب اسے اوٹی اصول آک لکھوک ءُ۔ ہمو اصول آتا ردئٹ پوسکنو لوز جوڑ مرے۔ تیوی جہان نا اہل زبان یا زبان نا استاد آک پوسکنو اصطلاح جوڑ کیرہ ولے اونا گڑاس قواعد و ضوابط تخانو کہ دا اصول نا مطابق پوسکنو لوز جوڑ مریک۔ ارٹمیکو گڑا دادے کہ عوام ارفک تا یا آخہ۔

منظور بلوچ: سمیریک ہرانگ ہنار؟ اوکان پد ہرا زبانک بسور اوفتیان عربی و پین مختلف زنانک پیش تمار، تو سمیری نا ڈس متو؟
ڈاکٹر تاج رئیسانی: عراق آن مست عراق نا پن ئس باب رو، سندھ نا پن ئس زی بیرو۔ تو ای دانا معنی ءِ بھاز پٹاٹ، اسے جاگہ اس خواناٹ باب رو نا مطلب ءِ ارا دریا، دجلہ و فرات، زی بیرو نا مطلب ءِ زی آ وہوکا دریا۔ اسے دے ای خضدار اٹ تولوک ئسوٹ رسول بخش صاحب نا علاقہ وہرو۔ تو ای وہرو نا مطلب ءِ اریفیٹ او پارے دیر کہ زی آ وہینگ ٹی ءِ اودے وہرو یا ویر پارہ۔ وہرو مطلب وہو کا دِیر۔ بنماسی براہوئی جتا مس تو دین نا پن آ جتا مس، ہرا دیو تا اس کہ پوجا کریرہ اونا پن براہوئی ئس۔

منظور بلوچ: دا وخت آ ہرا نوشت و Creation نا خواست ءِ؟ دا وخت آ ننا ورناک بریرہ اسے شونق اس ارے تا تو ہرا وڑ اٹ دا شوق مونا بریک؟ نن تینا تدوک وخٹ ءِ اُست آن دننگ اُن، پٹ و پول یا خواننگ نا حوالہ اٹ داڑکن انت وڑ اس مننگ کیک؟
ڈاکٹر تاج رئیسانی: اصل ویل دادے کہ اگہ ای داسہ شعر اس نوشتہ کریٹ تو داسہ بریر کنے آ شعر ءِ کنا ہم بنیر کنے واہ واہ ہم کیر۔ تخلیق بس اندا حد اسکان بریک۔ پاش ءِ اگہ ای تخلیق اس کیوہ تو کنا اسے خواست اس مریک کہ ہراتے ای تخلیق کرینوٹ ہمو تسکان سر مریو۔ او جتا میڈیا ءُ، اوتے جوڑ کننگ ہم ننا کاریم ءِ، چائے رسالہ نا دروشم اٹ مرے، اخبار مرے، ٹی وی مرے، مجلس آک مریر، تھیٹر مرے، اوتے ننے کروئی ءِ۔

منظور بلوچ: اینو نا ڈرامہ ءِ امر خنیرے؟ اے وخت نا و اینو نا ڈرامہ ٹی انت فرق ءِ؟
ڈاکٹر تاج رئیسانی: گڑاک کمرشلائزڈ مسونو، بازاری گڑاک جوڑ مسونو۔ ہرا گڑا بازار اٹ سودا مریک او ہمو گڑا ءِ خوارہ۔ بازاری گڑا دادے کہ پائیدار مفک، بازار اٹ ہر کمپنی تینا گڑا ءِ ہتیک، اسے وار دونو Product اس تفک نے کہ نا زند ٹی بس ہمو Product مرے، دُن اونا فیکٹری تو بند مریک، اوتو پاش ءِ ہمو خرابی تے تخک اوٹی کہ وار وار نی اودے خرید کیس یا Model ءِ بدل کیک یا رنگ ءِ یا Technology ٹی تے چنکو بھلو بدلی ہتیک تانکہ نی مجبور مریس اونا گڑا ءِے خرید کریسہ کیس۔ ڈرامہ تون ہم اندن مسونے۔

منظور بلوچ: اسے تو انگریز نا زمانہ ئس، انگریز تو داخس چکار تختوکہ، ولدا بناء نا پاکستان نا زمانہ ئس، زیات زیات گرفتار کننگ ئس، داسہ تو ہرا اسٹ ہیت کرے فارغ کیرہ تے، صباء صاحب ننا مون ئٹی ءِ، دانا اثر ءِ نم امر اوننگ اُرے؟ چاگڑد ئسے نا زبان بند مریک؟
ڈاکٹر تاج رئیسانی: اگہ کس دا سرپد مریک کہ زبان بند کننگ آن ویل ایسر مریک تو کنا خیال او رد ءِ۔ او تینکن کسر کشک، اگہ ہیت مننگ ءِ تو کسر ءِ اسے رخ اس تننگ کیسہ ولے اگہ او اسل جتا کرے تینے توس گڑا اونا کسر کشنگ خودرو طریقہ ٹی مرو، او تباہی آ ہم دننگ کیک تمام گڑاتے غرق ہم کننگ کیک۔ ولے اگہ اسے گڑاس Controlled ءِ۔ نے سما ءِ مخلوق انت خوائک، ہرا حد اسکان اوتا خواست آک پورو مننگ کیرہ، ہرا حد اسکان اوڑتو ہیت مننگ کیک دا ہیت کننگ نا وڑ ڈولءِ برحال چاگڑد ٹی تخوئی مریک۔ زوراکی آن نہ چاگڑد ایسر مسونے نا ترقی کرینے۔

منظور بلوچ: اے وخت نا دانشور آک کہ ننے آن خواننگ نا حوالہ اٹ تاریخ نا حوالہ اٹ مونی ئسر، اے کہ دا چاگڑد ٹی ایڈجسٹ کتوس، پاش ءِ کہ دانشور مونا بریک اودے پوہ مننگ کن زمانہ اس لگک، داٹی نن رسول بخش رئیسانی ءِ اُرن، ای تینٹ گواہ اٹ محفل اسیٹی مخلوق مچ ئس، عارف جان بریک اِرا باڈی گارڈ اوڑتون، وزیر اس بریک مخلوق مچ اوڑا، رسول بخش صاحب اسے کنڈ آ تولوک ءِ، کس اوڑتون حال احوال ہم کننگ کن تیار اف، کنا دا خیال ءِ کہ نن داسکان رسول بخش رئیسانی کونو بندغ جوڑ کتانن ولے نن اوڑان ہم بے پام کرینن تینے، اونا مقابلہ غا اسے میر، وزیر ئسے چانہ ولے دادے ہلانن۔
ڈاکٹر تاج رئیسانی: داڑے نا دانشور درشان کننگ کتنے کہ رول ماڈل انت ءِ پارہ۔ اگہ نا دانشور کہانی کار یا افسانہ نگار ءِ، اونا سرحال میر صاحب ئسے، زند اٹ تے چار باڈی گارڈ ءُ، گاڑی ءِ دا گڑاتے نشان ایتک تو چاگڑد ہمونگ کائک، نا دانشور یا نوشتہ کار اودے شیف خلنگ ءِ، کلرک، استاد ئسے یا ڈاکٹر ئسے یا نرس ئسے ہیرو یا ہیروئن جوڑ کننگ ءِ تو گڑا چاگڑد بدل مریک۔ ای پاوہ کہ نن ادارہ غاک و ادارہ ٹی نن ادب نا ہیت ءِ کننگ ان، ادب نا زی آ کُل آن بھلا ادارہ یونیورسٹی ءِ تو یونیوسٹی دا گڑاتے خوانفک کہ ہیرو انت اس مریک، ہرا بندغ ہیرو مننگ کیک۔

پُوسکنا حوالک

دے کہی بلوچستان ئٹ نوشتکار ساگر گوادری نا خوْن

دے ٹکی بلوچستان نا ہندی بندغ ئسینا جوْن دے کہی بلوچستان نا ساحلی شار آن خننگانے۔ حوال تا رد ئٹ...

بلوچستان ئٹ مُد بارن مرو – محکمہ مد

حوال تا رد ئٹ بلوچستان نا بھاز آ ضلع آتیٹ مُد بارن مرو، ژوب، زیارت کوئٹہ لورالائی ٹی مچے پِر ئنا ہم گمان ءِ۔ گیشتر...

سوڈان نا وزیراعظم و وزیر آک جوائنٹ ملٹری فورسز نا پارہ غان دزگیر

سوڈان نا حوال تروکا وزارت نا رد ئٹ جوائنٹ ملٹری فورسز آک وزیراعظم عبداللہ حمدوک و ایلو وزیر آتے دزگیر کرے۔ عرب نیوز نا رد...

پاکستان: کورونا آن پین 18 بندغ مرگ نا گواچی، اسہ ہزار 615 ناجوڑی نا حالیت خلیس ٹی

حوال تا رد ئٹ کورونا آن کہوک آتا لڑ برجاہ ءِ، تدوکا بیست و چار گھنٹہ نا نیام ئٹی تیوہ آ پاکستان ئٹ پین...

بیلہ: کے ای کے نا بیٹ زر آتا تفرنگ آ واٹر بور نا بجلی بند، شار ئٹی دیر ئنا نیستی

حوال تا رد ئٹ  کے ای کے نا بیٹ زر آتا تفرنگ آ پی ایچ ای نا جملہ واٹر بور نا بجلی نا کنکشنز...