کسہ
نوشت: سفرخان بلوچ | مَٹ: سمیہ بلوچ
دی بلوچستان پوسٹ
دو فروری نا یخ تفوک آ شام اس، چارمہ کنڈان چُپی نا تہو تالان ئس، قطب آن بروکا تہو تا ترندی زیات مننگ اس، اندن کہ ساعت ئنا سیلہ تینا مدار ءِ پورو کریسہ اس، اندا وڑ یخ ئنا ترندی ودنگ اس، شام ئنا اولیکو پاس ئنا بناء ءِ داسکان منہ منٹ گدرینگاسس، ہر اسٹ تینا اُرا ٹی باسن آ بیرم آتیٹ موریفوک یا ہیٹر تا مونا تولوک دا یخ انگا شام ءِ گدریفنگ نا جستجو ٹی لگوک اس۔
شام ئنا ہشت بجہ آن خڑک اِرا گاڑی چُپی نا سینا ءِ تل تریسہ گلی و کسر تیان ہنیسہ اسہ جاگہ اس بریسہ سلیرا، کار گاڑی آن شش سلاء بند بندغ دڑینگیسہ ٹرک گاڑی آن خڑک ہنیسہ گاڑی ٹی سوار ورنا ءِ خُمب کریسہ پارا “مونی نا کسر ساف ءِ نن تینا پوزیشن تے سمبالینا و نی تینا و اندا وخت مُچ اسٹ اسٹ آ ٹرک گاڑی ٹی سوار ورنا ءِ پارا “رخصت اف اوارن سنگت”
شام ئنا ہشت بجہ بیست منٹ آ شش سلاء بند بندغ گاڑی آن دڑینگسہ ترندی ئٹ گام ہرفسہ دکان تا زی آ لگیسہ پامدار مریرا۔
شام ئنا ہشت بجہ بیست و پنج منٹ آ فوجی کیمپ نا مونا ترند ءُ تراک اس مریک، اندا تراک آن گڈ دمدستی تون سم کاری نا سلپروک آ لڑ برجاہ مریک۔ اندا سم کاری نا نیام ئٹی کمانڈر تینا شش سنگت ءِ اشارہ کیک کہ او دکان تا زی آن جُپ خلیسہ کیمپ نا تہٹی پیہر۔
کسہ امو وخت آن بناء مریک، ہرا وخت او فیصلہ کریسس کہ اودے مجید برگیڈ نا بشخ اس مروئی ءِ، او بھاز سوچ خلنگ آن گڈ اسہ دے مجید برگیڈ نا کمانڈر تون حوال کرے و تینا فیصلہ ءِ بنفے، ورندی ٹی اودے پین وخت تننگک کہ او تینا فیصلہ نا رد ئٹ پین سوچ خلے کہ انت فیصلہ ئس مس اوڑان اوفتے حوال ایتے، مسہ توہ اسکان پین سوچ خلنگ آن گڈ او اسہ وار پین حوال کرے اودے واپس سوچ خلنگ کن پاننگا و مسیٹمیکو وار ولدا شش توہ اودے پین سوچ خلنگ نا وار تننگا، ایسر ٹی اسہ سال گدرینگ آن گڈ اونا فیصلہ قبول کننگا۔
اسہ دے موبائل نا گھنٹی لگیک، اونا مونا اسہ نادرست ءُ نمبر اس مریک، اودے پاننگک کہ فلان دے فلان جاگہ غا سر مروئی ءِ و او سرپد مریک کہ داسا کنے خوائفنگ نا وخت بسونے انتئے کہ اسہ دے مست اسٹ اس دا کلہو سر کریسس کہ نے کس اس فون کیک۔
او تروکا جاگہ و وخت ئنا زی آ سر مریک، اوڑے سر مننگ آ کس خننگپک، پانزدہ بیست منٹ گدرینگ آن گڈ اوڑے اسہ مول ءُ ورنا اس سر بریک و اونا کوڈ پن ئٹ اوڑتون مون پہ مون مریک و پائک کہ نن تون اوار سفر ٹی نی اُس؟ ورندی ٹی آھو پاننگ تون او ہڑتوم آک اوکان پیشتمیرا، اسہ دے موٹر سائیکل آ سفر کریسہ ہرا وخت او اسہ جاگہ اس سر مریرا گڑا اودے پاننگک داسا داکان پند آ سفر بناء مریک، او امو وخت پوسکن شار آ بسوسس ولے واپس ہم او سوگو اس اونا حوصلہ آک بڑز اسر اوکان پند آ پیشتمیسہ اسہ مش آن دڑینگیسہ ایلو آ لگینگ ولے داکان بیدس او امو سنگت آتون اوار اندا وڑ رادہ اس اندن لگاکہ کہ او چنکی آن اندا مش تیٹ بھلن مسونے۔
اسہ دے و اسہ نن پند ئٹ ہننگ آن گڈ او سہب ئنا 10 بجہ غا مش تا نیام ئٹی اسہ کلگ (ہلار نا باغ) ئسیٹی سر مریرا، اونا سنگت آک اودے پارہ کہ نی داڑے دم کش و او کارہ مالو آن ڈھکوک واکی ٹاکی ہتیسہ مش تیا لگیسہ کیمپ کمان تون حوال کریسہ اودے پارا کہ نن بسونن۔ او سنگت نن تون اوار ءِ، جواب ٹی پاننگک سہی ءِ نم سنگت ءِ پابو کہ او اموڑے سلے و دم کشے و نم واپس ہنبو او سنگت ءِ دننگ کن ایلو سنگت آک بننگ ءُ۔
سئے بجہ پانزدہ منٹ آ اِرا توفک بڈ بندغ اموڑے سر مریرا سلام دعا آن گڈ اودے ہننگ کن پاننگک و اوفتیان پاسکوڈ خواہک و جواب ٹی اودے پاسکوڈ تننگک، پاسکوڈ، “سنگت زندگ بووگ ءِ راہ ہمیش انت” مریک۔
اوکان پیشتمیسہ مش تیٹ ہنیسہ وار ئس اسہ بڑز ءُ مش ئسے آن دڑینگیسہ و ایلو آ لگیسہ او ہنیسہ ہنیسہ شام ئنا ہفت و نیم بجہ غا تینا اوتاک (کیمپ) نا خڑک آ سر مریرا کسر آ اولیکو گھاٹ آ تولوک سرمچار ترند توار خلیسہ اوفتو ہیت کیک دیر اُرے؟ جواب ٹی او اینو نا تخوک آ کوڈ ءِ پارا ہرا دا سنگت ءِ تروک پاسکوڈ آن اسل جتا مریک، اوتاک نا پاسکوڈ “گوکرت شہد بنت” مریک۔
پاسکوڈ رسینگتون اوار گھاٹ واکی ٹاکی ئٹ کیمپ آ حوال تیک کہ سنگت بننگ ءُ، اونا مونا ارا سنگت بریرہ و اودے سلام دعا آن گڈ امو جاگہ آ دیرا ہراڑے مالو آن کمانڈر و ایلو سنگت آک ہر شام اوار تولیسہ ملکی و غیر ملکی خبر خف توریرا۔
او اول ہشت بجہ آ بی بی سی اردو نا ریڈیو پروگرام سیربین ءِ خف تورنگ ئٹ مریرا، ہرا وخت آن سیربین بند مسونے گڑا او معلومات ہلنگ کن ہڑدے اسہ سنگت نا ذمہ واری ءِ کہ او مسہ چار گھنٹہ نا سفر ءِ ایسر کریسہ نیٹورک آ ہنیسہ تیوہ ملکی و غیر ملکی خبر تے اوار کریسہ شام ئنا ہشت بجہ آن مست کیمپ آ سر کے۔ و امو وخت کل اوار مریسہ مچ آ خبر تے چپی ئٹ خفتوریر و اندا نیام ئٹی کس ئسے نہ ہیت کننگ نا موکل ارے نہ پین گڑاس کننگ نا ولے ہراتم او داڑے سرمسوسس گڑا نیم گھنٹہ ئس سلیسس، سنگت آتون بلوچی حال حوال ہم کننگا و انداٹی اودے سلیمانی چا ہم تننگا، اوکان گڈ ہشت بجہ مننگ تون خبر نا وخت مس و اسہ گھنٹہ اسکان تیوہ آ ملکی و غیر ملکی خبر داڑ اسکان اسپورٹس و فلمی جہان نا رد ئٹ اینو نا اخس نیوز اسر او خف توننگار اسہ گھنٹہ آن گڈ ذمہ وار پوسکن بروک سنگت ءِ بیرم تریسہ خاچنگ کن جاگہ تننگا و اوکان گڈ تیوہ آک خاچنگ کن ہنار۔
سہب ئنا شش بجہ آ دے ٹک تننگ آن مست اودے بش کریر، اسٹ اسٹ آ مچ بش مسر، بش مننگ آن گڈ تیوہ آک بریسہ مجلس والا جاگہ ٹی مچ مننگ بناء مس، تیوہ آتا بننگ آن مست اوڑے مالو آن اسہ بڑز ءُ بندغ اس ساڑی اسوک، دا کیمپ بیرہ مجید بریگیڈ یونٹ نا اس انتئے کن داڑے ساڑی تیوہ آک مجید بریگیڈ یونٹ نا باسک آک اسر، ہرا شانزدہ بندغ بروک آ مشن کن النگاسر او تیوہ آک مالو آن اوڑے ساڑی اسر دا تیوہ آتا پن تے اسٹ اسٹ آ دا بڑز آ بندغ الینگ ءِ بناء کرے و اندا وڑ شانزدہ بندغ اسہ جاگہ مچ مسر دا شانزدہ بندغ آن بیدس مجید برگیڈ آ ایلو بندغ آک ہم ساڑی اسر ہرافتا دا مشن ئٹ تینا تینا ذمہ واریک اسر۔
اوکان گڈ او شانزدہ سنگت ءِ الیسہ امو جاگہ غا سرمسر، ہراڑے اوفتے بروکا مشن کن تربیت تروئی اس و انداکا اوفتا ٹریننگ بناء مریک، ہرا بھاز سخت مریک، ہرادے اسہ پروفیشنل کمانڈو نا ٹریننگ ٹی کرفینگک، او تیوہ آ ٹریننگ اوفتے تننگا شش توہ اسکان برجاہ ٹریننگ آن گڈ او شانزدہ بندغ تینا ٹریننگ ٹی سرسہب مسر۔
اوکان گڈ تیوہ آ بندغ آتے جتا ذمہ واریک بروکا مشن نا تیاری کن تننگار و ایسری موکل نا ودار کننگ کن پاننگا۔
شش ہفت توہ آن گڈ ایسر ٹی موکل رسینگا و اوفتے ٹارگٹ تننگا، ٹارگٹ اس نوشکی و پنجگور فوجی ہیڈکواٹرز، شش بندغ ارا ٹولی ٹی ٹہیفنگار، اوفتیان نوشکی مشن نا ذمہ واری ورنا ریاست و پنجگور مشن نا ذمہ واری ورنا زبیر بلوچ ءِ تننگا۔ دا ذمہ واریک ٹریننگ نا وخت آ و اوکان مست جتا محاذ تیا تروک کاریم کننگ نا سوب آن تننگاسر، ہرا وخت تیوہ آ گڑاک فائنل مسر، مشن آ ہننگ کن موکل نا ودار اس، اندا وخت تیوہ آتا مون تیا اندا وڑ خوشی خننگا دنکہ سد سال ئنا سے اسہ ملاس ءُ بندغ ئسے اسہ وار تون دیر رسنیگے۔
ہرا وخت ایسری موکل بس گڑا عمل نا موکل نا رد ئٹ تیوہ آ بندغ آتے اسٹ اسٹ کریسہ جتا جتا کسر تیان اوفتا ٹارگٹ نا خڑک علاقہ آتیٹ سر کننگ نا کاریم بناء مریک، دا کاریم پانزدہ آن بیست دے اسکان پورو مریک اوفتا اوڑے سر مننگ تون مجید بریگیڈ یونٹ نا پارہ غان اوفتا مشن کن اخس ہم خواست اسر اوفتے مالو آن پورو کننگاسس۔
داسا اوفتا ہننگ نا دے بسوس، اینو شام اوفتے جہلو کروئی اس، اوفتے یخ ئنا دا دیک ہم اندن لگنگ اسر، دنکہ او بیست و دو جولائی آن ہم مرغن ءُ، اوفک اسہ گھنٹہ ٹی شست وار گھڑی نا پارہ غا اوننگ اسر، تیوہ آتا مونا اسہ وڑ ئنا بے آرامی اس اسوک کہ دا دے ہرا وخت ایسری آ سر مرے و اوفک تینا ٹارگٹ نا پارہ غا کار۔
ودار نا وخت امو تم ایسر مس، ہرا وخت اوفتے پاننگا تیوہ آک تینا توفک و سم آتے ایسری وار اربو و پین اخس ہم گڑا ارے اوفتے تسلی ئٹ چیک کبو انتئے کن داسا پیشن مننگ نا وخت بسوسس، تیوہ آک زو زو تینا گڑا تے اوننگ بناء کریر ہرافک اوفتے تننگاسر، اوفتے فوجی گڑا تیان بیدس کُننگ کن ہرا گڑاک تننگاسر تیوہ آتے اسٹ اسٹ آ تسلی ئٹ اوننگ ءِ بناء کریر۔
داسا او شام نماز مننگ نا ودار ئٹی اسر، شام نماز خڑک بننگ تون او تینا جاگہ تیان پیشن مسر، ہراتم دے تیوہ ڈبینگا و شام ئنا نماز ایسر مس گڑا اوفک شار ئنا تہٹی ہنار، ہرا وخت و اسہ مسجد ئسے نا خڑک آن گدرینگار گڑا نمازیک امو وخت مسجد آن پیشن مننگ اسر و ہر اسٹ یخ آن بیزار مریسہ زوت آن زوت تینا ارا غا ہننگ نا کوشست ٹی اسر تاکن او اسہ ہیٹر یا اسہ پین گڑا ئسے آن خڑک باسن تولر ولے او عاشق آک یخ ئنا پرواہ ءِ کننگ آن بیدس ہننگ اسر ہراڑے او بندغ آتا ایسری مزل اس۔
ٹارگٹ ٹی منہ منٹ ئنا سفر بچوک اس۔ ہرادے او بے چاراتی ئٹ گدریفنگ اسر۔
کیمپ ئنا تہٹی سم کاری نا توار و راہداری آ مروک تراک نا سوب آن چار کنڈان مول اس، ایلو پارہ غان بیرہ اوغنگ آن بیدس پین ہچ بننگتوکہ، او اسٹ ایلو ءِ کور تریسہ مونی ہننگ اسر منہ منٹ ئنا تہٹی او کیمپ ئنا بھلو بشخ اس کوزہ کننگ ٹی سرسہب مسر، اندا وڑ نوشکی ٹی ہم جنگ بناء مسوسس و او گیٹ آ تراک کریسہ کیمپ نا تہٹی پیہنگ ٹی سرسہب مسوسر۔
امو وخت یونٹ کمانڈ تینا بیگ آن سیٹلائیٹ فون ءِ کشیسہ ذمہ وار ءِ فون کریسہ پارے نن کیمپ ئنا تہٹی پترینگانن و مونی گام خلنگ اُن، داسا ہڑتوما علاقہ آک جنگ ئنا میدان جوڑ مسوسر چار کنڈان سم تا ٹاست ٹیست و تراک آتا توار آن بیدس ہچ الو، تیوہ آ شام او اندا وڑ جنگ کریسہ کریر و سہب مننگ اسکان او تیوہ آ کیمپ آتا تہٹی پین اسہ بھلو بشخ ئسے کوزہ کننگ ٹی سرسہب مسر۔
ایلو پارہ غان دژمن چس مسوسس کہ انت مننگ ءِ، ہرا وخت اسکان او گڑاس پوہ مریر کہ انت مننگ ءِ اوفک بھلو کچ ئسیٹی فوجی کارندہ تے خلیسہ تہٹی پترینگاسر انتئے کن فوج کن دا تو چس کروک ءُ گڑاس اسوک انتئے کہ او دا وخت دا امیت ہم کننگ کتوسا کہ اوفتون دا وڑ ئنا گڑاس مرو۔
اسکان فوج گڑاس سرپد مسرے کہ انت مننگ ءِ سہب مسوسس ایلو پارہ غان او سوگو پوزیشن سمبھالاسر۔ سہب مننگ تون فوجی کارندہ آک بھلو کچ ئسیٹی اوفتا پارہ غا مونی گام ہرفنگ ءِ بناء کریر اندن کہ فوج اوفتا رینج ئٹی سرمسر گڑا اوفک اوفتیا قار جوڑ مریسہ تمار، اسہ وارتون سم و چغلی بمب و ایلو سلاء تیٹ فوجی تیا جہلو کریسہ بھلو کچ ئسیٹی فوجی کارندہ آک خلنگار، گڑاس میدان ءِ یلہ کریسہ نرنگ ٹی سرسہب مسر و کہوک آ فوجی کارندہ آتا جونک ہموڑے تموک اسر و اسہ وارتون سم تا ٹاست ٹیست چپ مس۔ اوکان گڈ اوفک مخنگ بناء کیرا و پارا نرار نرار۔
داکان گڈ ہیلی کاپٹر تا ہن و بر بناء مریک، او پند والا فوجی تے تہو کور تریسہ اوفتے مونی دننگ نا کوشست ءِ کیرا ولے اسہ وار واپس او فوجی آ جہلو کریسہ تالان مریرا۔
ایلو پارہ غان ہیلی کاپٹر تا شیلنگ و بمباری آن بیدس فوجی کارندہ آک اسہ وار واپس بھلو کچ ئسیٹی خلنگرا و ایلو فوجی کارندہ آک تینا کہوک آ فوجی تا جون تے ہلیسہ پدی مننگ آ بیوس مریرا۔ داسا داکان بناء مریک ہیلی کاپٹر تا شیلنگ و بمباری ولے بے سہبی آن بیدس ہچ اس دوٹی تا بفک۔
تیوہ آ دے کیمپ آتیٹ جنگ اندا وڑ چلینگیک و ایلو پارہ غان تولوک مجید برگیڈ نا کمانڈر فون آ اوفتون حوال ٹی مریک اولیکو دے ئنا ایسری اسکان نوشکی ٹی مجید برگیڈ نا تیوہ آ جند ندریک شہید مریرا ولے پنجگور ٹی داسکان ہم او مش نا ڈول اوفتا مون آ سلیرا۔
ایلو دے ہم پورا مریک و شام ئنا ہم اندا وڑ جنگ برجاہ مریک، بڑز ہیلی کاپٹر زمین آ فوجی و ایس ایس جی کمانڈو تیوہ آک تینا بیوسی ئٹ تینا خنتیٹ اوننگ اسر، اوفک داسکان ہم اوفتا مونا مش ئنا ڈول سلوک اسر، فوجی کارندہ آتا بیوسی نا ایسری کچ امو وخت مریک، ہرا وخت او تینا کیمپ آ ہیلی کاپٹر تا وڑ ئٹ شیلنگ و بمباری بناء کیرا داڑان بیدس اوفتے ایلو دے ہم بے سہبی آن بیدس ہچ اس دوئی مفک۔
مسیٹمیکو دے ئنا بناء ترند نوعیت نا جھڑپ آن مریک و بڑز ہیلی کاپٹر تا شیلنگ و زمین آ ایس ایس جی کمانڈو و بس سم و بمب آتا توارک، ولے داکان بیدس او سوگوی ئٹ جنگ کریسہ کیرا، ہمو وخت دا شش بندغ نا نیام ئٹی ہزار آتا کچ ئٹی فوجی کارندہ آک بیوس خننگرا و مونی ہننگ نا کوشست ء کریسہ کیرا ولے اوفتا بخت ئٹی جون تیان بیدس ہچ بننگ الو و تیوہ آتیان زیات اوفک فوج ء اوفتا رکھوک آ ہند پترینگسہ خلنگ اسر، ایٹمی ملک داسا بیوس مسوسس و بلوچ تاریخ ٹی نفسک و گوگ پروش نا جنگ آتا تاریخ اسہ وار واپس نوشت مننگ اس۔
پیشیم نا وخت مسہ چار ہیلی کاپٹر اسہ وار واپس تینا کیمپ آ بے دریغ و بے پامی ئٹ شیلنگ و بمباری بناء کریر ہرا دیگر اسکان برجاہ مس، و اندا وڑ او بندغ آک ہنیسہ تاریخ ئس جوڑ کریر۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔