حوال تا رد ئٹ اوغانستان نا صوبہ پکتیا نا منَہ جاگہ غا تیا ششمی جماعت آن بڑز ئنا خوانندہ آ تیکن سکول آک دوارہ ملنگانو۔
اوغانستان نا ہندی میڈیا طلوع نیوز اسہ ٹویٹ اس شیئر کرینے ہراٹی صوبہ نا محکمہ حوالکاری و دود ربیدگی نا سروک مولوی خالقاحمد زئی سکول آتا ملنگ نا پڑو کننگ ءِ۔ اونا پاننگ ءِ کہ فیصلہ ہندی سکول نا سروک آک کرینو و دا سرکاری پاننگ آ متنے۔
بی بی سی پشتو نا رد ئٹ تقریباً سال ئسے آن پکتیا نا باز علاقہ آتیٹ منَہ سکول دوارہ ملنگانو۔ پکتیا نا بنجائی گردیز و چمکانی ناضلع آتیٹ ہندی بندغ آک دا حوال ءِ پک کرینو۔
صوبہ پکتیا نا ہندی گردیز نا جاگہی عبدالحق فاروق نا پاننگ ءِ کہ نن خوش اُن کہ ننا مسنک دوارہ تینا سکول تیا ہننگ ءُ۔
اونا پاننگ ئس کہ نن کن، ننا چُنا تیکن و ڈیہہ ئنا خاطر، دا نن کُل کن فخر ئنا ہیت ئسے۔ دا ہرکس نا کہ کاریم ءِ، دا تیوہ ڈیہہ کن جوانءِ۔
پکتیا نا اِرا پین ہندی امل شمر و فرید احمد زئی بی بی سی ءِ پاریر کہ اوفتا علاقہ ٹی بیرہ مسن تیکن سکول آک ملنگانو۔ تومکا اومیتنا درشانی کریر کہ داسا سکول آک ملوک مرور۔
چمکانی نا سمین اکبری گرلز ہائی سکول ٹی مسنک خواننگ کن بَننگ ءُ۔ طالبان نا حکومت آن گڈ ڈیہہ ئنا ایلو بشخ آتا وڑ ششمیجماعت آن بڑز ئنا مسن تے دا ہائی سکول آ ہِننگ نا موکل الو۔ ولے داسا ہندی بندغ آتا پاننگ ءِ کہ سکول منَہ دے آن دوارہ ملنگانے۔
چمکانی نا اسہ استاد، ہاشم خیل ہاشمی بی بی سی ءِ پارے کہ دا علاقہ ءِ ہچو سرکاری چٹی رادہ کننگتنے، ولے مسن تیکن ہائیسکول ملنگانے و کسس داڑان نمن متنے۔
اوغانستان ئٹ طالبان حکومت نا وزارت تعلیم ہم دا بابت ئٹ ہچو ہیت کتنے۔ وا ہم پکتیا ٹی طالبان نا ہندی ذمہ وار آک دا حوال ءِ پککرینو۔
صوبہ نا حوالکاری و دود ربیدگی سروک مولوی خالق احمد زئی بی بی سی ءِ پارے کہ تیوہ پکتیا ٹی دنو پنچ سکول ملنگانو۔
منَہ بندغ نا پاننگ ءِ کہ سکول آک اسل ئٹ منَہ دے مُست ملنگاسُر۔ پکتیا آن بیدس منَہ پین صوبہ آتیٹ ہم ششمی جماعت اسکان مسنتا سکول آک ملنگانو۔