حوال تا رد ئٹ بلوچ اسٹوڈنٹس ایکشن کمیٹی نا بنجائی ترجمان تینا شینک کروکا بیان ٹی 21 فروری آ یوم لمئی بولی و 2 مارچ بلوچ ثقافت نا دے ئنا رد ئٹ جتا مجلس آتے ہڈ تننگ نا پڑو کریسہ پارے کہ بولی و ثقافت اسہ راج ئسے نا اندن ء اِرا بشخ ء ہرا راجی چائنداری و ٹہیفنگ ٹی سوگو آ کڑدار ادا کیرا۔
اوفتا پاننگ اس کہ راج آتا چائنداری زمین آن گڈ ثقافت آ ساڑی مریک و ثقافت ہی ہمو گڑا ءِ ہرا بندغ آتے اسہ راجی چائنداری ئسے تون ہمگرنچ کیک،جہان ٹی ہراڑے دا وخت آ ہزارا راج آک آبات ءُ و بھاز انگا راج آک تینا وجود ءِ گیرام کرینو، ہراڑے بھاز انگا راج آک تینا راجی چائنداری و بقا نا کوشست ٹی او تو ایلو پارہ غا بلوچ راج ہم ڈیہہ ئٹی ودی مروکا مَٹی تا سوب آن بلوچ راجی چائنداری ءِ لائخ بدلی تے اریسہ اندن ء کہی گڑا تا رکھ ءِ یخینی جوڑ کننگ ءِ ہرا راجی چائنداری نا ضامن ءُ۔ ثقافت اسہ اندن ء بشخ ئسے ہرا نا تعلق مادی آن زیات تصورات تون ءِ ہرادے اسہ راج ئسے نا بندغ آک فخریہ انداز ئٹ نہ تنیا قبول کیرہ
بلکن ہڈ تروکا تیوہ آ اصول آتا عمل ہم کیرہ۔
اوفک پاریر کہ ثقافت نا ڈول لمئی بولی ہم راجی شعور تون تفوک مننگ کن ابدی کسر ءِ۔ لمئی بولی تینٹ ہم راجی ثقافت نا بشخ ئسے، ہرا راجی نفسیات آن ہلیس
راجی دیمروی نا کسر ءِ ارفنگ کن اہم کڑدار ادا کیک۔مسیٹمی جہان نا بھاز انگا راج آتے دا حالیت آن گدرینگوئی تمانے کہ اوفتا تینا لمئی بولی نا جاگہ غا ایلو بولی تے ٹی اوفتے تعلیم تننگانے یا پینا بولی ءِ اوفتا زیا تخنگانے۔ ہراڑان اوفتا تخلیقی لائخیک کم مریسہ ہنانو، انتئے کہ لمئی بولی خیال آتا بولی ءِ ، اندا تخلیق آتا سر چشمہ ءِ ۔ بولی و ثقافت ئی اسہ راج ئسے نا چائنداری، تاریخ، و زمین تون تفوک مننگ نا ضامن ءِ۔
اوفتا پاننگ ءِ کہ دا وختا سیاسی کارکن آتا اندا فرض ءِ کہ او تینا لمئی بولی و ثقافت نا ساڑی حالیت نا خوڑتی ئٹ جائزہ الیر کہ او ننتون ارا حالیت ئٹ ساڑی ء۔ ہرا بولی وثقافت ننا چائنداری نا سوب ءِ او ننا خیال و عمل اسکان ساڑی ارے یا نہ انتئے کہ بولی و ثقافت نا استحصال زدہ مننگ آن راج آتا چائنداری تون اوار تخلیقی لائخیک ہم گٹو کننگ مریرا، اسہ سیاسی کارکن مننگ حساب ئٹ ننے آ المی ءِ کہ نن تینا بولی و ثقافت ءِ تاریخی صفحہ آتیٹ گواچنی وعملی زند ئنا بشخ جوڑ کین، اندا راج دوستی نا اولیکو و سوگو آ گڑا
ءِ۔
بلوچ اسٹوڈنٹس ایکشن کمیٹی تینا تیوہ آ زون آتے تاکید کیک کہ ’’21 فروری یوم لمئی بولی و ۲ مارچ بلوچ کلچر ڈے‘‘نا منسبت ئٹ مجلس آتے ٹہیفنگ کہ ہرافتا مخصد بولی و ثقافت نا تاریخی بشخ آن چاہنداری، اوفتے ساڑی چیلنجز و عملی زند ئنا بشخ جوڑ کننگ نا موضوع تے ہیت تاکن بلوچ خوانندہ آتے اندا بنماس آتا تربیت کننگ مرے۔