حوال تا رد ئٹ آر ایچ سی سینٹر نوکنڈی تیوہ غا بنماسی آسراتی تیان بے بشخ ءِ، تدوکا اسہ سال ئنا ئسے ہچ ءُ میڈیکل آفیسر و نرینہ، زالبول ڈاکڑ تخنگتنے۔
تدوکا مسہ تو ئنا سے نوکنڈی آر اچ سی ہسپتال ءِ دائسکان دارو تننگتنے، مالو سرکاری تلہ آ دونیم لکھ رپئی نا دارو تننگاکہ ہرا ساڑی آباتی نا کن نُت ئٹی بے ئنا کچ ئسر اندن نوکنڈی آر ایچ سی ہسیتال اسٹ آ رورل ہیلتھ سینٹر ءِ دا وخت بیدس نرینہ و زالبول ڈاکٹر تا آسامی آک خالی مننگ نا سوب آن بنماسی آسراتی تیان بے بشخ ءُ۔
نوکنڈی آر سی سینٹر ٹی تدوکا اسہ سال ئنا ئسے ہچ ءُ میڈیکل آفیسر و نہ ڈاکٹر تخنگانے، دا وخت آر ایچ سی سینٹر ءِ اسہ میڈیکل ٹیکنیشن و اسہ ایل ایچ اس چلیفنگ ءُ و دارو نا ونڈ مسہ سال مست ئنا سے زیات متنے، کوارٹرلی ہر مسہ آن گڈ ہسپتال ءِ سر کاری تلہ آ دونیم لکھ رپئی نا دارو رسینگسہ ءِ۔
لیبر روم، زچہ بچہ سینٹر مفرینگ نا سوب آن زالبول تے سختی تون مون تروئی تمک، داڑان بیدس دا ہسپتال نا ماڑی ہم تیوہ خراب ءِ، ایکسرے و جتا وڑ نا ٹیسٹ ئنا آسراتی مفرینگ نا سوب آن علاقہ نا غریب بندغ آک چنکو ٹیسٹ و ایکسرے کن ہزار آ رپئی خڑچ کریسہ دالبندین و ایلو شار تیا کارہ۔
مخلوق نا پاننگ ءِ کہ صوبائی حکومت خاص وڑ ئٹ محکمہ جانجوڑی بلوچستان نا کنڈان بلوچستان ٹی جانجوڑی نا جوانی کن دعویٰ تو بھاز کننگیک ولے دائسکان ویل آک امون ءُ۔
اندن علاقئی مخلوق بلوچستان نا وزیر جانجوڑی و ایم پی اے چاغی آن خواست کرینے کہ رورل ہیلتھ سینٹر نوکنڈی ٹی دمدستی وڑ ئٹ میڈیکل آفیسر تون اوار میل و فیملی ڈاکٹر ہم تخننگ مرے و ساڑی آباتی نا کچ آ دارو ونڈ کننگ ٹی ودکی کریسہ آر ایچ سی سینٹر ءِ پوسکنو آسراتی تننگے۔