دی بلوچستان پوسٹ نیوز ڈیسک ءِ رسینگوکا حوال تا رد ئٹ بلوچستان آن پین اِرا بندغ زوراکی ئت بیگواہی نا گواچی مسونو۔
گیشتر حوال تا رد ئٹ تدوکا نَن کیچ زامران نا ہندی ورنا ئسے فورسز آک کراچی آن دزگیر کننگ آن گڈ تینتو اوار دریر کہ اوڑان گڈ بیگواہ ءِ۔
حوال تا رد ئٹ کراچی ملیر آن پاکستانی فورسز آک محمد نور پِنی ءُ ورنا ئسے دزگیر کننگ آن گڈ بیگواہ کریر۔
اندا وڑ فورسز آک نن نیمہ غا اُرا غا چھاپہ خلیسہ خضدار نا خلقی ءُ علاقہ ئسے آن نذیر احمد، نور محمد نا مار ءِ دزگیر کننگ آن گڈ بیگواہ کریر۔
یاتی مرے بلوچستان آن برجاء توہ زوراکی ئٹ بیگواہی تیٹ ودکی بسونے۔ تدوکا دہ دے ئٹ بلوچستان نا جتا علاقہ تیان پنجا نا کچ بندغ فورسز آتا دو آن زوراکی وڑ ئٹ بیگواہی نا حوال میڈیا ءِ رسینگانے۔
ایلو پارہ غان حب منگھوپیر نا ہند آن اسہ پین بندغ ئسے نا جون خننگانے، تدوکا دے ہم اندا علاقہ غان اسہ جون ئس خننگاسس و کوئٹہ غان ہم اسہ بندغ ئسے نا جون خننگاسس۔
حب کوالخواک تا رد ئٹ حب و کراچی نا سیمی علاقہ غان خننگوکا ہڑتوم آ جون آتے عباسی اسپتال کراچی آ رسیفنگانے، ہڑتوم آ جون آتا دو تیٹ ہتھکڑی تفوک اس و ہڑتوم آک تشدد آن گڈ خلنگاسُر۔
ولے رسینگوکا اسہ ہم جون ئنا چاہنداری متنے۔ حب و کراچی نا سیمی آ علاقہ تون اوار کوئٹہ نا جتا وخت آتیٹ جون خننگانے داڑان مُست حب کراچی نادرن بائی پاس آن مُسے بندغ نا جون خننگاسس ہرا چاہنداری نا وڑ ئٹ الو۔