بلوچستان نا علاقہ کوئٹہ و اوتھل ئٹ جتا تدینی تیٹ ارا بندغ مرگ نا گواچی، اندن اسٹ بھاز ٹپی مسونے۔
حوال تا رد ئٹ کوئٹہ کراچی بھلا روڈ اوتھل نا خڑک روڈ شکست نا ویل ئٹی اسہ بندغ اس ہند آ مرگ نا گواچی اندن اسٹ اس بھاز ٹپی مسونے، مرگ نا گواچی مروک بندغ نا چائنداری کوئٹہ آن تعلقدار سریاب روڈ نا ہندی یعقوب شاہ نا مار یونس شاہ نا پن ئٹ مسونے۔
گیشتر حوال تا رد ئٹ ٹپی آ بندغ نا چائنداری چاغی آن تعلقدار راج سنجرانی محمد آصیف نا مار سلار خان نا پن ئٹ ٹپی آ بندغ لسبیلہ ویانیڈ ٹرسٹ نا ایمبولینس ٹی ٹرامہ سیٹ کراچی آ راداہ کننگانے۔
اندن پین حوال تا رد ئٹ بلوچستان نا دارالحکومت کوئٹہ نا علاقہ مستونگ روڈ آن اسہ بندغ ئسے نا جوْن خننگانے۔
گیشتر حوال تا رد ئٹ ضلع مستونگ روڈ مرچ آغا ہوٹل نا خڑک اسہ بندغ ئسے نا جوں خننگانے، ہرانا چائنداری رحیم داد نا پن ئٹ مسونے جون المی کارروائی آن گڈ خاہوت نا دوٹی تننگانے۔