بست و بندی کوالخوا تا بے پامی نا سوب آن بلوچستان یونیورسٹی خاران کیمپس بند مننگ کن مون کرینے۔ ترجمان بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نا بنجائی ترجمان تینا شینک مروکا بیان ئٹ بلوچستان یونیورسٹی خاران کیمپس نا بد حالی و آسراتی تا کمبوتی آ خلیس نا درشانی ءِ کریسہ پارے کہ تیوہ غا بلوچستان ئٹ منہ خوانوکا ادارہ ساڑی مننگ آن بیدس بد حالی نا گواچی ءُ و معیاری تعلیم ایتنگ نا وڑ ئٹ افس۔
2017 ئٹ یونیورسٹی آف بلوچستان خاران کیمپس نا ہڈ تننگ تون اوار بست و بندی وڑ ئٹ منہ شعبہ تیٹ داخلہ تا بناء کننگا و داخلہ تیٹ سخت شرط آتا مفرنگ نا سوب آن اولیکو سال سد آتا خوانندہ غاک داخلہ ہلیسہ تینا خواننگ ءِ برجاہ تخنگ نا بناء ءِ کریر۔
ترجمان پارے وخت آتون اوار منہ شعبہ آتا داخلہ کن ہم سخت ءُ شرط تخنگار ہرانا سوب آن کئی خوانندہ غاک داخلہ ہلنگ کپسہ حالانکہ مروئی تو دا اس کہ کوالخواک وخت تون اوار شعبہ تیٹ ودکی ہتوسر و ہاسٹل جوڑ کروسر ولے بست و بندی کوالخوا تا بے پامی نا سوب آن داسہ یونیورسٹی بند مننگ کن سر مسونے۔
بساک ترجمان نا پاننگ اس بلوچستان ئٹ داتم منٹ اندونو خوانوک ادارہ ٹہفوک ءُ ہراڑے خوانندہ غاک جوانو خواننگ دوئی کننگ کیرہ خاران ئٹ بلوچستان یونیورسٹی نا کیمپس نا ہڈ تننگ نئے بیرہ خاران بلکن تیوہ غا بلوچستان نا خوانندہ تیکن اسہ جوانے ہیت ئسے ولے یونیورسٹی ءِ کاریم ئٹ ہتنگ آن گڈ بست ءُ بندی کوالخواک پد مہ پد بے پامی نا درشانی ءِ کریسہ ءُ یونیورسٹی نا ہڈ تننگ تون اوار ہاسٹل آک جوڑ کننگتنو ہرانا سوب آن بلوچستان نا ایلو ضلع غا تیان تعلقداری تخوکا خوانندہ غاک داخلہ ہلنگ کن ساڑی افس۔
او پارے خاران بلوچستان یونیورسٹی نا کیمپس ئٹ شعبہ غا تیٹی ودکی ہم مفرنگ نا سوب آن منہ شعبہ آتیٹ داخلہ تا خوانندہ غاک ایلو صوبہ تیکن مون کیرہ۔
تنظیم نا ترجمان نا پاننگ اس نن تیوہ غا تعلقداری ادارہ تیان خواست کینہ کہ بلوچستان نا خوانوکا نظام ءِ ہُریسہ بلوچستان یونیورسٹی نا خاران کیمپس ءِ تیوہ وڑ ئٹ کاریم کن ہتیر عملی گام آک ہرفنگر و یونیورسٹی ٹی شعبہ تیٹ ودکی تون آوار ہاسٹل ہم جوڑ کننگے تانکہ تیوہ غا بلوچستان نا خوانندہ آک دا یونیورسٹی ٹی خواننگ دوئی کننگ کیر۔