غٹ جہان ئٹ 30 اگست آ زوراکی نا بیگواہی تیان زیمی مروکا بنندغ آتا جہانی دے اڈ تننگک، دا بابت ئٹ خضدار و کراچی ٹی برانزکننگا۔
کراچی ٹی بیگواہ آ بندغ آتا زوراکی نا بیگواہی نا برخلاف ہیومن رائٹس کمیشن آف پاکستان نا کنڈ آن کراچی پریس کلب نا مونا دپدرشانی ہم کننگا۔ ہرا ٹی سول سوسائٹی تون اوار ایلو سیاسی تپہ آتا سروک، باسک و بیگواہ آ بندغ آتا خاہوت آک اوار مسر۔
برانز ئٹ پبلشر و صحافی لالہ فہیم بلوچ نا آجوئی کن قلم کار، صحافی، شینکار و سیاسی باسک آک سخت نعرہ خلکر، کراچی ناعلاقہ ماری پور آن بیگواہ عمران بلوچ و گلستان جوہر آن بیگواہ عبدالحمید زہری نا خاہوت آک ہم اوار مسر۔
دا وخت آ ہیومن رائٹس کمیشن آف پاکستان نا کو چیئرپرسن اسد بٹ، کرامت علی، مہناز الرحمان، بلوچ یکجہتی کمیٹی کراچی نا ڈپٹیآرگنائزر وہاب بلوچ تون اوار پین بندغ برانز کروکا تتون تران کریر۔
برانز کروکا تا پاننگ ئس کہ حکومت و ادارہ آک قانود نا شرف ءِ کریسہ بیگواہ آ بندغ آتے عدالت آتیٹ ہتیر و قانود و رہبند نا دائرہ ٹیرہینگیسہ سندھ ئٹ بیگواہ آ بندغ آتا آجوئی ءِ یقینی جوڑ کیر۔
ایلو نیمہ غان خضدار ئٹ بیگواہ آصف و رشید نا خاہوت نا کنڈ آن برانز اس اڈ تننگا۔ برانز ئٹ اوار مروکاک شہید رزاق چوک آک آزادیچوک اسکان پیادہ مارچ کریر۔
بیگواہ آ بندغ آتا خاہوت آتیان سعداللہ بلوچ نا باوہ و کبیر بلوچ، مشتاق بلوچ و عطاء اللہ نا خاہوت آن کبیر نا لُمہ ہم برانز ئٹ اوار ئس۔
برانز کروکاک آصف بلوچ، رشید بلوچ، مشتاق بلوچ، کبیر بلوچ، و عطاء اللہ بلوچ تون اوار غٹ بیگواہ آ بندغ آتا آجوئی نا خواست کریر۔