پاکستان نا صوبہ پنجاب ئٹ دین نا بے شرفی نا دوبہ ئٹ مچی نا دو آن اسہ بندغ ئسے نا کسفنگ نا اسہ پین تدینی اس مونا بسونے ہرانا بنائی رپورٹ سروزیر پنجاب ءِ رسینگانے۔
تدینی پنجاب نا ضلع خانیوال نا علاقہ تلمبہ ٹی ہفتہ نا دے مس و پنجاب پولیس نا انسپکٹر جنرل راؤ سردار علی خان یک شنبے نا دے دا تدینی نا رپورٹ ءِ سر وزیر عثمان بزدار ءِ تِس۔
رپورٹ نا رد ئٹ تدینی ٹی 33 بندغ پِن کننگانو و 300 بے معلوم بندغ نا خلاف مقدمہ درج کننگانے ہراٹی بھلا ڈو و دہشت گردی نا دفعہ غاک ہم اوار کننگانو۔ پولیس تدینی ٹی اوار 66 بندغ ءِ دزگیر کرینے ہرافتیٹی بنجائی ملزم آک ہم اوار ءُ۔ پین بندغ آتا دزگیری کن پولیس چھاپہ خلنگ ءِ۔
وائس آف امریکہ تون ہیت کریسہ پولیس کوالخواک پاریر کہ ملزم آتا چاہنداری و اوفتا کڑدار واقع آن رسینگوکا فوٹیج و فرانزک نا کمک ئٹ کننگو۔
پولیس حکام نا پاننگ ءِ کہ تدینی نا حوال سوشل میڈیا غا بننگ آن پد ملزم آک ڈھکانو تینے ہرافتے پولیس پٹنگ ءِ۔ پولیس کوالخوا تا پاننگ ءِ کہ تدینی آن گڈ دمدستی تون پولیس جاگہ غا سر مسس و بنجائی ملزم ءِ دزگیر ہم کریسس ولے مُچی اودے پولیس نا دو آن کشا۔
پولیس کوالخواتا رد ئٹ کسفنگوکا بے قصور ئسک۔ ہرادے درخت ئٹ ٹنگیسہ خشت خلیسہ کسفیر۔
ٹوئٹر آ تینا بیان ئٹ وزیر اعظم عمران خان پارے کہ اسہ بندغ یا ٹولی ئسے نا کنڈ آن قانود ءِ دوٹی ہلنگ نا کوشست ہچ وڑ ئٹ سگنگ مفرو و مُچی نا بے دادی آ سخت گام ارفون۔ عمران خان مزید پارے کہ او تینا فرض ءِ پورو کننگ ئٹ بے سہب مروکا پولیس کوالخوا تا برخلاف ہم کارروائی نا تفصیل آتے خواہفینٹ۔
تدینی نا بارو ئٹ وفاقی وزیرِ اطلاعات و نشریات فواد چوہدری پارینے کہ دنو تدینی عشرہ غاتیان ساڑی تعلیمی بست وبند نا حاصل ءِ۔ دا ویل قانود نا نفاذ تون اوار چاگڑد نا شیف بٹنگ ءِ۔ فواد چوہدری نا پاننگ ءِ کہ او اخس وار تینا بست بند تعلیم نا بُھس کاری آ شدّت پسندی نا کنڈ آ پام تریفینے۔
یات مرے کہ پاکستان ٹی بے شرفی دین نا دوبہ ئٹ مُچی نا دو آن اسہ بندغ سے نا کسفنگ اولیکو یا پوسکنو تدینی اف۔ ہنوکا سال دسمبر ٹی پنجاب نا شار سیالکوٹ ٹی سوخٹہ بندغ آک دین نا بے شرفی نا دوبہ ئٹ سری لنکن شاری سے آ بے دادی کریسہ کسفیر۔