حوال تا رد ئٹ بھاگ ئٹی تدوکا دے لیویز کارندہ نا کسفینگ و سول ہسپتال ٹی بے آسراتی و داڑیل تا دزگیر نہ کننگ نا بر خلاف خاہوت و آل پارٹیز جون تون اوار پولیس تھانہ نا مونا بھاگ بختیارآباد روڈ آ تولوک برانزی مچی کرے، ڈی سی کچھی شفقت انور شاہوانی نا تولوک برانز ٹی سرسہب مذاکرات آن گڈ تولوک برانز ایسر کننگا۔
رپورٹ نا رد ئٹ تدوکا دے بھاگ شار نا علاقہ گمب قاضی نا خڑک داڑیل نا موٹر سائیکل ءِ پلینگ نا کوشست ٹی لیویز کارندہ نواب خان سم لگینگ نا سوب آن ٹپی مسوسس ہرا درمان کننگ کن سبی آ دننا ولے او ٹپی حالیت ئٹ مرگ نا گواچی مس، کہنگ نا حوال بننگ تون مخلوق ٹی بھاز سوختئی تالان ماس۔
گیشتر حوال تا رد ئٹ اینو صوب ئنا نماز جنازہ آن گڈ جون اتون اوار خاہوت و آل پارٹیز پولیس تھانہ بھاگ نا مونا بھاگ بختیارآباد روڈ ءِ بلاک کریسہ تولوک برانز کریر برانز کروک آتا پاننگ اس ضلعی و بنجائی بست و بند مخلوق ءِ دز آتا رحم و کرم آ یلہ کرینے ہراڑے فورس نا کارندہ آک سلامت مفس گڑا لس مخلوق نا ءِ دیر کرو۔
اوفتا پین پاننگ اس دز آک بست و بند ءِ چیلنج کریسہ پولیرا ولے بست و بند دز آتے کنٹرول کننگ ٹی پورو بےسہب ءِ اندن سول ہسپتال ٹی ڈاکٹر تون اوار دوائی نا نیستی ءِ، دوا درمان نہ رسینگ و نہ و زیات دیتر ہننگ نا سوب آن ٹپی آ مرگ نا گواچی مس ضلع کچھی ٹی انفراسٹکچر بھس ءِ ولے نوٹس الوک کس اف۔