نیشنل ڈیزاسٹر مینجمنٹ اتھارٹی (این ڈی ایم اے) پارینے کہ تیوہ غا پاکستان ئٹ سیلاب آن پین 27 بندغ بیران مسونو ہرافتیٹ 4 بندغ بلوچستان ئٹ مرگ نا گواچی مسونو، بلوچستان ئٹ سیلاب آن زیمی مروک آتا حالیت تیوہ غاتیان زیات خلیس نا ہد اسکان ءِ۔
این ڈی ایم اے نا رِد ئٹ سیلاب نا سوب آن کسر تا بند مننگ و امن و امان نا خراب آ حالیت آتا سوب آن ہزار آ زیمی مروک آتیسکان داسکان کمک رسینگ ئٹ اَف۔ کراچی آن زمینی کسر آتا پورہ مفرنگ نا سوب المّی گڑاتا سر کننگ نا نظام ہم تینا مون مسونے، ہرانا سوب آن ناجائز فاید ہلوک آ مافیا میدان آ بسونو۔
بلوچستان ئٹ سیلاب نا سوب آن بجلی رسینگ نا نطام بھاز خراب زیمی مسونے، کوئٹہ ئٹ لوڈشیڈنگ 20 گھنٹہ اسکان سر مسونے اندن ایلو ضلع تیٹ بجلی ہچ دوئی ہم اَف۔ سولر پینلز تا نرخ آتیٹ ہم ودکی بسونے، دکاندار آک پارا کہ کسر آک بند ءُ، مال آتا کمبوتی نا سوب آن نرخ آتیٹ ودکی بسونے چیف ایگزیکٹیو افسر کیسکو پائک کہ سیلاب نا سوب آن بجلی نا 27 گریڈ و 336 فیڈر زیمی مسونو، بحال کننگ نا کاریمک اسہ ہفتہ ئسیٹی ایسر کننگرہ۔
یاتی مرے کہ بلوچستان ءِ داتم 1350 میگا واٹس نا ضرورت ءِ اندن داڑان مست بلوچستان ءِ 750 میگا واٹس بجلی تننگاکا ولے داسہ نا پر آتیان گُڈ دا بجلی کم مریسہ بیرہ 250 میگاواٹس سلوک ءِ ہرا ڈیرہ غازی خان آن لورالائی کوئٹہ گریڈ اسکان سر کننگسہ ءِ۔