تدوکا دے تیٹ پاکستانی فورسز آتا دو آن زوراکی ئٹ بیگواہ مروک کراچی یونیورسٹی نا شعبہ فلسفہ نا خوانندہ آک آجو مریسہ اُراغا سر مسر۔
شابیتی حوال تا رد ئٹ 7 جون آ کراچی نا علاقہ مسکن چورنگی ٹی اُرا غا چھاپہ خلیسہ اِرا خوانندہ دودا بلوچ ولد الہی بخش و اونا ڈیپارٹمنٹ فیلو غمشاد بلوچ ولد غنی بلوچ بیگواہ کننگاسر ہرا اینو آجو مریسہ تینا اُراغا سر مسنو۔
دودا بلوچ کراچی یونیورسٹی نا شعبہ فلاسفی ٹی مسٹمی سیمسٹر و غمشاد بلوچ پنچمی سیمسٹر نا خوانندہ سے، دودا بلوچ نا تعلقداری ضلع کیچ ئنا بنجائی شار تربت آن ءِ و غمشاد بلوچ نا ضلع کیچ ئنا علاقہ مند آن ءِ۔
یاتی مرے کہ ہڑتوما خوانندہ آتا زوراکی نا بیگواہی نا برخلاف یک شمبے نا دے کہی بندغ آک کراچی پریس کلب آن سندھ اسمبلی اسکان پیادہ مارچ کننگ نا کوشست کریر ولے سندھ پولیس برانز کروکا تے سندھ اسمبلی نا خُڑک فوارہ چوک ئنا ہند آ تورے۔
ہراڑے او تولوک برانز کریر و پدان برانز کروکا غٹ ہڑاند آتیان بیدس سندھ اسمبلی نا مونا سر مننگ ئٹی سرسہب مسر۔
خوانندہ آتا زوراکی ئٹ بیگواہی نا برخلاف برانز کروکا سندھ پولیس نا کنڈ آن بیگواہ خوانندہ آتا آجوئی نا یخین تننگ آن گڈ سندھ اسمبلی نا مونا تولوک برانز ءِ وختی حساب آ ایسر کریر۔
تدوکا دے برانز کروکا و سی ٹی ڈی نا کوالخواہ تا نیام ئٹ مروکا مذاکرات ئٹی پولیس نا بھلا عہدہ دار آک بتور ہراکان گڈ برانز کروکا وزیراعلیٰ ہاوس نا نیمہ غا پیادہ مارچ کننگ نا کوشست کریر، پولیس اوفتے مونی بننگ آن تورے ولے او وزیراعلیٰ ہاوس نا کنڈ آ ہننگ نا جاگہ غا سندھ اسمبلی نا کنڈ آ مارچ بناء کریر۔ ہراڑے پولیس برانز کروکا تیا سخت بےدادی کریسہ اوفتے دزگیر کرے و پولیس تھانہ غا درے۔
دا بابت ئٹ وی بی ایم پی نا سروک و بیگواہ ڈاکٹر دین محمد نا مسڑ سمی دین نا پاننگ ئس کہ دودا و گمشاد نا خاہوت نا برانز ئٹ کراچی پولیس جلہو کریسہ غٹ نرینہ، زالبول و چُنا تیا بےدادی کریسہ دزگیر کرے۔ داسا نن غٹ سنگت آک آجو مسونن ولے کہی سنگت آک ٹپی مننگ نا سوب آن اسپتال ئٹی ءُ۔
اونا پاننگ ئس کہ زالبول تا چادر آتے کاٹُم تیان چکیسہ و بیدس چمپل آن نہار آتا وڑ اوفتے گاڑی تیٹ خسنگا۔ ننا زالبول آتیا باز نازیبا ءُ لوز کارمرز کننگا۔
دودا و غمشاد نا آجو مننگ آن گڈ سمی دین بلوچ پارے کہ دودا اور گمشاد نا آجوئی نا بننگ آن گڈ اُست جم مسن کہ ننا لمّہ، ہیڑ و ایلم تا زی آ مروکا بےدادی، لٹ کُٹ و دزگیری ضائع متوس۔
بیگواہ مروکا خوانندہ آتا خاہوت نا برانز نا کنڈ آ اشارہ کریسہ اونا پاننگ ئس کہ بیگواہ مروکا بندغ آتا خاہوت آک بایدے داڑا غور کیر کہ امر تینا بندغ آتا آجوئی نا جنگ کننگ مرے انتئے کہ ایسکان خاہوت آک اوار مفرور ایسکان ننے آن کس ہچ ہم کننگ کپک۔