وائس فار بلوچ مسنگ پرسنز نا بین ہڑتال کیمپ ءِ 4748 دے پورو مس، اینو اواری نا درشانی کروک آتیٹ بی ایس او مینگل نا انفارمیشن سیکرٹری بالاچ قادر، شوکت بلوچ و ایلوفک اوار ئسر۔
دا وخت آ وی بی ایم پی نا وائس چیئرمین ماما قدیر بلوچ پارے کہ طاغتور و کوزہ گیر اسہ کمزور ریاست ئسے آ تینا کوزہ ءِ تورنگ کن جتا وڑ ئنا کاریم تے آزمائیفک، او غلام قوم نا نفسیات ءِ خوانیسہ اندا حساب ئٹ تینا تسلط ءِ ٹہیفسہ کیرہ۔
او پارے کہ بلوچستان ئٹ ریاست دہشت گردی آ کاروائی تیٹ ترندی ایسونے، جتا علاقہ تیٹ فوج تینا ہندی ایجنٹ آتا وڑ ئٹ فوجی بربریت و زوراکی ئٹ بیگواہی تا لڑ ءِ برجاء تخانے۔
او پارے کہ پاکستانی ریاست جہانی بندغ آتا حق آتا کانود ءِ لتاڑانے، ولے اسہ سوج کروک ئس اف، انسانی حق آتا تنطیم آتا ہیت و بیان آک لوزی ءُ، بلوچستان انسانی حق آتا حوالہ ئٹ بلیک ہول ئس جوڑ مریسہ ءِ، نیشنل و انٹرنیشنل میڈیا بلیک آؤٹ ءُ، کُل خنتے تفینو۔
او پارے کہ انسانی حق آتا ادارہ غاتا پارہ غان نوٹس ہلنگ و اعلامیہ تا برجاہ مننگ آن بیدس نئے انسانی حق آتا سخت خلاف ورزی تیٹ کمبوتی ئس بننگ ءِ نئے اوفتیا عمل کننگسہ ءِ۔