حوال تا رد ئٹ نیشنل پارٹی نا پارہ غان بنجائی پڑو نا رد ئٹ ریکوڈک بچاؤ تحریک نا پارہ غان اسہ برانزی مچی ہراکہ پارٹی آفس آن کشنگسہ شار نا جتا روڈ آتیان گل خان نصیر چوک آ برانزی مچی نا دروشم اٹ مس۔
ہراٹی نیشنل پارٹی بی ایس او پجار نا باسک آک و لس مخلوق بھلو کچ اسیٹ اوار۔ مسر برانز کروک آتا پاننگ ئس کہ بلوچستان نا ساحل مڈی تے تدوکا 74 سال آتیان بے کچ لٹنگ ءُ اندن وفاق نا بلوچستان تون جدمادر لمہ نا سلوک برجاء ءِ۔
او پاریر اینو بلوچستان نا ساحل مڈی تے سودا کریسہ وفاق و ایلو صوبہ آک جنت جوڑ مسونو ولے بلوچستان نا بندغ آک اینو ہم بجلی دیر جانجوڑی آن بارانگا بنماسی آسراتی تیان بے بشخ ءُ، سوئی ہراکہ تیوہ ملک ءِ گیس تننگ ءِ ولے سوئی نا جند ہم گیس آن بے بشخ ءِ۔ اینو ریکوڈک ہراکہ بلوچستان نا راجی میرات ءِ۔
ریکوڈک ءِ ڈکھوک وڑ ئٹ لیلام کننگو ہرا دا سلیکٹڈ حکومت نا بے لائخی ءِ۔ او پین پاریر ریکوڈک تون اوار بلوچستان نا ہرا ہم راجی میرات مرے نیشنل پارٹی چپ مروف و او سودا کروک آتا گواچن دروشم ءِ پاش کریسہ اوفتا بد آ کاریم تے پاش کرون۔