بلوچ اسٹوڈنٹس ایکشن کمیٹی شال زون نا پارہ غان لمئی بولی تا جہانی دے نا ردئٹ اسہ مجلس اس اڈ تننگا۔
دا مجلس نا کماشی ءِ بلوچ اسٹوڈنٹس ایکشن کمیٹی نا بنجائی کار گشاد آصف بلوچ کرے۔ مجلس نا گچین آ مہمان براہوئی بولی نا پنی آ زانتکار پروفیسر ڈاکٹر منظور بلوچ ئس۔ اسٹیج نا ذمہ واری تے بلوچ اسٹوڈنٹس ایکشن کمیٹی شال زون نا کار گشاد عزیر بلوچ دوئی کرے۔
اندن براہوئی بولی نا پنی آ زانتکار پروفیسر ڈاکٹر منظور بلوچ، بلوچستان یونیورسٹی بلوچی ڈیپارٹمنٹ نا لیکچرار شریف میر، بلوچی بولی نا پنی آ زانتکار ڈاکٹر ناگمان، بلوچ اسٹوڈنٹس ایکشن کمیٹی نا بنجائی سینٹرل کمیٹی ممبر ڈاکٹر سمعیہ بلوچ، بلوچ اسٹوڈنٹس ایکشن کمیٹی نا بنجائی کار گشاد آصف بلوچ تران کریر۔
تران کروک آک پاریر بلوچ راج اسے Multi-lingual راج ئسے، ولے بدبختی نا ہیت دادے کہ بلوچ راج بولی نا پنٹ بشخ و بانٹ کننگ ءُ، اندن براہوئی بولی آن بیدس بلوچ راج ءِ وختس سرائیکی نا رنگ اٹ، وختس جدگالی و کھیترانی نا رنگ اٹ ونڈ کننگ نا کوشست مننگے، دا وڑ نا چم بازیک بلوچ راج ءِ بھاز تاوان تننگو ہندا خاطران الّمی ءِ نن تینا لُمئی آ بولی تے رکھنگ تون اوار دا دروغ نا پد اٹ تینا راج ءِ پین ونڈ کننگ آن بچفن۔
اوفک پاریر اصل کاریم بولی نا دے ہڈ تننگ نا اف بلکن اصل کاریم بولی نا جندے سوگو توننگ مرے۔ بدبختی دادے کہ نن بلوچ قوم تینا بولی تیکن کاریم کتنون بلکن نن زیات تینا راجی بولی تے لتاڑنگ نا کوشست کرینن، اندن ملا مدرسہ ٹی تینا بولی نا جاگہ غا مدرسہ نا چناتے عربی خوانفک، اندن ننا ادارہ غاک تینا بولی نا جاگہ غا اردو ٹی لکھرہ، اردو ءِ مونی دننگو، اندن ادبی ادارہ و اکیڈمی تا ہیت مرے گڑا او ام سال ٹی اسے مشاعرہ اس اڈ ایترہ یا گڑا سال آ منہ شاعری نا کتاب چھاپ کیرہ۔ داسہ دور بدل مسونے داسہ بولی تنیا مسہ چار شئر اٹ بچفنگ مفک یا مونی انپک، بلکن داسہ دور ٹی بولی سیاسی ءُ ادارہ غاتہ کمک نا گرج ءِ۔
اندن مونی تران کریسہ پاریر ننا سیاسی عمل ٹی دائسکان بولی ءِ اہمیت تننگ افس، ننا بولی تا حوالہ امو فرنگی آک پٹ و پول کرینو ہرا پولکار ام متنو بلکن داڑے جاسوسی کن بسونو ننا بولی تا زی آ پٹ و پول کرینو نن دائسکان اموفتا ہیت آتے مونی دننگن۔ ننا جند آک دائسکان نئے پٹ و پول کرینن نئے ننا راج ٹی پولکار بندغ ارے۔ بلوچ قوم نا حالیت دادے کہ نئے ننتون پولکار ارے، نئے ننتون راہشون ارے، نئے ننتون سیاسی جوانو پارٹی ارے نئے ننتون زانتکار، دا حالیت ٹی بولی امر مونی کائک، اگہ بولی متو تو نیشنلزم ام سلیپک۔ اوفک پاریر بولی آن ابید نیشنلزم ہچس اف۔