بلوچستان نا بنجائی شار کوئٹہ و ضلع پنجگور ئٹ سم کاری و ایلو وڑ ئنا ویل آتیٹ ارا بندغ کسفنگانو اندن اسٹ ئس ٹپی مسونے۔
گیشتر حوال تا رد ئٹ کوئٹہ نا علاقہ جناع روڈ ٹیکسی سٹینڈ آن خڑک نادرست بندغ آک سم کاری کریسہ اسہ بندغ ئسے کسفیر ہرانا چاہنداری عبدالقیوم، محمد نعیم نا مار ہند سیٹلائٹ ٹاؤن کوئٹہ نا پن آن مسونے۔
جون اسپتال کوئٹہ غا دننگانے داسکان کسفنگ نا سوب درست متنے۔
کوئٹہ نا علاقہ بزارگنجی کلی رئیسانی ٹی اسہ اُرا ئسے آن جون ئس خننگانے ہرادے گٹو کریسہ کسفینو۔
جون ء ایدھی کارندہ غاک سول اسپتال آ دریر ہراڑے اونا چاہنداری شیر محمد بڑیچ ھند کلی رئیسانی نا پن آن مسونے۔
اندن پنجگور نا علاقہ تسپ آن حوال آک اریر کہ سلاہ بند بندغ آک سم کاری کریسہ صدام الٰہی پنی ءُ بندغ ئسے ٹپی کریر ہرا ٹپی حالیت ئٹ اسپتال آ دننگانے۔