بلوچستان نا ضلع واشک نا علاقہ بسیمہ ئٹ پِر نا بُھس کاریک برجاء ءُ۔ کشت و کشار آتے دیر ارفے، سولر آک بھُس مسر و اسہ ٹیکٹر ئسے ہم دیر درے۔ ایلو پارہ غان تیوہ غا بلوچستان ئٹ پِر آن مخلوق ویل آتا گواچی ءِ۔
حوال تا ردئٹ بسیمہ حسین زئی تون اوار رخشان ئٹ نوکاپ و طوفانی پِر بُھس کاری کننگے، بھازا بند آک پنار، علاقہ نا زمیندار آتے کروڑ آ رپئی تا نسخان مسونے۔ علاقائی مخلوق نا ردئٹ پیماز نا تیار آ کشت و کشار تے دیر درے داڑان بیدس کہی زمیندار تا ٹیوب ویل آک دیر آن بُھس مسر تمار، اندن کہی سولر آتیتون اوار ٹیکٹر ئسے ہم دیر تینتون درے۔
مخلوق نا ردئٹ بست و بند نا درک اف۔ بند آتا پننگ آن کہی کلی تے دیر ارفنگ نا خلیس ءِ۔ ایلو پارہ غان محکمہ مُد پین پِر مننگ نا گمان نا درشانی ءِ ہم کرینے ہراڑان مخلوق فریشانی تا گواچی ءِ۔
یاتی مرے بلوچستان ئٹ چانڑدہ جولائی آن پِر مریسہ ءِ ہرانا پوسکنا لڑ ئنا بناء درو آن مسونے۔ کوئٹہ تون اوار بلوچستان نا ایلو علاقہ آتیٹ پِر برجاء ءِ۔ جعفر آباد ئٹ کوٹی تا چھت تمنگ آن زالبول و اسہ چُنا اس بیران مسونو اندن ڈیرہ مراد جمالی ئٹ بجلی ہلنگ آن اِرا بندغ ساہ تسر۔
بلوچستان نا علاقہ حب ئٹ دیر کوئٹہ کراچی بھلا کسر آ پول ءِ درے ہراڑان کوئٹہ نا کراچی آن زمینی کسر بند مسونے۔ پی ڈی ایم اے نا ردئٹ درو اسکان تیوی بلوچستان ئٹ کہوک آتا 102 اسکان سر مس۔