بلوچستان نا ضلع قلات ٹی اسہ روڈ شکست اسیٹی پنچ بندغ کسکر۔
روڈ شکست قلات نا علاقہ منگچر نا رہی آ کوئٹہ کراچی کسر آ بدرنگ نا ایریا ڈویژنل کمپلیکس نا خڑک آ کوچ و ٹوڈی کار نا نیام ئٹ ڈک لگنگ آن مس ہرانا سوب آن پنچ بندغ کسکر۔
ڈک لگنگ نا سوب آن کار ٹی سوار سید فرید اللہ ولد سید عبدالواسع قوم سید سکنہ حرمزئی پشین و اوڑ تون اوار سوار ارا نیاڑی و ارا چنا جاگہ غا بیران مسر۔ کوچ ڈرائیور جاگہ غان فرار مس۔
کوالخواک جوْن آتے خڑک ئنا اسپتال آ سر کریر۔
خیال مرے درو ہم اسہ روڈ شکست اسیٹی اسہ خاہوت نا چار بندغ بیران و ٹپی مسر، چاغی ٹی پک اپ و ٹرالر نا ٹکر ہلنگ آن اسہ خاہوت نا چار بندغ کسکر۔
ویل جمعہ نا دے ضلعی صدر جاگہ دالبندین ٹی نواحی علاقہ اسماعیلی لانڈھی ٹی آر سی ڈی شاہراہ غا ہمو وخت مس ہرا وخت او بندغ آک یک مچھ آن دالبندین آ ہننگ ئسر کہ چپ کنڈ آن بروکا ٹرالر اوفتا ایرانی ڈول زامیاد گاڑی ءِ لتاڑا۔
اسسٹنٹ کمشنر دالبندین عرفان خلجی نا پاننگ ءِ کہ دا حادثہ ٹی ارغ زائفہ چنکو چناس و تاتہ بیران مسر ایلو کنڈ آن اسہ چناس و ٹرالر نا کلینڈر ٹپی مسر۔