بلوچستان نا ضلع آواران، خضدار و سندھ ئنا بنجائی شار کراچی آن پاکستانی لشکر پنچ بندغ ءِ زوراکی ئٹ بیگواہ کریسہ نادرست آ جاگہ غا تیا درینے۔
حوال تا رد ئٹ پاکستانی لشکر ضلع آواران نا علاقہ مشکے و کراچی نا علاقہ رئیس گوٹھ آن چار بندغ دزگیر کریسہ بیگواہ کرینے، ہرافتا چاہنداری نور بخش ولد حبیب، غوث محمد ولد گل شیر، ولی ولد الم جان و کمیسہ ولد صوالی نا پنا مسنے، دافتیان نوربخش ءِ تدوکا نن دو بجہ نا وختا کراچی نا علاقہ رئیس گوٹھ ئٹی اُراغا چھاپہ خلیسہ دزگیر کننگانے و ایلو ورنا تے مشکے نا علاقہ سنینڑی آن دزگیر کننگانے ہرافتا بابت ئٹ داسکان ہچو حوال اف۔
حوال تا رد ئٹ نور بخش نا تعلقداری ضلع کیچ ئنا علاقہ بل نگور آن ءِ ہرا متحدہ عرب امارات ئٹی مزوری کیک و اِرا سال آن پد چُھٹی آ بسوسس۔ و مشکے ٹی دزگیری آن گڈ بیگواہ مروکا تا بابت ئٹ پاننگک کہ اوفتے لشکر تون اوار ڈیتھ اسکواڈ نا کارندہ آک دزگیر کریسہ بیگواہ کرینو۔
اندن خضدار نا بنجائی بازار آن درو ثاقب زہری ءِ پاکستانی لشکر زوراکی ئٹ بیگواہ کریسہ نادرست ہند ئسے آ درے ہراڑان گڈ اونا بابت معلومداری اف۔
یاتی مرے کہ برجاہ ہفتہ ٹی بلوچستان و کراچی آن کہی بندغ پاکستانی لشکر دزگیر کریسہ بیگواہ کرینے۔ کراچی یونیورسٹی آن بیگواہ مروکا خوانندہ آتا زوراکی نا بیگواہی تا برخلاف جمعہ نا دے کراچی پریس کلب نا ڈن آ برانزی کیمپ ہم ہڈ تننگا۔ دا کیمپ ءِ کراچی یونیورسٹی آن تعلقداری تخوکا خوانندہ آتا کنڈ آن ہڈ تننگا ہرا ٹی بھلو کچ ئسے ٹی نرینہ و زالبول خوانندہ آک اوار مسر۔
اوفتا پاننگ ءِ کہ 7 جون 2022 آ کراچی نا علاقہ مسکن چورنگی ٹی اُراغا چھاپہ خلیسہ دودا بلوچ ولد الہی بخش و اونا ڈیپارٹمنٹ فیلو غمشاد بلوچ ولد غنی بلوچ ءِ ڈھکوک ادارہ و سیکورٹی فورس آتا کارندہ آک زوراکی ئٹ بیگواہ کرینو۔ اوفتا بیگواہی نا وخت آن کہ داسکان اوفتا خاہوت ءِ اوفتا بابت ئٹ ہچو حوال تننگتنے۔ اوفتا پاننگ ئس کہ تومکا خوانندہ آتے سیکورٹی ایجنسیک نادرست ءُ جاگہ غا درینو۔