بی ایس او نا پوسکن گچین مروک چیئرمین ابرم بلوچ تون گپ تران

الّمی خوانبو

رخصت اف – مرید بلوچ

مزاحمت زند ءِ ’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد...

بلوچ سلہہ بند تنظیم تا کروکا گڑاس فیصلہ تا جاچ __میرین بلوچ

جنگ اٹ ہچبر رحم مفک بلکہ جنگ ءِ نفسیاتی پڑا کٹوئی مریک جسمانی طاغت آن زیات نفسیاتی طاغت جنگ...

تاریخ نا پنہ غاک (چارمیکو بشخ) | خان خدائیداد خان – محبوب شاہ

تاریخ نا پنہ غاک (چارمیکو بشخ) خان خدائیداد خان نوشت: محبوب شاہ دی بلوچستان پوسٹ - براہوئی کالم 1896ء اٹی(No.7) و 1870ء...

بلوچ اسٹوڈنٹس آرگنائزیشن، تاریخ، مسخت، کونسل سیشن

پوسکن گچین مروک چیئرمین ابرم بلوچ تون گپ تران

بی ایس او انت ئسے؟

بلوچستان نا سیاست ئٹ بلوچ اسٹوڈنٹس آرگنائزیشن نا کڑد ساندہ المی مسونے۔ دا گل نا بنماس اولیکو وار بلوچ اسٹوڈنٹس ایجوکیشنل آرگنائزیشن نا پن ئٹ 1962 ئٹ کراچی اٹ تخنگا۔ ہرانا بنماسی مسخت آتیٹ بلوچ خوانندہ تے اسہ ہند آ کریسہ اوفتیٹ راجی و سیاسی شعور ودی کننگ و اوفتا حق آتیکن جہد کننگ ئس۔ دانا پن ئٹ لوز “ایجوکیشنل” نا ودکی نا سوب ایوبی آمریت پاننگک، انتیکہ او وخت آ خوانندہ سیاست آ رکھ خلوک ئس۔ 1962 ئٹ گل نا اولیکو چیئرمین چنگیز عالیانی گچین مسوسس۔

بیست و شش نومبر 1967 ئٹ گل نا پن آن لوز ایجوکیشنل ءِ ایسر کریسہ باقاعدہ وڑئٹ بلوچ اسٹوڈنٹس آرگنائزیشن تخنگا و اولیکو کونسل سیشن ہڈ تننگا۔ کونسل سیشن ئٹ ڈاکٹر عبدالحئی بلوچ بی ایس او نا اولیکو چیئرمین اندن بیزن بلوچ اولیکو سیکرٹری جنرل گچین مسر۔

بی ایس او نا تاریخ ہراڑے جدوجہد، ندر مننگ و کیز بند آتیان پُر ءِ، ہموڑے بی ایس او ئٹ تین پتینی نا اختلاف نا تاریخ ہم ہموخس مرغن و مُتکن ءِ۔ دا اختلاف آتا بناء بی ایس او نا اولیکو کونسل سیشن آن مسوسر۔ ڈاکٹر حئی و ہم کوپہ غاک تے پوسکن ٹہینگوک سیوت نیب (نیشنل عوامی پارٹی) تون ہمدردی تخارہ، و مسکوئی سیکرٹری جنرل عبدالرحیم ظفر، امان اللہ گچکی ایلوفک پیپلز پارٹی تون ہمدردی تخارہ۔ ہرانا سوب اوفک بی ایس او (اینٹی سردار) نا پن ئٹ بی ایس او نا جتا کڑدہ اس ٹہیفیر و انداکان بی ایس او ئٹ بشخ و ونڈ نا دود نا بناء مس۔

سنہ 1972 اسکان بی اسی او (اینٹی سردار) آ پیپلز پارٹی نا زیم آک ایسر مریرہ، او پوسکنا کونسل سیشن ءِ ہڈ ایترہ، تاج بلوچ چیئرمین گچین مریک۔ ایلو پارہ غا بی ایس او (عوامی) اُردو کالج کراچی ئٹ کونسل سیشن ہڈ ایتک، ہراڑے اینو نا بلوچ راجی تحریک نا بڑز پن بندغ و تدوکا خوانندہ راہشون عبدالنبی بنگلزئی چیئرمین گچین مریک۔

سنہ 1974 ئٹ بی ایس او نا دا ہڑتوم آ کُڑدہ غاک ہیت گپ آن گڈ تینا اختلاف تے ایسر کریسہ اواری نا فیصلہ ءِ کیرہ و اوار کونسل سیشن کیرہ، ہراٹی ایوب بلوچ چیئرمین و یاسین بلوچ سیکرٹری جنرل گچین مریرہ۔

سنہ 1986 اسکان بی ایس اسہ تنظیم ئسے نا دروشم ئٹ مریک، ولے 1986 نا کونسل سیشن آن گڈ ہراڑے یاسین بلوچ چیئرمین گیچن مریک، بی ایس او ئٹ اسیکہ وا اختلاف ودی مننگ بناء کیک و ڈاکٹر کہور خان 1987 ئٹ تینا جتا کُڑدہ بی ایس او سہب نا پن ئٹ ٹہیفک۔

بی ایس او نا تاریک ئٹ نود نا دہ یک اسہ تہار ءُ دہ یک ئسے نا وڑئٹ یات کننگک، ہرانا وختا کڑدہ بندی، اسٹ ایلو تون چک تاڑ، فروعی سیاست زیات مس و بھازا کُڑدہ غاک ٹہیفنگار و پنار۔

بی ایس او آزاد نا بناء:
بی ایس او نا تاریخ ئٹ اسہ بھلو بدلی اس ہموتم مس ہراتم فروری 2002 ئٹ بی ایس او (محراب) کونسل سیشن ہڈ تننگ ئس، ہرانا بی ایس او نا وائس چیئرمین ڈاکٹر اللہ نظر بلوچ تینا سنگت آتون اوار بائیکاٹ کیک۔ ہرانا سوب او وخت نا بی ایس او نا چیئرمین نادر قدوس ءِ پاکستانی پارلیمانی جماعت آتون خڑکی، بی ایس او نا گواچنی کسر آن مون ہڑسنگ پاننگک۔ ڈاکٹر اللہ نظر آجوئی، غیر پارلیمانی سیاست و بی ایس او نا آجو حیثیت نا نظریہ تخیسہ، جتا کونسل سیشنل ہڈ تریسہ بی ایس او آزاد نا بنماس ءِ تخک و تنظیم نا اولیکو چیئرمین گچین مریک۔

او وخت بی ایس او آزاد و محراب آن بیدس بی ایس او نا پین اِرا کُڑدہ ساڑی مریرہ۔ بی ایس او (مینگل) ہرا بی این پی (مینگل) تون، و بی ایس او (استار) ہرا بی این پی (عوامی) تون خڑکی تخارہ۔ بی ایس او (استار) تینا چیئرمین حمید شاہین نا کماشی ئٹ بی ایس او آزاد تون اواری نا پڑو کیک۔ ہراڑان گڈ بی ایس او آزاد تینا پن ءِ مٹ کریسہ بی ایس او (متحدہ) تخک۔ بی ایس او (متحدہ) نا کونسل سیشن پنجگور ئٹ ہڈ تننگک، ہراڑے چیئرمین ڈاکٹر امداد بلوچ و جنرل سیکرٹری سعید یوسف بلوچ گچین مریرہ۔

بی ایس او آزاد و استار نا اواری آن گڈ اسیکہ وا بی ایس او نا ایلو کُڑدہ تون ہیت و گپ بناء کیک و تیوہ غا کڑدہ غاک اوار مریرہ “سنگل” بی ایس او آ امنائی کیرہ۔ ہرا بھاز چنکو وخت ئسے اسکان سلیک، اولیکو کونسل سیشن آن گڈ واحد رحیم بلوچ جتا کُڑدہ بی ایس او پجار نا پن ئٹ ٹہیفک۔

اِرا ہزار و شش ئٹ باقاعدہ وڑئٹ کوئٹہ ئٹ بی ایس او نا کونسل سیشن ہڈ تننگک، ہراڑے بشیر زیب بلوچ چیئرمین، سنگت ثناء بلوچ وائس چیئرمین و گلزار بلوچ سیکرٹری جنرل گچین مریرہ۔ کونسل سیشن نا وخت اختلاف تیا محی الدین بلوچ تینا جتا کُڑدہ اس ٹہیفک۔ اوکان گڈ سنگل بی ایس او تینا متکنا پن بی ایس او آزاد ءِ اسیکہ وا ارفک۔

سنہ 2008 ئٹ بی ایس او آزاد نا ایلو کونسل سیشن ئٹ بشیر زیب بلوچ ارٹمیکو وار تنظیم نا چیئرمین اندن زاہد بلوچ سیکرٹری جنرل گچین مریرہ۔ ایلو کونسل سیشن کن بی ایس او آزاد ءِ سخت آ حالیت آتا سوب چار سال کن اُروئی تمک۔ 2012 ئٹ ہڈ تروک نوزدہمیکو کونسل سیشن ئٹ زاہد بلوچ چیئرمین، کریمہ بلوچ سینئر وائس چیئرمین اندن رضا جہانگیر سیکرٹری جنرل گچین کننگرہ ولے بی ایس او آزاد نا ردئٹ 14 مارچ 2014 آ اوفتا چیئرمین زاہد بلوچ ءِ ڈھکوک ادارہ تا کارندہ غاک دزگیر کریسہ بیگواہ کیرہ، ہرا دائسکان مون آ اتنگتنے، داکان مالو تنظیم نا سیکرٹری جنرل رضا جہانگیر ءِ ہم تربت ئٹ فورسز اسہ چھاپہ ئسے نا وخت سم کاری کریسہ کسفک۔

اِرا ہزار و پانزدہ غا بی ایس نا بیستمیکو کونسل سیشل ہڈ تننگک، ہراٹی چیئرپرسن کریمہ بلوچ و سیکرٹری جنرل ثناء اللہ پِن کروک عزت بلوچ گچین مریرہ۔ کریمہ بلوچ ءِ بی ایس او نا تاریخ ئٹ اولیکو زالبول راہشون مننگ نا شرف دوئی ءِ۔ بی ایس او آزاد تینا بیست و یکمیکو کونسل سیشن 2018 ئٹ ہڈ ایتک، ہراڑے سہراب بلوچ تنظیم نا چیئرمین گچین مریک۔ دا لڑ دا سال اسکان برجاء مس، ہراتم 3 نومبر 2020 ءِ بی ایس او آزاد دا پڑو ءِ کہ “بی ایس او آزاد نا بیست و دو میکو راجی کونسل سیشن بنام معلم آزادی شہید صبا دشتیاری و درسگاہ آزادی خیربخش مری اینو کونسل سیشن نا مسٹمیکو دے سرسہبی تون ایسر مس۔ ہراٹی ابرم بلوچ بیدس مون تس چیئرمین اندن مہر زاد بلوچ بیدس مون تس سیکرٹری جنرل گچین مس۔

چیئرمین ابرم بلوچ دیر ئسے؟
ابرم بلوچ بی ایس او آزاد نا ہشتمیکو چیئرمین ءِ، او تینا سیاسی زند ئنا بناء ءِ اسکول نا زمانہ ئٹ ہفتمیکو جماعت آن کریسس۔ دا ہمو زمانہ ئس کہ ہراتم بلوچستان ئٹ آجوئی نا پنچمیکو تحریک نا بناء مسوسس و دا تیوی بلوچستان ئٹ تالان مسوسس۔ ابرم بلوچ نا تعلق بلوچستان نا اسہ اندنو علاقہ ئسے آن ءِ، ہرا سیاست نا بابت ساندہ ساڑی مسونے، اندا سوب چُنک سنی آن اودے جتا سیاسی جماعت آتا مجلس و سرکل آتیٹ تولنگ رسینگا۔ انداکان اونا بنماسی سیاسی ہیل کننگ بناء مس۔

او باقاعدہ وڑئٹ بی ایس او آزاد نا پلیٹ فارم آ سیاسی کاریم تے ہمو وخت بناء کرے، ہراتم سنہ 2008 ئٹ تنظیم تینا کونسل سیشن ءِ ہڈ تننگ ئس۔ ولے او وخت اسکان او تنظیم نا باقاعدہ باسک الو۔ او باقاعدہ باسک ایلو سال 2009 ئٹ مس۔ تینا سیاسی کڑد نا سوب اندا سال دسمبر 2009 ئٹ او تینا یونٹ نا ڈپٹی یونٹ سیکرٹری گچین کننگا، و چنکو وخت اسیٹ تینا یونٹ نا یونٹ سیکرٹری ہم گچین مس۔

سنہ 2010 ئٹ ہراتم اونا زون ءِ ایسر کریسہ آرگنائزنگ کمیٹی ٹہیفنگا گڑا او اولیکو وار زونل آرگنائزنگ کمیٹی نا باسک گچین مس و ہراتم سنہ 2011 ئٹ او پوسکن پوسکن تینا میٹرک ءِ ایسر کریسس، گڑا او پوسکن ٹہیفنگو زونل کابینہ نا باسک گچین مس۔

سنہ 2009 ئٹ بی ایس او آزاد آ ریاستی کریک ڈاون بناء مسوسس، تنظیم نا وائس چیئرمین ذاکر مجید بلوچ ءِ دزگیر کننگان گڈ بیگواہ کننگاسس، ہرا دائسکان بیگواہ ءِ۔ اوکان گڈ بی ایس او آزاد نا درزن آتا ذمہ وار و باسک آتے ہڑدے ئی بنماس آ بیگواہ کننگ و کسفنگ نا لڑ بناء مسوسس۔ مارچ 2013 ئٹ بی ایس او آزاد ءِ باقاعدہ اسہ کالعدم تنظیم اس پن کننگاسس۔ چیئرمین ابرم بلوچ نا ردئٹ “دا دور بی ایس او آزاد کن سخت آ دور ئس، ولے تنظیمی راہشون تا مُر اوننگ، مستقل مزاجی و معامہ تا سرپدی آن تنظیم و باسک آتا حوصلہ آتیٹ کمبوتی بننگ کن ہلتوس۔ دا سیاسی دور و دا سخت آ حالیت ننے ہیل تس نا ذریعہ اس ئس، ہرا ننے ہر سخت آ حالیت تون مونتس کہ طاغت تس و کنا اصل سیاسی ہیل تس اندا سخت آ دور کرے۔”

ریاستی ادارہ تا پارہ غان بی ایس او آزاد آ برجاء ترند آ کریک ڈاون نا سوب بی ایس او آزاد پوسکن آ حالیت آتیتون تینے شاغسہ تینا ساخت ءِ پورہ مٹ کرے و 2011 نا نیامٹ اسہ پوسکنو ساخت “سیل سسٹم” نا ردئٹ تنظیم نا تشکیل نو کننگا۔ پوسکنا ساخت نا ردئٹ ابرم بلوچ زونل سیل آرگنائزر گچین مس۔

اوکان گڈ او ہشت سال اسکان بی ایس او آزاد نا جتا بنجائی اوغدہ تیا ذمہ وار ایسری تریسہ کرینے و برجاء سال 2020 ئٹ تنظیم نا بیست و دو میکو کونسل سیشن ئٹ ابرم بلوچ بی ایس او آزاد نا پوسکنا چیئرمین گچین مس۔

چیئن ابرم بلوچ تون اوڑدئی:
ابرم بلوچ تینا اصل پن ءِ میڈیا غا پاش کپک، و اونا تعارف آن ہم دننگا ہیت آتے کشنگانو، ہرافتیان اونا چاہنداری مننگ کے۔ دی بلوچستان پوسٹ جتا ذرائع تیان برجاء کوشست آتیان گڈ اوڑتون حوال کریسہ نادرست ہند ئسے آ اوڑدئی کرے، ہراڑے اوفک عکس ہلنگ آ موکل تتوس و انٹرویو نا وختا او برجاء ماسک بینوک ئس۔ سوب سوج کننگا او پارے کہ دا ماسک کرونا آن رکھ آن زیات ریاستی فورسز آتیان رکھ اکن ءِ۔ او مثیال تریسہ پارے کہ اونا تنظیم نا مسکوہی چیئرمین زاہد بلوچ بی بی سی ءِ اسہ انٹرویو اس تسوسس، ہراٹی او تینا مون ءِ ہلتویسس، دا انٹرویو آن منہ ہفتہ گڈ اودے فورسز ارفے، شش سال گدرینگ آن گڈ ہم او اینو اسکان بیگواہ ءِ۔ حالانکہ او تینا انٹرویو ئٹ پاش لوز آتیٹ دا پاریسس کہ اوفتا تنظیم پرامن جدوجہد آ یخین تخک و بیرہ اسہ خوانندہ گل ئسے۔

سوج و ورندی:

دی بلوچستان پوسٹ: تیوہ غاتیان مُست نن نمے بی ایس او آزاد نا پوسکنا چیئرمین مننگ آ مبارکباد پانہ و ادارہ نا پارہ غان نما منتواری پانہ کہ نم ننتون ہیت و گپ نا است خواہی تخارے۔

ابرم بلوچ: دی بلوچستان پوسٹ میڈیا نیٹورک نا منتوار ہرا ننا ہیت آتے بننگ کن بسر۔

دی بلوچستان پوسٹ: تدوک اسہ دہ یک آن زیات وخت اٹ خننگ مریک کہ بی ایس او آزاد نا برخلاف ریاستی کریک ڈاون ترندی تون برجاء ءِ و مارچ 2013 آن تنظیم قانودی ردئٹ رکھ ئنا گواچی ءِ۔ دننگا حالیت آتیٹی جمہوری دود آتے برجاء تخنگ اسہ تنظیم اسیکن اخہ در سخت مریک؟ کونسل سیشن ہڈ تننگ وختا نمے انت سختی تیتون مون پہ مون مروئی تما؟

ابرم بلوچ: بلکن داڑے لوز آتیٹ ہمو سخت آ ندارہ ءِ پاننگ مفک ہرافتیتون ننے کونسل سیشن ہڈ تننگ وختا مون پہ مون مروئی تما۔ بلوچستان پورہ وڑئٹ اسہ جنگ زدہ ڈیہہ اسیٹی مٹ مسونے۔ داڑے اسہ وڑ نا سیاسی کاریم ہم آجو وڑئٹ کننگ مفک۔ دنو حالیت اسیٹی کونسل سیشن کونو بھلو تنظیمی پروگرام نا ہڈ تننگ ننکن بھاز سخت ئس، ولے ننا تنظیم نا نظریاتی باسک آک نن و دے خواری کریسہ اسل بھاز سخت آ حالیت آتیان گدرینگسہ کونسل سیشن ہڈ تس ءِ سرسہب کریر۔

دا گڑا نہ بیرہ دا سخت آ حالیت آتیٹی بی ایس او آزاد ئٹ سوگو جمہوری ادارہ نا درشانی ءِ کیک، بلکہ تیوہ غاتیان زیات دا تنظیم و نظریہ تون اوار ننا باسک آتا سوگو کمٹمنٹ نا ہم درشانی ءِ۔ اندا سوگو ادارہ جاتی ہیت و نظریاتی کٹمنٹ نا بنماسی سوب ءِ کہ اسہ ریاست ئسے نا بسٹ مشینری تنظیم نا برخلاف کاریم اٹ مننگ آن بیدس ہم بی ایس او آزاد اینو ہم تینا ہند آ سوگوی تون سلوک ءِ۔

دی بلوچستان پوسٹ: بی ایس او آزاد بلوچ خوانندہ تنظیم تیان امر جتا ءِ؟

ابرم بلوچ: بی ایس او تینا پنجا و سہہ سال آن زیات وخت آ تالان تاریخ ئٹ جتا شیفی بڑزی تیان گدرینگانے۔ بی ایس او وختس راجی آجوئی نا نظریہ ءِ مونی درے، گڑا وختس صوبائی خودمختاری کونا دروغ نا نعرہ تا رند ئٹ ہنا، ساحل و وسائل و ایلو چنکا یا گمراہ کروک ٹک آک ہم بی ایس او نا دا پند ئٹ بشخ مسونو۔ بی ایس او نا ہر پوسکنا گچین مروک چیئرمین بی ایس او نا مونا تینا پن ءِ خلیسہ بی ایس او نا پروگرام یا مسخت ئٹ بدلی ہتیسہ کریکہ۔ اندن جتا وخت آتیٹ بی ایس او جتا کُڑدہ و پارٹی آتیان زیمی ہم مسونے۔ ولے 2002 آ ہراتم بی ایس او نا نظریاتی سنگت آک فیصلہ کریر کہ بلوچ خوانندہ تے چنکا نعرہ و پارلیمانی پارٹی تا دو تیان آجو کریسہ، بی ایس او ءِ اسہ گواچنی مسخت ئسے نا پارہ غا دننگہ گڑا ہمو نظریاتی سنگت آک بی ایس او آزاد نا بنماس ءِ تخار۔

اینو اِرا دہ یک گدرینگانے، اینو ای دا کاروان نا ہشمیکو چیئرمین اٹ ولے بی ایس او آزاد اینو اسکان تینا گواچنی و بنماسی مسخت آن پد سلتنے و نہ اسہ چیئرمین یا کابینہ ئسے نا بدلی آن بی ایس او آزاد نا اصل مسخت ئٹ بدلی بسونے۔ دانا بنماسی سوب بی ایس او آزاد نا نظریاتی وڑئٹ بسٹ پاش کسر نا گچین کننگ ءِ۔

بی ایس او آزاد دا سوب ایلو خوانندہ تنظیم تیان جتا ءِ کہ بی ایس او آزاد تینا مسخت، نظریہ و پروگرام ئٹ بِسٹ پاش ویژن تخک۔  بی ایس او آزاد بلوچ خوانندہ تے دروغ نا نعرہ و دروغ نا ندارہ نشان تننگ نا جاگہ غا اوفتے گواچنی ویل تیان معلومدار کیک و راجی شعور، گواچنی تاریخ ءِ چاہنگ و راجی غلامی نا برخلاف جدوجہد کننگ کن خوانندہ تے اسہ سوگو ءُ تلہ اس ایتک۔

دی بلوچستان پوسٹ: بی ایس او آزاد نا اسہ باسک اس مننگ آ خوانندہ ئسے اسہ لس خوانندہ تنظیم ئسے آنبار رکھ دوئی مفک بلکن پین خلیس اودے گیڑ کیک، دننگا حالیت آتیٹی اسہ خوانندہ اس انتکن بی ایس او آزاد ءِ گچین کے؟

ابرم بلوچ: دا دن اوننگک کہ نی رکھ ئنا تشریح امر کیسہ؟ نن سرپد مرینہ کہ بی ایس او آزاد اسٹ آ تنظیم ءِ ہرا گواچنی معنہ غاتیٹ بلوچ خوانندہ تے رکھک۔ اگہ رکھ آن نما مراد دود نا ردئٹ ہاسٹل نا کمرہ، استاد آتے تڑی تریسہ پرچہ پاس کرفنگ، دیر، روڈ، نالی والا رکھ ءِ گڑا بلکن ننا پام و است خواہی ہڑتوماک دننگا رکھ آ افس ولے نن فخر اٹ پاننگ کینہ کہ بی ایس او آزاد بلوچ خوانندہ تا فکری رکھ ءِ کیک، بی ایس او آزاد خوانندہ تیٹ راجی آجوئی و ترقی پسند نظریہ نا رکھ ءِ کننگے، نن خوانندہ تا جوزئی سیالی نا رکھ ءِ کینہ و اوفتے راہشون و کس ئسے نا ذاتی فائدہ کن کاریم اٹ بننگ کن ہلپنہ، بی ایس او آزاد فکری استحصال، نوآبادیاتی خواننگ نا منفی زیم آتیان خوانندہ تا رکھ ءِ کیک، اوفتیٹ راجی و نغد کاری شعور بیدار کیک۔ تیوہ غاتیان زیات بی ایس او آزاد راج نا بروکا وخت و زنک ئنا رکھنگ نا کڑدار ءِ ایسری تننگے۔

دا ہیت ہم ملی ٹی شاغنگ مرے کہ اینو بلوچ خوانندہ جنگ ئنا دور ئنا زنک ءِ۔ اوفتا ودشت جنگ نا زمانہ ٹی مسونے۔ اینو راجی تحریک، خوانندہ تا تینٹ ہیل تس ءِ کننگے۔ دا حالیت اٹ بلوچ ورنا تیکن ریاستی بیدادی و خلیس بے معنی مسونے۔ اینو بلوچ خوانندہ زوراکی نا بیگواہی، جشوک آ جون، اُراتے خاخر تننگ، زالبول و چنا تا بے شرفی، چُناک ظلم و بیدادی نا ہر دروشم ءِ تینا خنتیٹ خنانو۔ بلوچ خوانندہ تا ساڑی زنک زیات باشعور زنک ئسے، اندا سوب دا زنک دروغ نا نعرہ و ندارہ نشان تس نا ریفنگ ئٹ بفرو۔

دا زنک تینا گواچنی جدوجہد و تنظیم نا گچینی نا چاہنداری تخک۔ اندا سوب اینو بلوچ خوانندہ ءِ ہچو وڑ ئنا ظلم و بیدادی و ریاستی خلیس اس بی ایس او آزاد ئٹ اواری آن توننگ کپرنگ ءِ۔

دی بلوچستان پوسٹ: دا وخت بی او آزاد کالعدم پن کننگانے، اونا سد آ باسک و راہشونک بیگواہ ءُ، بھازاک خلنگانو۔ سلوک تنظیم ءِ اسہ دہ یک آن چیر زمین کاریم کروئی تمنگ ءِ، خوانوک ادارہ تیان مُر، خوانندہ تیان مُر بی ایس او آزاد واقعی مُستی اسہ خوانندہ تنظیم ئسے؟ یا نمتون تینا کلہو ءِ خوانندہ تے اسکان سر کننگ نا اسہ وڑ ڈول اس ساڑی ءِ؟

ابرم بلوچ: اسہ سیاسی جماعت یا تحریک ئسے ماس کش کریسہ خسنگ نا کوشست ہموتم مریک، ہراتم اونا نظریہ گواچنی بدلی ہتنگ آ مرے و اونا وڑ ڈول و کاریم تیان غاصب، کوزہ گیر یا آمر قوت آک بیم نا گمان ءِ کننگ آ مریر، بے معنی و بے خواست سیاسی ہیت گپ آ ہچو لٹ کٹائی مفک۔ بی ایس او آزاد اگہ زیر عتاب ءِ و ڈغار آ پاش بننگ کپک، اونا سوب ننا بے لائخی متنے بلکہ اونا سوب ننا سیاسی وڑئٹ سوگو مننگ ءِ، ورنا تیا کڑمب اثر تخنگ و بدلی ہتنگ نا لائخی تخنگ ءِ۔ و ہراتم اسکان ننا تنظیم و نظریہ و پروگرام ئٹ دا لائخی ساڑی مرو، بی ایس او آزاد لس خوانندہ تنظیم تا وڑ دود نا ردئٹ سیاسی میدان ئٹ دڑنگ کپرو، ہراتم نن تینا زیم آتے گوہان گڑا نن ہم پاش وڑ ئٹ لس خوانندہ ادارہ آتیٹ ہمو کل گڑاتے کننگ کرون، ہرا درزن آتا کچ بیدس اثر تخوک خوانندہ تنظیم آک آجوئی تون مالو آن کننگو۔

تیوی جہان ئٹ انقلاب و جنگ نا زمانہ نا زیات خوانندہ تنظیم آک اندن انگا سخت آ حالیت آتیان گدرینگانو۔ ولے انقلابی نظریہ و پاش مسخت نا مننگ ہر تنظیم نا سوگو و سرسہب مننگ نا ثبوت ءِ۔

اینو تیوی ریاستی ظلم و بیدادی تیان بیدس ہم بی ایس او آزاد بلوچستان و پاکستان نا بھازا تعلیمی ادارہ غاتیٹی خوانندہ تا نیامٹ ساڑی ءِ۔ اسہ پورو خوانندہ تنظیم ئسے نا حیثیت ئٹ بی ایس او آزاد تعلیمی دارہ تیٹ خوانندہ تا شعوری ہیل تس ءِ ہم کننگے اندن خوانندہ تے دروغ نا نعرہ تیان مُر تخنگ کن اسہ سوگو ءُ تلہ اس تننگے۔

آن ولے اینو تنظیم تدوک وخت نا مُتکن مروک دود آتیان چپ انقلابی اصول و وڑ ڈول تا بنماس آ تینا پروگرام و پالیسی تے ٹہیفسہ اوفتے مُستی دننگ آ زور شاغنگ ءِ۔

دی بلوچستان پوسٹ: نما تنظیم آ ریاستی ادارہ تا پارہ غان دا دوبہ خلنگک کہ نم اسہ خوانندہ تنظیم اس آخہ بلکن آزادی خواہوک سلاء بند تنظیم تا کمکار بلکن اوفتا بشخ اُرے، دا دوبہ غاتیٹ اخس راستکی ارے؟

ابرم بلوچ: دنو ہیت ئسے گڑا ننا باسک و راہشونک تعلیمی ادارہ و ہاسٹل آتیان انتکن دزگیر مریسہ بے ڈس مننگو مش تیان انتکن آخہ؟ تدوک اسہ دہ یک آن ننا تنظیم بسٹ ریاستی ظلم و بیدادی نا گواچی ءِ۔ گواچنی دا ریاست جہان نا مون آ تینا دا ظلم و بیدادی و بی ایس او آزاد نا برخلاف برجاء ریاستی کریک ڈاون ءِ جواز تننگ کن دنو دوبہ خلیسہ کرینے۔

بلوچستان ئٹ لس خوانندہ آن ہلیس ہر شعور تخوک بندغ ہم دا گواچن ءِ چائک کہ دا دوبہ غاتا گواچن تون ہچو سیالی اس اف۔

بی ایس او آزاد اسہ پرامن آجوئی خواہوک خوانندہ تنظیم ئسے، ہرا تعلیمی ادارہ آتیٹ خوانندہ تا خواننگ و ہیل تس و خوانندہ تے شعوری کاریم تا پارہ غا پامدار کننگ کن جدوجہد کننگے۔ آجوئی کن پرامن سیاست کننگ ہر انسان نا بنماسی سیاسی و انسانی حق ءِ۔ جہان نا مہذب راج آک دانا پورو موکل ایترہ، دادے دہشتگردی و شدت پسندی تون گنڈنگپک، دا ہیت آتا درشانی نا آجوئی ءِ۔ اسکاٹ لینڈ و کٹالونیا اندا دہ یک نا پاش مثیال آک ءُ۔

دی بلوچستان پوسٹ: نی تنظیم نا چیئرمین نا ردئٹ، تنظیم ءِ ہرا پوسکنا ٹک آتیان دننگ خواسہ و پوسکنا پالیسی تے ہتنگ خواہوس، یا نم متکنا کارکڑد آ اُست جم اُرے؟

ابرم بلوچ: انقلابی جدوجہد ئٹ انقلابی باسک تینا تنظیم نا ہر پالیسی یا سیاسی پروگرام آ پورہ اُست جم مننگ نا جاگہ غا ہر وخت تنظیم نا پالیسی و پروگرام آ چمشانک شاغرہ۔ دافتیا سیسی ہیت و گپ کیرہ، شرہ مریک کہ زیات آن زیات پوسکن و سوگو وڑ ڈول نا کمک ئٹ جدوجہد کریسہ تینا مسخت ءِ دوئی کننگے و وخت و حالیت آتیتون تینا وڑ ڈول ءِ اوار شاغنگہ۔

تینا مسخت ءِ دوئی کننگ کن انقلابی تنظیم آک وخت و حالیت نا ردئٹ تینا پالیسی تیٹی بدلی ہتیسہ کیرہ۔ نن ہم اندا انقلابی وڑ ڈول آ گام خلنگن۔ نن تنظیم نا نزوری تیا پامداری کریسہ ہر وخت تینا مجلس آتیٹ اوفتیا ہیت کینہ کہ تینا پالیسی و پروگرام ٹی المی و بنماسی بدلی ہتیسہ زیات آن زیات سوگو وڑئٹ جدوجہد کین۔

پوسکن گچین مروک چیئرمین نا ردئٹ ای ہم اندا ٹہیفنگوک پنت و وڑ ڈول تیا ہننگ نا پابند اُٹ۔ وخت و حالیت نا ردئٹ ہراتم ہم ننے ہراڑے وڑ و ڈول اٹ بدلی ہتنگ نا خواست نا گمان مس، تفوک ادارہ و ٹہیفنگوک وڑ و ڈول تا ردئٹ اوفتیا ہیت و گپ مرو۔

دی بلوچستان پوسٹ: بلوچ خوانندہ غاک ہر منہ دے آن گڈ برانز، دپدرشانی، بین ہڑتال، لانگ مارچ کریسہ خننگرہ۔ ڈیہہ اٹ ایلو راج آتا خوانندہ تیان بھلو کچ اسیٹی زیات بلوچ خوانندہ غاک برانز کروک خننگپرہ، دانا سوب انت ءِ؟

ابرم بلوچ: بلوچ خوانندہ تا ویل آک ایلو راج آتا خوانندہ تیان بھاز زیات ءُ۔ اندا سوب بلوچ خوانندہ آک ہڑدے تینا خواننگ نا حق آتیکن برانز کروک خننگرہ۔ بلوچستان نا زیات علاقہ غاک بنماسی تعلیمی ادارہ تیان ہورک ءُ۔ ایلو پارہ غا ہرا منہ تعلیمی ادارہ غاک ساڑی ءُ، او ہم پاکستان نا ایلو علاقہ تا تعلیمی ادارہ تیان بھاز پدماندہ ءُ، و ہزار آ ویل آتا گواچی ءُ اندن ہرا بلوچ خوانندہ غاک بلوچستان آن پیشن پاکستان نا جتا علاقہ تیٹ خواننگ کن کارہ اوڑے ہم اوفتے جتا ویل آتون مون پہ مون مروئی تمک۔

ولے ارٹمیکو گواچن دا ہم ارے کہ بلوچ خوانندہ دا ڈیہہ ئنا ایلو راج ئنا خوانندہ تیان بھاز زیات سیاسی شعور تخک، بلوچ خوانندہ تینا حق آتیان معلومدار ءِ و استحصال ءِ سگپک، اوڑتون اوار ہراتم اسہ بلوچ خوانندہ اس بھلو تعلیمی ادارہ ئسے اسکان سر مریک گڑا او بیرہ تینا ذاتی کیریئر کن ٹک خلپک بلکن تینا راج نا ایلو خوانندہ تا حالیت نا درک مننگ نا سوب اوفتا خواننگ نا حق آتا رکھ ءِ ہم تینا فرض سرپد مریک۔ اندا راجی سیاسی شعور ہم اسہ سوب ئسے کہ بلوچ خوانندہ چاہے ہراڑے ہم خواننگ آ مریر، او اسہ وڑئٹ جدوجہد اٹ یا برانز اٹ خننگرہ۔

دی بلوچستان پوسٹ: پاننگک کہ 2006 ئٹ بی ایس او آزاد آجوئی، غیر پارلیمانی سیاست و آجو حیثیت نا نعرہ تریسہ پنچ سال اسکان بلوچ خوانندہ تیٹ پن کٹا، ولے داسہ او نعرہ غاک بے معیاد مسونو، داسہ خوانندہ تے دا نعرہ تا مسخت ئٹ ہچو اُست خواہی اس سلتنے، گڑا ریاستی کریک ڈاون آن زیات بی ایس او آزاد ءِ دا گڑا نسخان تس، داٹی اخس راستکی ارے؟

ابرم بلوچ: داٹی ہچو راستکی اس اف، تدوکا اسہ دہ یک آن زیات وخت آن بی ایس او آزاد تیوہ غاتیان زیات ریاستی بیدادی تا گواچی مسونے، ولے اینو بیدس تینے خوش کننگ یا نشان تس نا دعویٰ غان نن پورہ دلیل و گواچن آتا بنماس آ پانہ کہ بی ایس او آزاد اینو ہم بلوچستان نا تیوہ غاتیان بھلا و پنی آ خوانندہ گل ءِ۔ اینو ہم بلوچ خوانندہ غاک رد بہ رد بی ایس او آزاد اٹ اوار مننگو۔

اگہ بی ایس او آزاد نا پروگرام بے معیاد مروس گڑا اینو بی ایس او آزاد داخہ در خوانندہ آتیٹی پنی متوکہ و نہ اینو داخس بھلو کچ اسیٹی خوانندہ غاک بی ایس او آزاد نا کاروان اٹ اوار مسرہ۔

اگہ بی ایس او آزاد نا پروگرام بے معیاد مروس گڑا داخہ در بھلو، ترند و مرغن وخت آ تالان ریاستی کریک ڈاون بی ایس او آزاد ءِ ایسر کریکہ، ولے دا ننا سیاسی پروگرام و انقلابی نظریہ نا برم ءِ کہ بی ایس او آزاد اینو ہم بلوچ خوانندہ تیکن تیوہ غاتیان زیات قبول کروک خوانندہ گل ءِ۔

ارٹمیکو ہیت کہ راجی آجوئی و غیر پارلیمانی سیاست نا نظریہ بی ایس او آزاد نا تخلیق اس اف بلکن دا بلوچ راج نا سیاسی نظریہ ءِ، ہرانا تخلیق غلامی و استحصال نا پڈ آن مسونے، و ہفتاد سال آن جتا بلوچ تنظیمک دا نظریہ آ جتا وڑ و ڈول و پن تیان کریسہ کرینو۔ دا نظریہ ہمو وخت اسکان مرو، ہرا وخت اسکان راجی غلامی و استحصال مرو۔ بی ایس او آزاد اندا راجی نظریہ ءِ بلوچ خوانندہ تا مونا ایس و دا راجی نظریہ غا خوانندہ تنظیم ئسے نا ردئٹ تینا وڑ ڈول آ ہنیسہ کرینے۔ دا راجی نظریہ نا مسخت آجوئی نا دوئی کننگان گڈ بے معیاد مننگ کیک، اوکان مالو نہ۔

دی بلوچستان پوسٹ: انت سوب ءِ کہ نم دادے کونسل سیشن نا پن ایترے و گچین کاری نا دے ہم تخرے ولے تدوک چار کونسل سیشن آتیٹ نما تنظیم ئٹ تیوہ غا عہدیدار آک بیدس مون تس آ کٹیسہ بریرہ؟

ابرم بلوچ: نن باقاعدہ تنظیمی راہ بند نا ردئٹ، جمہوری اقدار نا ردئٹ تنظیمی کونسل سیشن ہڈ ایتنہ۔ ہراڑے ننا تنظیم نا ہر کونسلر ءِ پورہ حق دوئی ءِ و ہر کونسلر پورہ بااختیار مریک۔ اینو بلوچستان نا سیاسی حالیت آتیٹی ہمو تنظیم آک ہم اِرا سال ئٹ تینا کونسل سیشن ہڈ تننگ کپسہ، ہرافک سختی تا گواچی افس۔ و بی ایس او آزاد پورہ ریاستی کریک ڈاون نا گواچی ءِ ولے داڑان بیدس ہم جمہوری دود ءِ برجاء تخیسہ ہر اِرا سال آن گڈ تنظیمی راہ بند نا ردئٹ کونسل سیشن برجاء ہڈ تننگک۔

سلیس ہیت بیدس مون تس گچین مننگ نا، گڑا نن اینو فخر اٹ پانہ کہ بی ایس او آزاد اینو تدوک وخت ئنا بھازا متکنا سیاسی دود آتے ایسر کرینے۔ تدوکا وخت اٹ زیات کونسل سیشن آتیٹ عہدہ تیکن چک و تار و اسہ پوسکنو کُڑدہ اس ہتنگ مسکہ، اینو کونسل سیشن عہدہ تیکن چک و تاڑ و کُڑدہ بندی نا جاگہ غا راجی پالیسی ترتیب تننگ نا بڑز ادارہ نا حیثیت اٹ تینا کڑد ءِ ایسری تننگے۔

ولے دانا اسل دا مطلب اف کہ بی ایس او آزاد جمہوری اقدار ءِ ایسر کرینے، بلکن اینو ہم کونسل سیشن راہ بند نا رد ئٹ ہڈ تننگک و ہر عہدہ کن سلینگ نا حق ہر اسہ کونسلر ءِ مریک۔ کونسل سیشن اٹ گچین کاری کمیشن مریک۔ گچین کاری کمیشن آجو حیثیت اٹ گچین کاری ءِ ہڈ ایتک، ہراڑے ہر کونسلر ءِ پورہ حق مریک کہ او ہر اسہ اوغدہ کن تینا فارم ءِ تننگ کیک۔ ہر کونسل سیشن نا وختا اسہ عہدہ کن اسٹ آن زیات فارم تننگک۔ بھاز وخت تنظیمی سنگت آک اسٹ ایلو تون سیاسی ہیت و گپ کیرہ، گڑا اسہ سنگت ایلو نا حق اٹ دو بڑزا کیک، کہ تدوکا وخت نا دود ءِ کننگپ، اندن بھاز وخت جتا عہدہ تیکن سنگت آ نیام اٹ مون تس مریک، ہرا پاش وڑ اٹ ایسری آ کائک انتیکہ دا پورہ عمل پاش و بیدس چک و تاڑ آن مریک گڑا اندا سوب دا حوال بھاز کم ادارہ غان پیشن مریک۔

نن سرپد مرینہ کہ دا بی ایس او آزاد نا سنگت آتا سیاسی شعور و سرپدی ءِ کہ او بلوچ خوانندہ سیاست اٹ متکن آ دود آتے ایسر کریسہ پوسکن آ جمہوری اقدار نا بنماس ءِ تخنگو۔

گڈیکو ہیت:

چیئرمین ابرم بلوچ تون شابیتی اٹ حال احوال آن گڈ ہراتم نن اوڑان سوج کرین کہ اگہ او تیوہ غا بلوچ خوانندہ آتے اسکان کلہو اس سر کننگ خوائے گڑا او انت پارو؟ او دا مجلس نا ایسری لوز آتے دا لوز آتیتون کرے “ای بلوچ خوانندہ آتے بیرہ داخس پاننگ خواوہ کہ بلوچ نا ساڑی زنک، ہرا جنگ و تحریک نا ترندی تا وختا ودی مسونے، دا جنگ ئنا وخت آ اوفتا ودشت مسونے، دا زنک دا راج ئنا پورہ تاریخ نا اسہ اندنو دور نا زنک ئسے، ہرانا زند نا وختا دا راج ئنا بروکا وخت نا فیصلہ مروئی ءِ کہ ننا بروکا وخت شرف، وقار و آجوئی مرو یا گڑا اقلیت اٹ مٹ مریسہ ساندہ نا غلامی۔ دا ڈغار نا و دا انقلاب نا لاج نمے تخوئی ءِ۔ اگہ نم اینو دا ڈغار تون، دا تحریک آن تینے بیگانہ تخارے، گڑا تاریخ و بروکا زنک نمے ہچبر بشخپرو ءِ۔

پُوسکنا حوالک

بلوچستان: سم کاری نا جتا تدینی تیٹی اسہ بندغ ئس بیرا، اسٹ ٹپی

بلوچستان نا علاقہ بولان و کوئٹہ ٹی سُم کاری نا ویل آتیٹ اسہ بندغ اس بیران و اسٹ ٹپی...

گودی – شاعر: انور بلسم

"گودی" مَشتیٹی ئے گدان گودی نا میڷ تتو نے شوان گودینا راج اونا اوڑ تون زیب دار قصّہ ئے دا بیان گودی نا غلہ غاتے پِڑا شُپِک او کھونٹ سے...

میر گل خان نصیر – شاہ محمد مری | عتیق آسکوہ

بلوچستان نا ادب و سیاست ئٹ بڑز پن تخوک میر گل خان نصیر نا زند آ تالان کتاب "میر گل خان ںصیر" شینک مس۔ دا...

راھشون ادبی دیوان جنرل باڈی مجلس و بنجائی گچین کاریک

شال ئٹ راھشون ادبی دیوان بلوچستان نا سالانہ جنرل باڈی مجلس و گچین کاریک، آصف بلوچ مرکزی چئیرمین، اسرار شوہاز بلوچ سینئر وائس چیرمین...

تیوی پاکستان ٹی خوانندہ جاہ تے بند کننگ نا پڑو

بنجائی وزیر تعلیم شفقت محمود نا کماشی ٹی بین الصوبائی وزرا کانفرنس اڈ الک ہراٹی غٹ صوبہ غاتا وزیر تعلیم آک بشخ ہلکر۔ تیوی...