بلوچستان نا بنجائی شار کوئٹہ نا ریڈ زون آ گورنر ہاؤس نا مونا زوراکی نا بیگواہی تا گواچی مروکا بلوچ سیاسی باسک آتا خاہوت آتاتولوک برانز اینو 50 می دے پاکستانی وزیر داخلہ رانا ثنا اللہ تون اوڑدئی آن گڈ ایسر کننگا۔
برجاء سال ئنا جولائی ٹی زیارت ئٹ دزگیر مروکا بیگواہ آ بندغ آتا دروغ ئنا مونتس ئٹی خون ئنا برخلاف بیگواہ آ بندغ آتا خاہوت آکشار ئنا ریڈ زون ئٹ تولوک برانز کریسہ تینا بندغ آتا رکھوک یلہ مننگ نا خواست کریسہ پاریر کہ زیارت تدینی نا بابت ئٹ جوڈیشلکمیشن اڈ تریسہ بیگواہ آ بندغ آتا خاہوت آتے باور کرفنگ مرے کہ اینو آن گڈ کس ءِ دروغ ئنا مونتس آتیٹ خون کننگ مفرو۔
حکومتی پڑ آ ہچو گامگیج مفننگ نا سوب آن تولوک برانز پنجاہ دے آن برجاء ئس و دا نیام ئٹ ترند پر تا سوب آن خاہوت آتے باز ہڑاند آتون مون تروئی تما و باز آ بندغ آک ناجوڑ ہم مسر۔
بلوچستان نا جتا علاقہ آتیان زوراکی ئٹ بیگواہ مروک بندغ آتا لمّہ ہیڑ و سیال آک تولوک برانز ئٹ اوار مریسہ حکومت آن تینا خواستآتا ایسری نا خواست کریر۔
ولے اینو پاکستانی وزیر داخلہ رانا ثنااللہ نا کماشی ٹی بڑزینکو پڑ آ اسہ وفد اس تولوک برانز آ بریسہ خاہوت آتون اوڑدئی کرے واوفتیان برانز ءِ ایسر کننگ نا خواست ہم کرے دا حکومتی وفد ئٹ بلوچستان نیشنل پارٹی و باپ ئنا وزیر آک ہم اوار ئسر۔
دا وختا خاہوت آتا پاننگ ئس کہ ننا خواست آک سادہ ءُ، نن خوانہ کہ ننا بندغ آک اگہ ڈوہ اس کرینو تو اوفتے عدالت ئٹ ہتنگ مرے۔ اگہنُمے تینا عدالت آتیا باور اف گُڑا نن ہرانگ کان؟
اوفتا پاننگ ئس کہ اوفتون داڑے بیگواہ آ بندغ آتا لمّہ و ہیڑک تولوک ءُ دافتے باور کرفنگ مرے کہ اوفتا بندغ آتا جونک خسنگ مروفس۔
بیگواہ آ بندغ آتا خاہوت آک حکومتی وفد ئنا باور کرفنگ آ تینا تولوک برانز ءِ ایسر کننگ نا پڑو کریسہ پاریر کہ اگہ ننا خواست آک ایسرمتور تو پین وختی ترند برانز نا کسر ءِ ارفون۔