وڈھ کلی صالح محمد روڈ آ جنّی تیا سم کاری آن گورنمنٹ انٹر کالج وڈھ نا خوانندہ ورنا یاسر احمد مینگل جاگہ غا بیران مس اندن عنایت اللہ شیخ بھاز ٹپی مس۔ جون و ٹپی وڈھ ہسپتال کن دننگار۔ بنائی دوا درمان آن گڈ ٹپی ءِ خضدار ہسپتال کن دریر و جون خاہوت نا دو ٹی تننگا۔
اندن بلوچستان نا ضلع لورالائی نا کٹوی نا ہند آ سلاہ بند بندغ آک سم کاری کریسہ اسہ بندغ ئسے کسفیر و نرار۔
پولیس نا رِد ئٹ تدوکا دے لورالائی ٹی کوئٹہ روڈ کٹوی موڑ نا ہند آ سلاء بند بندغ آک سم کاری کریسہ حسین کلی لغئی نا ہندی ءِ سم کاری کریسہ کسفیر و نرار۔ جون المّی کاروائی آن گڈ خاہوت نا دو ٹی تننگا پولیس نا رد ئٹ ویل متکنو دژمنی ئسینا سوب پاننگسہ ءِ۔
داڑان بیدس بلوچستان نا ضلع موسی خیل ئٹ پڈ و اُست ئنا دین تالان مسونے، پڈ و اُست نا ناجوڑی آن دوانزدہ سن ئنا مسڑ ئس مرگ نا گواچی مسونے اندن بھاز آ بندغ آک زیمی ءُ۔
علاقہ نا ہندی ملاء سعد اللہ زمری نا رِد ئٹ بلوچستان نا ضلع موسی خیل ئٹ پڈ و اُست ئنا دین خلیفوک ءُ شکل ئس دوئی کرینے داسکان سد آتا بندغ آک دا دین نا گواچی ءُ اندن تدوکا دے 12 سن ئنا مسڑ ہرا کلی سین مندوزئی نا ہندی ئسے مرگ نا گواچی مسونے دا علاقہ ٹی جانجوڑی نا آسراتی و کاندہ غاتا کمبوتی ءِ۔