بلوچستان ئٹ کسر تا بدحالی و آسراتی تا کمبوتی تیان ویل آتا لڑ بند مننگ کتنے، برجاء سال اکتوبر نا توہ ئٹ 997 روڈ شکست آک مونا بسر ہرافتیٹ 126 بندغ مرگ نا گواچی مسر اندن دا ویل آتا سوب آن 1389 بندغ ٹپی مسر۔
بلوچستان یوتھ اینڈ سول سوسائٹی رپورٹ نا رد ئٹ تدوکا توہ ویل آک بلوچستان نا جتا کسر تیان مونا بسر ہراڑے کوئٹہ، قلات، کردگاپ، پشین ئٹ 247 روڈ شکست آتیٹ 334 بندغ ٹپی و 32 بندغ بیران مسر، خضدار، بیلہ، سوراب، حب، آوران ئٹ 428 ویل آتیٹ 577 بندغ ٹپی مسر اندن 27 بندغ مرگ نا گواچی مسر۔
رپورٹ نا رد ئٹ ژوب، لورالائی، قلعہ عبداللہ، مسلم باغ، زیارت، قلعہ سیف اللہ ئٹ 163 ویل آتیٹ 260 بندغ ٹپی و 32 بندغ بیران مسر اندن گوادر، جیونی، پسنی، تربت، پنجگور، بیسیمہ، واشک، نوشکی، خاران، سیندک، چاغی، نوکنڈی، دالبندین، ئٹ 39 ویل آتیٹ 63 بندغ ٹپی و 14 بندغ بیران مسر۔
اندن سبی، نصیرآباد، ڈیرہ مراد، جفر آباد، سوئی، کوہلو، مچھ، اوستہ محمد ئٹ 120 ویل آتیٹ 155 بندغ ٹپی و 21 بیران مسر۔
رپورٹ نا رد ئٹ چنک سن آ عبدالجبار ہرا اسہ سال ئس مست روڈ شکست اسیٹی ٹپی مسوس اکتوبر ئٹ وفات کرے۔